31
Si Josue is Liwan ki Moises
(Menge Numero 27:12-23)
Mibpedayun megkaǥi si Moises diyà te menge Israilihanen. Ke sikandin te, “120 he tuig is keǥurang ku ne kenà ad ebpekehimu he ebpengulu keniyu. Migkaǥi is Nengazen kayi te kedì he kenà a ebpekelayun te Jordan. Iyan mismu is Nengazen he Megbevayè niw edhuna zutun te kedlayun niw. Edezeetan din is menge etew ziyà te menge nasyun dutun ne ed-engkenen niw is menge tanè dan. Si Josue is ebpengulu keniyu te kedlayun su iyan heeyan migkaǥi te Nengazen. Ebeelan te Nengazen kayi he menge nasyun is iring te mibeelan din diyà te ki Sihon wey ki Og te menge hadì te menge Amorihanen, wey is mibeelan din diyà te tanè dan. Ibeǥey sikandan te Nengazen diyà te keniyu, ne kinahanglan he ebeelan niw ziyà te kandan is langun he insuǥù ku keniyu. Mebpekezesen kew wey mebpekevurut kew. Kenè niw sikandan ikahandek su zuma niw is Nengazen he Megbevayè niw; kenè kew zin ed-ewaan wey ed-iniyuǥan.”
Ne mid-umew ni Moises si Josue ne midlelaǥan din diyà te etuvangan te langun he menge Israilihanen te, “Mebpekezesen ka wey mebpekevurut ka, su iyan ka ebpengulu kayi te menge etew te kedhendiyà te tanà he impenangdù te Nengazen he ibeǥey zin diyà te menge kepuun dan, ne kinahanglan he ebehinen nu kandan haazà is tanà he egkepengevilin dan. Egiyahan ka te Nengazen ne eduma sikandin kenikew; kenè ke zin ed-ewaan wey ed-iniyuǥan. Umbe kenè ka mahandek wey mebpekeluya.”
Is Kebesaha te Kesuǥuan
Insurat ni Moises heini he menge suǥù ne imbeǥey zin diyà te menge memumuhat he menge kevuwazan ni Levi, he iyan ed-uwit duen te Kavan te Kebpekid-uyun te Nengazen, wey ziyà te langun he ebpemendumala te Israel. 10 Ne mibmenduan sikandan ni Moises te, “Dutun te kegketapus te kada pitu he tuig he iyan kes tuig te Kebeǥey te Bayàbayà wey Ked-ulì, ne zutun te timpu te Pista te Kebaal te menge Lawig, 11 besaha niw heini he menge suǥù diyà te langun he menge Israilihanen emun edtiǥum en sikandan diyà te etuvangan te Nengazen he Megbevayè niw ziyà te lugar he ebpilien din. 12 Tiǥuma niw is menge etew: menge maama, menge vahi, menge vatà, wey is kenà menge Israilihanen he zuma niw he meǥinged su para mekepemineg sikandan su wey zan mekeistudyu te kedtahud te Nengazen he Megbevayè niw ne wey zan mapurungi te edtuman is langun he ibpetuman kayi he menge suǥù. 13 Beeli niw heini su para mekezineg sikan is menge anak niw he wazè pa metau kayi he menge suǥù ne ebpekeistudyu sikandan te kedtahud te Nengazen he Megbevayè niw zutun te ked-ubpè niw zuen te tanà he ed-engkenen niw he ziyà layun te Jordan.”
Midtagnà is Kedsupak te menge Israilihanen
14 Migkaǥi is Nengazen diyà te ki Moises te, “Meǥaan ke en ebpatey; umbe ipetawag nu si Josue ne hendiyè kew te Tulda he Edtelevukaayan su ibpenurù ku kandin dutun is ereg he ebeelan din.” Umbe midhendiyà si Moises wey si Josue te Tulda he Edtelevukaayan.
15 Ne mibpaahà is Nengazen pinaaǥi te ǥapun he henduen be te tukud he ziyà te ǥemawan duen te Tulda. 16 Ne migkaǥi is Nengazen diyà te ki Moises te, “Meǥaan ke en ebpatey ne ebpekaamur ka ziyà te menge kepuun nu. Emun wazè ke en, ne heini he menge etew ed-azap te zuma he menge ed-ezapen he ed-ezapen te menge etew ziyà te tanà he ebpeveyaan dan. Ed-iniyuǥan e zan ne edrepasen dan is kebpekid-uyun ku kandan. 17 Dutun he andew egkepeukan ku sikandan ne ed-engkezan ku sikandan. Ed-iniyuǥan ku sikandan ne egkengezeetan dan. Mahabet he menge kemeresayan wey menge kemereǥenan he ebpekeuma ziyà te kandan, ne zutun he timpu ebpekeinsè sikandan te, ‘Iyan be ingkeul-ulaha te menge kemereǥenan diyà te kenitew is tenged te wazè en mebpekiduma kenitew is Megbevayà?’ 18 Dutun he timpu ed-iniyuǥan ku sikandan tenged te langun he mezaat he menge vaal zan pinaaǥi te ked-azap dan te zuma he menge ed-ezapen.
19 “Umbe isurat nu heini he kanta ne ipenurù nu ziyà te menge Israilihanen. Ipekanta nu heini kandan su para mehimu heini he tistiǥus ku kuntra kandan. 20 Ed-uwiten ku sikandan diyà te meupiya wey selebpeten he tanà he impenangdù ku he ibeǥey ziyà te menge kepuun dan. Ed-ubpà sikandan dutun he meuswaǥen; ebpekekaan sikandan te langun he keenen he egkesuatan dan, ne egkengahantey sikandan. Piru ed-iniyuǥan e zan ne ed-azap sikandan te selakew en he menge ed-ezapen. Edrepasen dan is kebpekid-uyun ku kandan. 21 Emun ebpekeume en diyà te kandan is mahabet he menge kemeresayan wey menge kemereǥenan, heini he kanta egkehimu he tistiǥus kuntra kandan, su kenà heini egkelipatan te menge kevuwazan dan. Netuenan ku en is ebpelenuwan dan te ebaal minsan wazè ku pa sikandan meuwit duen te tanà he impenangdù ku he ibeǥey ku kandan.” 22 Dutun he andew insurat ni Moises haazà is kanta ne impenurù din te menge Israilihanen.
23 Ne mibmenduan te Nengazen si Josue he anak ni Nun te: “Mebpekezesen ka wey mebpekevurut ka, su iyan ka ed-uwit te menge Israilihanen diyà te tanà he impenangdù ku kandan, ne eduma a kenikew.”
24 Ne hein nepasad ni Moises is kedsurat duen te langun he menge suǥù diyà te libru, 25 ne mibmenduan din is menge Levihanen he iyan kes ed-uwit duen te Kavan te Kebpekid-uyun te Nengazen. Migkaǥi sikandin te, 26 “Kuwaa niw heini is Libru te Kesuǥuan ne isavuk niw ziyà te avey te Kavan te Kebpekid-uyun te Nengazen he Megbevayè niw. Ne kenà heini id-awà dutun su tistiǥus heini kuntra te menge etew te Israel. 27 Su netuenan ku ke sengemenu is kebpekidsukulè niw wey kebmesinupaken niw. Minsan guntaan te zume e pa keniyu, ebpekidsukulè kew en te Nengazen, ne lavew en ke ebpatey ad! 28 Tiǥuma niw ziyà te etuvangan ku is langun he ebpemendumala te menge tribu niw wey is langun he menge upisyal su wey ku mekaǥi ziyà te kandan heini. Ne ebpengum-umawen ku is langit wey is tanà su ibpetistiǥus ku kuntra kandan. 29 Su netuenan ku he emun ebpatey ad, ne ebaal kew te mezaat ne edsuwayan niw is langun he idsuǥù ku keniyu. Dutun te huziyan he timpu ebpekeuma ziyà te keniyu is menge kemeresayan su ebaal kew te mezaat is ked-isipa te Nengazen duen ne edhimuwen niw he mepauk sikandin pinaaǥi te vaal niw.”
Is Kanta ni Moises
30 Ne zutun migkaǥi ni Moises is langun he menge lalag duen te tivuuk he kanta ne nemineg kandin is tivuuk he keet-etawan te Israel.