12
Is Pahayag Mehitenged te Ketepusan he Timpu
1 Ne migkaǥi pa sikan is henduen be te etew te, “Dutun he timpu, ebpeseǥazan ni Micael te menge etew is silut su insuǥù heini kandin te Megbevayà. Si Micael iyan sikan is lavew he pengulu he edlavan te menge zuma nu he menge Israilihanen. Utew mereǥen is kebpekesavuk te menge etew zutun he timpu, ne heeyan he kemeresayan wazè pa keenu mehitavù puun te kegkepuun kegketukud te menge nasyun. Piru edlibriyen puun keniyan te kemeresayan is menge zuma nu he menge Israilihanen he nekesurat is menge ngazan dan diyà te libru he midlistahan te menge etew he zuen dan untung he wazà pidtemanan.
2 Ebenhawen is mahabet he nemematey. Is duma kandan ebpekaangken te untung he wazà pidtemanan, piru is duma edrewakan wey ebpeel-elezan te wazà pidtemanan.
3 Sikan is nemekesavut te tutuu wey nenurù te menge etew mehitenged te kedtinazeng ne egkeiring te menge vituen diyà te langit su edsiǥa te wazà pidtemanan.
4 Piru sikew, Daniel, isira nu zà dèpa heini is libru, wey kenè nu en dèpa tudtula is menge lalag kayi taman te egkeuma is ketepusan. Dutun te kenè pa heini ibpahayag ne mezakel is egkesuat he mesavut dan is egkengehitavù.”
5 Hein nekepasad sikandin he egkaǥi, duen ku pa naahà he dezuwa he etew he ebpemenhithitindeg diyà te pesikilizà duen te wahig.
6-7 Ne mid-insaan te sevaha kandan is etew he mibivisti te linu he edhithitindeg he ed-untud diyà te zivavew zutun te wahig te, “Sengemenu keluǥayad human egketapus heini is mekehandekhandek he menge hitavù?”
Ne imbayew zutun te etew he mibivisti te linu is dezuwa he menge velad din ne nezineg ku sikandin he ebpetistiǥusan din te Megbevayà he uuyag te wazà pidtemanan is menge lalag din. Ke sikandin te, “Egketapus heeyan emun edlavey en is tetelu he tuig wey tengà, ke egkepasad en is kebpeentusa te menge etew te Megbevayà.”
8 Wazè ku mesavut haazà is tavak din. Umbe migkaǥi a ziyà te kandin te, “Datù, hengkey is egkehimu he rimeǥas keniyan he menge hitavù?”
9 Ne midtavak sikandin te, “Daniel, taǥad ke zà, su is tavak te insè nu ne id-eles pa heini ne kenà ereg he edtudtulen taman te kegkeuma te ketepusan.
10 Mezakel is nekesavut te tutuu he edlumpiyuwan sikandan, ne egkesavut dan is mibpengaǥi ku. Piru is menge lalung ebpedayun te kebaal te kelelalung, ne kenè dan egkesavut is mibpengaǥi ku.
11 “Edlavey is 1,290 he andew puun te timpu te kebpeengkeza te andew-andew he kebpemuhat wey kedsevuka te utew mezaat he vutang he egkehimu he hinungdan te kebey-ani zutun te valey te Nengazen taman te kegkeuma te ketepusan.
12 Utew zeyzey is edtaǥad wey kemulu pa taman te kedlavey te 1,335 he andew.
13 “Ne sikew Daniel, leusa nu is menge vaal nu. Ebpatey ka piru ebenhawen ka te ketepusan he menge andew su para mezawat nu is bales te menge vaal nu he inteǥana para kenikew.”