29
1 Iyan heini kedseysaya te kedtumana te kebpekid-uyun he insuǥù te Nengazen diyà te ki Moises he imbeǥey ziyà te menge Israilihanen hein diyè dan te Moab. Ne ebpekeuman heini zuen te kebpekid-uyun din he midhimu zin diyà te kandan hein diyè dan te Horeb.
Insublì ni Moises is Kebpekid-uyun
2 Impetawag ni Moises is langun he menge Israilihanen ne migkeǥiyan din te, “Nemetmetahan niw is mibeelan te Nengazen diyà te hadì te Ehipto wey te langun he menge upisyal zin wey pehendiyà en te nesakup te tivuuk he nasyun.
3 Neehè niw is dekelà he menge penggezam, wey egkengein-inuwan he menge vaal.
4 Piru taman en guntaan wazè pa pengelinteuwi te Nengazen he mesavut niw is neehè niw wey nezineg niw.
5 Seled te 40 he tuig te kebpenguluwi ku keniyu ziyà te sibsivayan, wazà mezaan is menge visti niw wey menge sandalyas niw.
6 Wazè niw egkekaan dutun, wazè niw vinu etawa zuma he inumen, piru imbeǥey haazà te Nengazen diyà te keniyu su para metueni niw he iyan sikandin Nengazen he Megbevayè niw.
7 “Hein kebpekeuma tew kayi he lugar, mibpekidtebek kenitew si Hadì Sihon he hadì te Heshbon wey si Hadì Og he hadì te Bashan, piru nezaag tew sikandan.
8 Mid-aǥew tew is tanè dan ne imbeǥey haazà diyà te menge tribu ni Reuben, ni Gad, wey ziyà te ketengà he tribu ni Manase he para egkepengevilin dan.
9 “Umbe purungi niw te edtuman is ibpetuman keniyu kayi te kebpekid-uyun keniyu, su para mebmeuswaǥen kew ziyà te langun he ebeelan niw.
10 Guntaan he andew midhitindeg kew is langun diyà te etuvangan te Nengazen he Megbevayè niw: is menge pengulu te menge tribu niw, is ebpemendumala, is menge upisyal, is langun he menge maama te Israel,
11 is menge esawa niw wey menge anak niw, wey is kenà menge Israilihanen he mid-ubpà duma keniyu he perepengayu niw wey peresekezu.
12 Midhitindeg kew ǥuntaan kayi te kebpekid-uyun te Nengazen he Megbevayè niw. Heini he kebpekid-uyun, ebeelan te Nengazen diyà te keniyu ǥuntaan he andew duma is kepenangdù din,
13 su ibpetuenan din en maan keniyu ǥuntaan he iyan kew menge etew zin ne iyan sikandin Megbevayè niw su iyan heeyan impenaad din diyà te keniyu wey ziyà te menge kepuun niw he si Abraham, si Isaac, wey si Jacob.
14-15 Piru kenè kew iyan dà ibpesunud duen te kebpekid-uyun din is nemenhitindeg kayi ǥuntaan te etuvangan te Nengazen he Megbevayè niw, kekenà, ragkes en minsan is huziyan he kevuwazan niw.
16 “Netuenan niw ke nemenumenu kiw hein diyè kiw pa ed-ubpà te Ehipto wey nemenumenu kiw hein midhipanew kiw ziyà te menge tanà te zuma he menge nasyun pehengkayi.
17 Neehè niw is utew mezaat he menge ed-ezapen dan he kayu, batu, pelata, wey vulawan.
18 Sigureduwa niw he wazà diyà te keniyu maama, bahi, pemilya, etawa tribu he ed-iniyug te Nengazen he Megbevayè tew, ne ed-azap te menge ed-ezapen te menge etew zutun he menge nasyun, para wazà minsan sevaha keniyu he egkeiring te zalid he edtuvù he mepait wey edhilu.
19 Is minsan hentei he nekezineg te menge petizaan pinaaǥi kayi te menge rawak, ne kenè din isipa he kenà sikandin egkemenu ke ebpedayun he ebaal te kandin dà he egkesuatan. Heini he ulaula ebpekeuwit te kezeetan diyà te keniyu te langun.
20 Kenà sikandin ebpeseyluwen te Nengazen. Iring te edriyubriyub he regreg is dekelà he pauk te Nengazen kandin, ne egkehitavù diyà te kandin is langun he menge rawak he ingkesurat kayi te libru, ne id-awà te Nengazen is ngazan din kayi te kelibutan.
21 Idsivey sikandin te Nengazen puun te langun he tribu te Israel, ne edresayen sikandin sumalà te menge rawak kayi te kebpekid-uyun he ingkesurat kayi te Libru te Kesuǥuan.
22 “Is huziyan he menge lapis te menge kevuwazan he menge kevuwazan niw wey menge lumelengyawà he ebpemuun diyà te meziyù he menge lugar, egkeehè dan is rimeǥas te vangkit wey menge zaru he ibpaaǥi te Nengazen diyà te tanè niw.
23 Is tivuuk he tanè niw egkeiring te disirtu he netembunan te esupri wey timus. Wazà ebpemula kayi he tanà su kenà edtuvuan te pinemula. Egkezeetan heini iring te kegkezeeti te Sodom wey Gomora, Adma wey Zeboyim he midezeetan te Nengazen tenged te utew zin kegkepauk.
24 Ne ed-insà is menge etew ziyà te langun he menge nasyun te, ‘Maan is midhimu heeyan te Nengazen diyà te nasyun dan? Maan is utew sikandin nepauk?’
25 “Ne iyan heini tavak: ‘Geina te midsupak kayi he menge etew is midhimu ziyà te kandan he kebpekid-uyun te Nengazen, he Megbevayà te menge kepuun dan, hein impeǥuwà sikandan puun te Ehipto.
26 Mid-azap dan wey nenilbi zan te selakew en he menge ed-ezapen he wazè dan mekilala he imbandu te Nengazen he kenè dan ezapa.
27 Umbe, utew nepeuki te Nengazen is menge etew ziyà te nasyun dan ne impeseǥazan din kandan is langun he menge rawak he ingkesurat kayi he libru.
28 Tenged te zekelà he pauk te Nengazen kandan, midsegseg din sikandan puun te nasyun dan ne impevihag din sikandan te zuma he menge nasyun he zutun sikandan guntaan ebpemen-ubpà.’
29 “Duen menge in-eles he iyan dà netau zuen is Nengazen he Megbevayè tew, piru impahayag din diyà te kenitew is kesuǥuan din ne kinahanglan he edsunuzen tew heini wey te menge kevuwazan tew te taman te taman.