15
Is Ked-ewaa te Utang
1 “Ketepusan te kada ikepitu he tuig, kinahanglan he kenè niw en edsukuten is langun he utang diyà te keniyu.
2 Iyan heini veeli niw: kinahanglan he kenè en edsukuten te mibpeutang is utang te zuma zin he Israilihanen. Kenè din en edsukuten su neume en is timpu he midtelaan te Nengazen te ked-ewaa te menge utang.
3 Egkehimu ke edsukutan niw is kenà menge Israilihanen, piru kinahanglan he kenè niw en mulà edsukutan is duma niw he Israilihanen.
4 “Ereg he wazà pubri keniyu, su edtuvazan kew te Nengazen he Megbevayè niw zuen te tanà he ibeǥey zin keniyu wey niw maangken.
5 Iyan heeyan egkeulaula emun ebpezumdumahan niw is Nengazen he Megbevayè niw wey ebpurungan niw edsunuza is langun he menge suǥù he ibeǥey ku keniyu ǥuntaan.
6 Edtuvazan kew te Nengazen he Megbevayè niw sumalà te impenaad din keniyu. Mahabet he menge nasyun is ebpekepenambey ziyà te keniyu ne kenè kew mulà ebpekepenambey. Iyan kew edumala te zuma he menge nasyun ne kenè dan mulà ebpekezumala keniyu.
7 “Emun duen pubri ziyà te inged niw, zutun te tanà he ibeǥey keniyu te Nengazen he Megbevayè niw, kenè kew peleleǥed kandan.
8 Kekenà, tulengezi niw sikandan ne ipesambey niw sikandan te menge kinahanglan dan.
9 Kenè kew med-isip te selakew, kenè niw isipa he tenged te hapit en egkeuma is ikepitu he tuig, he iyan kes tuig he kenè en edsukuten is utang ne kenè kew en ebpeutang te pubri he zuma niw he meǥinged. Su emun edangep heini is pubri ziyà te Nengazen tenged te kebeeli niw zutun ne zuen niw televaken.
10 Kinahanglan he ebpuun te keputian te atey niw is kebeǥayi niw kandin. Emun ed-ul-ulahan niw heini ne edtuvazan kew te Nengazen he Megbevayè niw ziyà te langun he menge vaal niw.
11 Siguradu zuen menge pubri ziyà te nasyun niw, umbe ebmenduan ku sikiyu te kebeǥey kandan he ebpuun diyà te keputian te atey niw.
Is Ed-ul-ulahan ziyà te menge Uripen
(Exodus 21:1-11)
12 “Emun duen duma nu he Hebriyuhanen, maama man etawa vahi, he ebpeuripen kenikew, ne ebpekepenilbi en sikandin kenikew seled te heenem he tuig, ne zutun te ikepitu he tuig kinahanglan he ipeǥawas nu en sikandin te kegkeuripena nu kandin.
13 Ne emun ibpeǥawas nu en sikandin, ne kenè nu sikandin ipeǥenat he wazè din uwiten.
14 Tulengezi nu sikandin, beǥayi nu te menge uyaǥen, trigu, wey vinu, sumalà is kedtuvazi kenikew te Nengazen he Megbevayè nu.
15 Tentenuzi niw he menge uripen kew zengan diyà te Ehipto ne impeǥawas kew te Nengazen he Megbevayè niw. Iyan heeyan hinungdan ke maan is ibeǥey ku heini keniyu he suǥù guntaan.
16 “Piru emun egkaǥi haazà is uripen nu te, ‘Kenà a ed-awà diyà te kenikew su pelanggè ku sikew wey is pemilya nu, wey meupiya is kebpekesavuk ku ziyà te kenikew,’
17 ne zumaha nu sikandin diyà te ǥemawan te valey nu ne tinlangi nu is telinga zin ne zutun egkehimu en sikandin he uripen nu seled te tivuuk he untung din. Ne iring ded daan kayi is beeli nu ziyà te vahi he uripen nu.
18 “Kenè ka mebpengenuǥun emun ibpeǥawas nu en is uripen nu su is neǥastu nu kandin dutun te kebpenilbi zin kenikew seled te heenem he tuig, ne egketakep heeyan emun terebahanti is edsuhulan nu. Emun ed-ul-ulahan nu heini edtuvazan te Nengazen he Megbevayè nu is langun he menge vaal nu.
Is Kinekekayan he menge Uyaǥen
19 “Isivey niw he para te Nengazen he Megbevayè niw is kinekekayan he meemahan te menge uyaǥen niw. Kenè niw iterebahu is kinekekayan te menge vaka niw wey kenè niw eluti is kinekekayan te menge kerehidu niw.
20 Kekenà, keena niw heini zuma te pemilya niw ziyà te etuvangan te Nengazen he Megbevayè niw zuen te lugar he ebpilien din. Iyan heeyan beeli niw kada tuig.
21 Piru emun duen sazir zutun he uyaǥen, emun penenglitan piang etawa bulag etawa zuma he sazir, ne kinahanglan he kenè niw heini ipemuhat diyà te Nengazen he Megbevayè niw.
22 Kekenà, keena niw heini ziyà te menge inged niw. Ebpekekaan kayi is langun, ed-isipen man sikandin he neremerikan etawa lumpiyu, iring te kegkeena niw te selazeng etawa gasila.
23 Iyan, kinahanglan he kenè niw egkeenen is lengesa, iitis niw heini ziyà te tanà iring te wahig.