5
Kenè Nu Degdeǥusuwi is Kebpenaad Nu te Megbevayà
1 Kinahanglan he ebpekeventayan nu is ed-ul-ulahan nu ke edhendiyè ka te valey te Megbevayà. Meupiya pa ke egkezumahan te kebmetinumanen is ked-uvey nu zutun, kenà te ebpemuhat ke zà te iring te kebpemuhat te menge tulebung he wazà mesayud he sayep is baal zan.
2 Kenè nu zegdeǥusuwi is egkeǥiyen nu. Kinahanglan he ebpurung ka ed-isip-isip ne human ka ebpenaad diyà te Megbevayà. Tentenuzi nu he ziyà te langit is Megbevayà ne sikew kayi ke zà te tanà, umbe kenè ka mebpetakè dà megkaǥi.
3 Su iring te melemu ke zà ebpeketeǥeinep emun egketulung ka egkeseeng, ne melemu ke zà daan ebpekekaǥi te tinulebung emun ebpetakè ka egkaǥi.
4 Emun duen ibpenaad nu ziyà te Megbevayà, ne kenè nu pekeuǥeta is kedtumana nu zutun. Tumana nu is penaad nu kandin su kenè din igkesuat is menge tulebung he wazà medtuman te menge penaad dan.
5 Meupiya pa nasì ke kenè ke en edsaad emun kenè nu edtumanen is saad nu.
6 Kenè ka mebaal te salà pinaaǥi te kegkaǥi nu, emun ebpekekaǥi ka te sayep ne kenè ka megkaǥi te wazè nu haazà tivevaa, su igkepauk te Megbevayà ke egkeǥiyen nu haazà ne edèdeetan din is hineǥuan nu.
7 Is subra he kebpeneǥeinep wey kegkaǥi ne wazè din pulus. Umbe tehuza nu is Megbevayà.
Wazà Pulus te Ketiǥeyunan
8 Kenè ka meinuinu emun egkeehè nu ziyà te inged niw he edèdaaǥen is menge pubri, ne kenà ibeǥey kandan is hustu he kukuman wey kenà ebeliyen is ketenged dan. Su haazà is upisyal he edlupiglupig kandan edlevanan te upisyal he lavew kandin, ne heini is dezuwa edlevanan te upisyal he lavew pa kandan.
9 Ne ke ebpekevintahà is menge upisyal ne lavew pa he ebpekevintahà is hadì kayi te tanà.
10 Is minsan hentei he mahal ziyà te gehinawa zin is selapì wey is duma pa he ketiǥeyunan ne kenè din haazà igkekuntintu. Ne wazà daan kayi pulus.
11 Emun egkeumanan is ketiǥeyunan ta, ne egkeumanan daan is egastu zutun, ne kenè ta haazà egkepehimulusan.
12 Is terebahanti zà ne meupiya is kedlipezeng din deisey se zekelà is keuyaǥan din, piru is sepian mulà ne kenà meupiya is kedlipezeng din minsan dekelà is ketiǥeyunan din.
13 Duen pa neehè ku kayi te kelibutan he kenà meupiya: Is ketiǥeyunan te sevaha he etew egkehimu he ebpekezezaat kandin
14 etawa egkahanew heini pinaaǥi te kenà meupiya he paaǥi te kebpetiǥeyuna zuen, ne wazè en egkesamà para te menge anak din.
15 Neetew kiw he wazè din uwiten, ne ebpatey kiw zaan he wazè din uwiten. Wazè tew en egkevulug egkeuwit duen te menge hineǥuan tew.
16 Ne kenà heini meupiya! Ebpatey ki he wazè din egkeuwit iring te kegkeetew ta. Hengkey is egkekuwa ta pinaaǥi te kedhaǥù ta he wazè man kayi pulus?
17 Kayi te ked-ubpè ta ne mahabet he menge timpu he zutun edlised ki, egkeseeng ki, egkezeruwan ki, wey egkepauk ki.
18 Umbe, netaǥù kayi te isip ku he is meupiya he ed-ul-ulahan te etew seled kayi te mevavà he untung he imbeǥey kandin te Megbevayà iyan is kegkaan, ked-inum, wey kedlipeylipey pinaaǥi te hineǥuan din kayi te kelibutan, su para man heini kandin.
19 Mibeǥayan te Megbevayà is etew te azen wey zuma pe he menge ketiǥeyunan, ne midtuǥutan din te kebpehimulus kayi, su para mezawat te etew is para kandin ne igkelipey zin is hineǥuan din. Imbeǥey heini kandin te Megbevayà.
20 Is kelipey, imbeǥey te Megbevayà su para kenè utew meseǥipà te etew is kedseengseeng tenged te kevavè dà te untung din.