Amos
1
Iyan heini menge lalag ni Amos he tig-Tekoa he perevantey te menge kerehidu. Heini he menge lalag, ne mehitenged te Israel. Impezayag heini te Megbevayà diyà te kandin hein dezuwa pa he tuig human egkehitavù is linug, hein timpu he si Uzia iyan hadì diyà te Juda ne si Jeroboam he anak ni Joash iyan hadì diyà te Israel. Migkaǥi si Amos te, “Edhiniǥer is Nengazen he ebpuun te Zion; edraǥeb is laǥeng din puun te Jerusalem. Ne tenged kayi nengeǥangu is menge pepenebtavà te menge vantey te menge kerehidu ragkes en is menge pinemula ziyà te puntur te Buntud he Carmel.”
Is Silut diyà te Nasyun he Siria
Iyan heini migkaǥi te Nengazen mehitenged te Siria: “Tenged te kedtulung kebaal te salà te menge tig-Damascus, edsilutan ku sikandan. Su midsurung dan is menge tig-Gilead he henduen be te midlepiǥis dan te putew. Umbe, ebinsulan ku is turuǥan ni hadì Hazael wey is melig-en he menge vahin te Damascus he mibpeveelan te anak din he si Ben Hadad. Ebengkaǥen ku is pultahan te Damascus wey edezeetan ku is menge pengulu ziyà te Suǥud te Aven wey Bet Eden. Ebihaǥen te menge tig-Kir is menge etew ziyà te Aram. Iyan a, is Nengazen, is migkaǥi kayi.”
Is Silut diyà te Nasyun he Filistia
Iyan heini migkaǥi te Nengazen mehitenged te Filistia: “Tenged te kedtulung kebaal te salà te menge tig-Gaza, edsilutan ku sikandan. Su zuen menge inged he mibihag dan is tivuuk he menge meǥinged dutun ne imbelegyà dan he menge uripen diyà te Edom. Umbe, ebinsulan ku is menge verengbeng diyà te Gaza wey is melig-en he menge vahin kayi he inged. Edezeetan ku is menge pengulu ziyà te Ashdod wey Ashkelon, ne edsilutan ku is menge tig-Ekron. Is menge Filistihanen he ebpekepelaǥuy te silut, ebpematey zaan. Iyan a, is Nengazen he Megbevayà migkaǥi kayi.”
Is Silut diyà te Nasyun he Tyre
Iyan heini migkaǥi te Nengazen mehitenged te Tyre: “Tenged te kedtulung kebaal te salà te menge tig-Tyre, edsilutan ku sikandan. Su is langun he meǥinged diyà te menge inged, imbelegyè dan he menge uripen diyà te Edom. Ne wazè dan tumana is neuyunan dan kayi te menge etew he emiǥu zan. 10 Umbe, ebinsulan ku is menge verengbeng te Tyre wey is melig-en he menge vahin kayi he inged.”
Is Silut diyà te Nasyun he Edom
11 Iyan heini migkaǥi te Nengazen mehitenged te Edom: “Tenged te kedtulung kebaal te salà te menge tig-Edom, edsilutan ku sikandan. Su mibpendal-as dan is menge kezuzumahi zan he menge Israilihanen ne wazè dan en mehizuwi te ebpenhimatey. Is menge Israilihanen, kenè egkaawà is pauk kandan te menge tig Edom. 12 Umbe, ebinsulan ku is Teman wey is melig-en he menge vahin te Bozra.”
Is Silut diyà te Nasyun he Ammon
13 Iyan heini migkaǥi te Nengazen mehitenged te Ammon: “Tenged te kedtulung kebaal te salà te menge tig-Ammon, edsilutan ku sikandan. Su midsirian dan is memeǥingey he menge vahi ziyà te Gilead, su wey zan maangken heini he tanà. 14 Umbe, ebinsulan ku is menge verengbeng diyà te Raba wey is melig-en he menge vahin kayi he inged; dutun ebpengulahì te kulehian te kebpekidtebek is menge kuntada zan he edsurung kandan, he edselenuhug heini iring te vagyu. 15 Ne ebihaǥen is hadì diyà te Ammon ragkes is menge upisyal zin. Iyan a, is Nengazen, is migkaǥi kayi.”