1 Karãpe put'ok'e wẽtup ok Iesui mohey pakup te hat yt itag i te Iesui mohey hap ete hawyi waku — Ereke ro mehĩ mana wato'e tope. Iesui mohey hat en mote waku ereĩne'en uruwywo Tupana mõtypot hamuat wuat'i e'at pe wato'e imohey pakup i hat pe are. Waku — Ereke ro wato'e imohey pakup i hat pe yt ihãite i imohey hap ete pytkai. 2 Yt naku i wati­mohit ne'i mi'i wẽtup ok miit yt ikuap kahato i te aimikuap Iesui etiat pytkai. Yt naku i watu­'uka sehay wo mi'u ete kat som waku watu'u kat som yt e hap ete katu­pono imohey pakup takaria tu'uka teran mi'u eko ete. Yt naku i watu­'uka imohey hap yt aiwo­'oeko ewy hap ete mekewat kat e'at waku wati­mõ­typot Tupana e hap ete. Mi'i pote yt naku i wati­mohit Iesui mohey pakup i hat. Po'og waku wati­ky'e kahato mi'iria. 3 Yt aiwo­'o­'ewy hin i mi'u eko ete katu­pono wẽtup ok Iesui mohey hat i'u yne mi'u ko'i hat ma'ato wẽtup ok yt ihaĩte i te Iesui mohey hap ete rakat — Wãi wãi'e ne'i mi'u ko'i ete. Mi'i hawyi mi'u u yne hat yt naku i to'e yt i'u yne i hat pe — Yt naku i kahato en mehĩ mana e yt etu'u yne i mi'u uru'ewy yt naku i mio tã wato'e imohey pakup hat pe. Katu­pono — Uha'yru mohey hat en mote waku ereĩne'en uipy'a pe e Tupana ahepe. 4 Yt naku i wati­mohit irania'in Iesui eropat haria i'atueko ete kat pote I'atu­ka­'iwat koro Iesui yn ikuap waku teropat hap sio yt hap katu­pono Ta'a­tu­ka­'iwat kaipyi yn ta'a­tu­ky­'esat — En ni waku rakat e hap. Uiwy­ria'in Aika­'iwat tikuap kahato aimoe­saika topotpap nug hamuat hap. Aipoi­tyro kuap kahato Aipo­typot koro topotpap nug hamo. Yne tomohey pakup i haria poityro kuap hat Iesui toĩne'en. I'ewyte yt naku i wato'e i'u yne hat pe — Yt naku i en katu­pono etu'u yne yt urueko ewy i wato'e. Yt naku i mio tã wato'e katu­pono Tupana to'e Tosa­'yru mohey haria pe — En ni waku kahato uiwa­nẽtup hawe e yne miit'in me sio mi'u tutu'u yne sio yt pytkai i. 5 Pyno irania'in Iesui mohey haria — Waku ti wati­mõ­typot Tupana yne e'at pe i'atu'e ma'ato irania'in Iesui mohey haria — Wẽtup e'at yn nat po'og waku wati­mõ­typot Tupana i'atu'e. Ta'i yt aiwo­'o­'ewy hin i kat e'at po'og waku hap ete. Pyno waku wato­mohey aipy'a pe yt heremo i kat som wato­mohey mi'i hap ete are. Waku watikuap aiwewi kat e'at waku kat e'at yt hap Tupana mõtypot hamuat are. Mi'i hawyi yt naku i wati­mohit irania'in mimohey. 6 Waku kahato wati­mõ­typot Tupana. Mi'i pote waku wato'e — Mesuwat e'at pe atimõ­typot teran Tupana wato'e. Yt aiwo­'o­'ewy hin i aimi'u eko ko'i wo Iesui mohey haria aito pytkai. Wẽtup ok to'e — Mesup atu'u mi'u Tupana mõtypot hamo e. Pyno waku mi'i ewy ewetu'u katu­pono eiwehum kahato mekewat mi'u ete Tupana kape pote waku ewetu'u. Ewetu'u hawyi — Waku kahato En Tupana katu­pono uipoi kahato hat en ewei'e. Ma'ato irania'in Iesui mohey haria — Yt urutu'u kuap i mekewat mi'u mana mehĩ i'atu'e katu­pono uruwa­nẽtup hawe Tupana yt tiky­'esat i urutu'u mekewat mi'u hap i'atu'e. Mi'i haria pe waku wato'e — Pyno waku yt ewetu'u i mekewat mi'u mana mehĩ katu­pono yt eiwehum kuap i mekewat mi'u ete Tupana kape wato'e. Mi'i pote yt naku i ewetu'u katu­pono waku wati­mõ­typot Tupana ahenuk turan. I'ewyte waku watu­we­mo­sy'at tuereto Tupana mõtypot hamo wato'e aiwo­'ope aheko mi'u u hap ko'i ete. 7 Yt naku i watoĩ­ne'en mesuwat yi tote aiwehay upi aimo­wepit hap yn nug hamo kat pote Aika­'iwat mowepit hap kape aiwy­ria'in mowepit kape yn waku watu­we­potpap are. Yt wato­'o­po­wyro i pote yt naku hin i watoĩ­ne'en mesuwat yi tote. 8 Uiwy­ria'in waku wato'e — Yt uiwepyi i uiwe­mo­wepit hamo areĩne'en neran mesuwat yi tote ma'ato Tupana mowepit hamuat i'ewyte miit'in mowepit hamuat areĩne'en neran mesuwe wato'e. I'ewyte uiku­'uro hap e'at pe atimõ­typot teran Tupana uiku­'uro hamo waku wato'e aiwo­'ope uimi­mu­'eria are. Mio tã wato'e pywo pe pote Tupana wanuaria sese watoĩ­ne'en. 9 Tupana tipo­'oro Tosa­'yru Aipo­rekuat nuat. Mi'i hawyi iku'uro hawyi tuwẽtem i gu'uro pyi. Aika­'iwat toku­'uro rẽ toikuap aiku­'uro hap mi'i pote irania'in Iesui mohey haria iku'uro rakaria Ka'iwat no topy­hu'at. I'ewyte Aika­'iwat no toĩne'en i toku­'uro hawyi mi'i pote watoĩ­ne'en iwywo katu­pono toĩne'en i pote tuwẽtem gu'uro pyi. Mesup Iesui toĩne'en wuat'i ieĩne'en haria Ka'iwat no. I'ewyte toĩne'en mesup wuat'i iku'uro rakaria Ka'iwat nuat. Mi'i pote aiku­'uro hap toikuap kahato mesup. 10 Mi'i pote yt naku i wato'e aiwo­'ope — Uiwa­nẽtup hawe mekewat miit yt kat hamuat i yt naku i wato'e mesuwe kat pote Tupana yn waku aipat'ok uwe waku uwe yt hap e hamuat are. Mekewat e'at pe wyti aru toiho­'o­mo­herep uwe tomohey sese haria. Yt naku i wato'e wẽtup ok Iesui mohey hat pe — Yt woro­ky­'esat i kahato en mana mehĩ wato'e. Yt naku i wati­mohit aiwa­nẽtup hawe irania'in Iesui mohey haria katu­pono Tupana yn aikuap sio waku sio yt hap. Mi'i yn to'e kuap. Meiũran wyti aru yne aito watoĩ­ne'en i'am me Tupana ehay ahepiat kuap hamuat sio waku rakat no watoĩ­ne'en aipy'a pe aiwa­nẽtup hawe sio yt naku i hap kuap hamo. 11 Ta'i mi'i tã to'e Tupana miwan me — Meiũran aru yne tuwe­pỹ­'ã­tutuk uhowawi e. Mekewat e'at pe yne te'e­ro'e aru — En yn ni Tupana i'atu'e te'e­ru­we­pỹ­'ã­tutuk popuo e. Yt uheso hin i e. Pywo ti rat ui'e hap ewy aru topy­hu'at e. Torania te'e­ru­we­pỹ­'ã­tutuk uhowawi ui'e hap ewy e. Yne yne miit'in aru mekewat e'at pe — En ni En yn ni Tupana i'atu'e aru uhepe e Tupana miwan me Isaia 45.23 pe. 12 Mi'i pote torania aito aru wahenoi Tupana pe yne yne ahetiat kat som watunug mesu­wa­rotiat aikotã watoĩ­ne'en mesu­wa­rote wato'e aru Tupana pe. 13 Mi'i pote waku watoiat mekewat aiwa­nẽtup hawiat — Mekewat miit yt naku i ai'e hap. Mi'i hawyi waku wẽtup sehay wato'e aiwa­nẽtup hawe — Yt aho'o­'a­parap teran i irania'in Iesui mohey haria ete e hap waku wato'e aipy'a pe. Waku wato'e aipy'a pe — Yt ati'a­parap teran i wẽtup ok Iesui mohey hap pun hamuat waku wato'e at ka'ap aipy'a pe uheka­tu­wyria.

14 Uito ti eiwy Pauru are. Uito eiperia wywo wẽtup piit ewy yn Iesui piit wo watoĩ­ne'en mesuwat yi tote. Uiwy­ria'in pywo pe ti uiwa­nẽtup hawe mi'u mesu­wa­rote Tupana minug wakuat yne toĩne'en mi'u wo are uipy'a pe uiwepe. Sa'a­wy'i yt atimohey i ma'ato koitywy atimohey kahato. Iesui e hap kaipyi atikuap hawyi. Ma'ato uiwy­ria'in — Yt naku i mekewat mi'u watu'u ewei'e eipy'a pe pote yt ewetu'u tei'o are kat pote ewetu'u hawyi eiwe­mõti hap topy­hu'at. Katu­pono — Atunug yt naku i mi'u atu'u pote ewei'e aru eipy'a pe. Mi'i pote yt ewetu'u tei'o eiwe­mõti popuo. 15 — Pyno waku watu'u yne wato'e pote waku aiwe'eg wo uwe pe mio tã wato'e katu­pono tukup­te'en irania'in Iesui mohey haria yt aiwa­nẽtup hap ewywuaria i kahato i'atueko mi'u etiat mi'i pote — Pãi an waku watu'u yne wato'e i'atue­hamo hawyi i'atu­mohey hap mohit haria wato­py­hu'at i'atu­wa­nẽtup hawe. Po'og waku wato'e — Mehĩ mana yt naku i watu­'uka aheko mi'u ete mi'i pote atu'u teran eimi­ky­'esat ewy mesuwe areĩne'en eiwywo turan waku wato'e. Mi'i hawyi waku watu­we­moe­sy'at i'atueko ewy itote. Tukup­te'en wy yt imohey i te haria. Mi'iria py'a­setpe watoĩ­ne'en turan waku wati­'a­tu­ky'e mi'iria i'atueko mi'u etiat ewywuat nug hap ete watoĩ­ne'en i'atu­wywo turan are. Yt naku i waho­'o­mõ­py­'ahak aimi'u u hap wywo irania'in are. Yt naku i aimi'u wo wati­mõ­py­'ahak irania'in seko wãi'e hap ete katu­pono mi'iria ehakye­ra'at hamo Iesui iku'uro wy. Ma'ato watenuk kahato i'atue­hamo — Yt ewetu'u tei'o mi'i mi'u i'atu'e hap ete pote yt karãpe i ta'a­tu­mohey Iesui hawyi mi'iria ma'at haria wato­py­hu'at katu­pono aimi'u wo wati­'a­tu­mõ­py­'ahak ne'i pote yt waho­'oekyi kuap i mi'iria Iesui kape. 16 Ma'ato irania'in waku watu'u yne i'atu'e. Waku wati­mõ­typot kahato Tupana aimi'u wywo i'atu'e. Waku watu­wehum kahato Tupana kape ahenuk turan i'atu'e. Mi'i hap waku wen ma'ato eiwe'eg wo o uwe pe mio tã ewei'e. Katu­pono kat som waku pe toĩne'en aiwa­nẽtup hawe irania'in me yt naku i topy­hu'at tuereto. Mi'i hawyi aiminug wakuap topy­hu'at yt nakuat i i'atuepe. Mi'i hawyi i'atu­wa­nẽtup hawe yt naku i nug haria wato­py­hu'at yt kat i watunug yt naku i aiwa­nẽtup hawe pytkai. Mi'i pote waku aiwe'eg wo kahato ahehay wywo aiminug wywo katu­pono mi'i hawyi yt i'atue­waure ka'a i ahowawi yt naku i aito i'atu­wa­nẽtup hawe hawyi. 17 Ma'ato pywo pe ti Tupana topy­hu'at Aheha­kye­ra'at hat yt aimi'u u hap kaipyi i yt ahesapo hy u hap kaipyi i. Tupana topy­hu'at Aipo­rekuat no Topã'ãu tutum ahepe hawyi. Ipã'ãu yn ainug kuap to'y­wania ko'i wo. Yt aheko mi'u etiat aheha­kye­ra'at hap. Yt aheko i aimo­hãpyk kuap. Tupana Pã'ãu yn aimo­wepit kuap. Aheko mi'u u hap ete yt aimo­wepit kuap i. Karãpe aiwa­nẽtup hap hewyry kahato kowo­'i­ko­wo'i hawyi Tupana Pã'ãu yn aimo­wepit kuap. Aheko mi'u ete e'at ete wati­'a­tunug yne hawyi yt kat i te aheha­kye­ra'at hap are. Tupana yn aheha­kye­ra'at kuap. 18 Pywo ti rat are'e ehepe — Karãpe wati­'a­tu­ky'e irania'in aipy'a pyi Tupana Pã'ãu mimo­wepit ko'i aito pote mi'i hawyi Tupana mowepit haria wo i'ewyte miit'in mowepit haria wo watu­kup­te'en mesu­wa­rote. 19 Mi'i pote waku watikat kahato mu'ap aiwo­'o­wese hap nug hamo. Waku wato­py­hu'at wo'o­wese haria wo. Waku watikat kahato mu'ap aiwo­'o­mo­poĩ'ãm hamuat are. Waku watikat mu'ap aiwo­'ope aiwo­'o­moe­saika Iesui ehay wo imohey po'og hamuat hap ete. 20 Pyno Tupana wanẽtup hawe waku watu'u yne mi'u ma'ato yt naku i Tupana wanẽtup hawe wato­py­hu'at wu'uka haria aheko mi'u u hap ete. Mi'i tã watunug mote wati­moma aiwo­'o­wese hap aiwo­'ope. Yt naku i watu­'uka ahehay wo aimi'u u hap aheko ete. Mi'i tã watunug mote Tupana hũria atu'uka haria wo watoĩ­ne'en hawyi Tupana potpap moma haria wo wato­py­hu'at. Po'og waku watikat kahato aiwo­'o­ky'e hap. Waku wato'e Tupana pe — Uipo­wyro o miit'in ekyi ewawiat hamo mehĩ uipo­wyro kahato o katu­pono yt ati'a­tu­sytpok teran i emohey haria uheko mi'u u hamo waku wato'e Tupana pe. 21 Pyno kat som kat som waku i'atu­wywuat aheĩne'en turan waku watunug. Waku watikuap irania'in eko ko'i hawyi waku iwe'eg nakaria wo watoĩ­ne'en. I'atu­mi'u hap ewy waku watu'u i'atue­hamo. Waku watu'u i'atu­mi'u ipu'i u hap ewy i'atu­wywo watoĩ­ne'en nuran. Yt naku i wati­'a­tu­'a­parap ne'i irania'in Iesui mohey haria yt i'atueko ewywuat i watunug hap kaipyi. — Wãi i'atu'e mahy u hap ete pote waku yt watu'u i. Mi'i pote waku — Yt naku i watu'u mekewat mi'u pu'i i'atu'e pote — Pyno waku wato'e. Yt naku i wati­'a­tu­'a­parap ne'i irania'in aiminug ko'i wo. 22 Waku watikuap kahato aipy'a pe kat som waku watunug kat som yt naku i watunug Tupana e hap mi'i hawyi waku watunug aimi­mohey ewy. Waku watikuap kat som wato­mohey mi'u ete sapo hy u ete e'at hap ete mi'i hawyi waku yt wahenoi i irania'in me mi'i hap ko'i kaipywiat imohey hap ete. Waku wahenoi Tupana kape yn kat som wato­mohey mi'i ete hap ma'ato aiwa­nẽtup hap to'e — Yt naku i mi'i tã etunug e pote yt etunug nei'o mekewat epy'a piat. Ma'ato watunug mekewat wãi'e aipy'a piat hap pote aiwe­mõti kahato hap topy­hu'at. Aipy'a piat haty hap toĩne'en — Yt naku i nug hat uito wato'e aiwepe. 23 Ma'ato irania'in aito Iesui mohey haria haty kahato topy­hu'at aipy'a pe watu'u kat ko'i kat ko'i hawyi. Watu­we­mõti ne'i aipy'a pe katu­pono aheko yt ewy i watunug mote. Mi'i pote yt watu­wehum kuap i Tupana kape watu'u turan yt imohey hap upi i watu'u pote. Mi'i pote waku watoiat mekewat aiminug sa'ag ko'i yne yt watu­wehum kuap i Tupana kape hap watunug nuran mote are. Yt Iesui mohey hap wywo i watunug aiminug ko'i hawyi wati­'a­parap Tupana pe yt wati­mõ­typot i Tupana aiminug wywo pote are uito Pauru.