10
Is Nelewasan ni Daniel ziyà te Kilid te Wahig he Tigris
1 Dutun te iketelu he tuig te kedhadì ni Cyrus diyà te Persia, duen impetuenan ki Daniel te migngezanan daan ki Belteshazar. Tutuu is impetuenan kandin, ne mehitenged heini te zekelà he tebek ne impelewasan heini kandin wey zin mesavut.
2 Ne iyan heini neulaula sumalà te inseysey ni Daniel:
Dutun he timpu tetelu he simana is kedlalew ku.
3 Wazà a megkaan te metaam he menge keenen etawa usa, wazà a med-inum te vinu, wey wazà ku pehemuti is lawa ku taman te netapus is tetelu he simana.
4 Dutun te ike-24 he andew te nehuna he vulan, diyà a edhithitindeg te kilid te zekelà he Wahig he Tigris.
5 Ne zutun duen neehè ku he henduen be te etew he mibivisti te linu, ne nekeliǥuy ziyà te hawak din is bakes he vulawan.
6 Ne henduen be te mahalen he vatu is lawa zin su ed-ilak-ilak. Ne henduen be te kilat is dagwey zin su egkindab, ne iring te sulù is mata zin su edsiǥa. Is menge velad din wey menge paa zin ne ed-ilak-ilak he henduen be te midlimbasan he brunsi, ne mezaǥing is laǥeng din he henduen be te keǥurub te mahabet he etew.
7 Iyan e zà nekaahà dutun. Is menge zuma ku ne wazè dan haazà maahà, piru migkulbaan sikandan ne nemen-eles dan tenged te kegkahandek dan.
8 Umbe, iyan e zà nesamà he ed-ahà dutun te egkein-inuwan he impaahà. Mibmemeluntak a wey midluyahan.
9 Ne nezineg ku he migkaǥi haazà is etew. Ne zutun te kegkaǥi zin, ne neewaan a te tanud ne nepiley a ziyà te tanà.
10 Migewezan e zin ne mid-enew e zin is egkerkeren is menge vuel wey menge velad ku.
11 Ke sikandin te, “Daniel, mibmahal ka te Megbevayà. Hitindeg ka ne purung ka pemineg te egkeǥiyen ku ziyà te kenikew, su midsuǥù a te Megbevayà kayi te kenikew.” Ne kegkekeǥiya zin dutun ne midhitindeg a is egkerkeren.
12 Ne migkaǥi sikandin te, “Daniel, kenè ka mahandek. Su zuen dà te nehuna he andew te kedhangyù nu he mesavut nu is menge impelewasan kenikew, ne midtavak en te Megbevayà is hangyù nu su wazè ka mebpelavew ziyà te etuvangan din. Umbe midhengkayi a su is kedhengkayi ku iyan paaǥi te kebeǥaya zuen te midhangyù nu.
13 Ne wazà a mekesayu mekeuma zini su mid-alang kedì is mulin-ulin he iyan pengulu te ginhedian he Persia seled te 21 he andew. Meupiya ganì su midtevangan a ni Miguel he sevaha zuen te menge pengulu te menge velinsuǥuen, su sebsevaha ku zà is nekidtebek duen te pengulu te Persia.
14 Ne ǥuntaan, kayi a su wey ku ikepesavut kenikew ke hengkey is egkehitavù te zuma nu he menge Israilihanen te huziyan he timpu, su is kenikew he naahà mehitenged te egkehitavù te huziyan he timpu.”
15 Ne kegkeǥiya zin dutun, midluhud a, ne kenà a ebpekekaǥi.
16 Ne, heini is henduen be te etew, migkevit din is bivig ku ne human a mekekaǥi. Migkeǥiyan ku haazà is edhithitindeg diyà te etuvangan ku te, “Datù, selakew is keǥezamgezam ku wey edluyahan a tenged duen te nelewasan ku.
17 Ebmenumenu a he ebpekidlalag kenikew te wazè ku en desen wey hapit e en kenà ebpekeǥehinawa?”
18 Umbe, mid-umanan a zin kevita ne midlikù is desen ku.
19 Migkaǥi sikandin kayi te kedì te, “Sikew is mibmahal te Megbevayà, kenè ka mahandek wey meipeng. Pekezesen ka.” Ne kegkekeǥiya zin dutun kayi te kedì ne mibmezesen a. Ne zutun migkaǥi a te, “Datù, ipelaus nu en is menge lalag nu su midteǥuan ad kenikew te zesen.”
20 Ne midtavak sikandin te, “Kinahanglan he edlikù a te kebpekidtebek duen te pengulu te Persia. Kegenat ku puun te kebpekidtebek ku, ne ebpekeume en daan is pengulu te Grecia he elin ebpekidtebek kedì. Piru netuenan nu ve ke maan is midhengkayi a te kenikew?
21 Midhengkayi a su wey ku ikeseysey ziyà te kenikew is ingkesurat diyà te Libru he Midsuratan te Tutuu. Dutun te kebpekidtebek ku, ne wazà duma he nekeuǥup kedì, kekenà, iyan dà si Micael he pengulu te Israel.