9
1 Mibpurungan ku is-isipa haazà is langun he egkengeulaula ne netuenan ku he vineyveyaan te Megbevayà is menge vaal te metazeng wey uluwanen he etew. Piru wazà metueni kayi he etew ke gaǥew ve etawa pauk is egkepaabut din.
2 Neked-iring dà is egkepengkusan te minsan hengkey he kelasi te etew–metazeng wey lalung, meupiya wey mezaat, lumpiyu wey meremerik, is ebpemuhat wey kenà ebpemuhat. Neked-iring dà is egkepengkusan te meupiya he etew wey mekesesalà, wey neked-iring dà sikan is nenangdù wey wazà mebpenangdù.
3 Iyan heini edhuna he kenà meupiya te langun he egkengeulaula kayi te kelibutan: neked-iring dà is egkepeveyaan te langun. Ne te kemulu pa uuyag is etew ne iyan ebpeketaǥù te isip din is mezaat wey tinulebung; ne te huziyan he timpu ebpatey sikandin iring te zuma.
4 Is uuyag he asu meupiya pa kenà te minatey he erimaung, is uuyag he etew ne meupiya pa kenà te minatey he etew. Su is menge uuyag ne zuen din pa egkeperateng,
5 ne netuenan din he ebpatey sikandin. Piru is minatey en ne wazè en egketuenan din ne wazè en egkezawat din wey egkelipatan en sikandin.
6 Wazè dan en gaǥew, pauk wey kesina. Ne wazè dan en lavet te langun he egkengehitavù kayi te kelibutan.
7 Megkaan ka wey med-inum ka te vinu he melipayen, su intuǥut heini te Megbevayà.
8 Mebivisti ka te mekempet duma is kebpehemut, he ka và dà egkeǥiya layun ka medlipey.
9 Ikelipey nu is ked-ubpè nu zuma te esawa nu he mibmahal nu. Is tivuuk he untung nu he wazè din pulus he imbeǥey kenikew te Megbevayà kayi te kelibutan ne ikelipey nu. Su iyan heeyan pulus te kedhaǥù nu kayi te kelibutan.
10 Beeli nu is minsan hengkey he ebeelan nu he egkehimu nu, su ziyà te ubpaan te menge minatey, he zutun is egkepengkusan nu, ne wazè en ketau etawa keuluwanen.
11 Duen pa neehè ku kayi te kelibutan: kenà is langun he mezesen he ebpelelaǥuy he ebpekezaag te lumbà, wey kenà is langun mezesen he ebpekezaag te tebek. Kenà is langun he uluwanen he ebpekaahà te igkeuyag-uyag dan, kenà is langun he uluwanen ne edsepian. Su egkeseǥazan te uman sevaha he etew is imbanglis kandin.
12 Ne wazà hanew te etew ke keenu heeyan egkehitavù. Umbe iring is etew te tagbis he nelitag etawa isdà he nepuket; egkebiktima sikandin te mezaat he hitavù he egketik-ew egkeulaula ziyà te kandin.
Is Ketau wey is Ketutulebungi
13 Neehè ku zaan kayi te kelibutan is sevaha he penenglitan te ketau he utew ku nesuati:
14 Duen sevaha he zeisey he inged, ne zeisey zà daan is meǥinged kayi. Ne midlingutan heini te mekeǥeǥehem he hadì duma te menge sundaru zin. Mibaal sikandan te ibpenrudus dan duen te verengbeng, ne midsurung dan haazà is inged.
15 Dutun te inged duen etew he pubri piru uluwanen, he iyan pezem ebpekelibri zutun te inged pinaaǥi te ketau zin. Piru wazà nekeseǥipà kandin.
16 Ne nekekaǥi a te meupiya pa is ketau kenè te zesen, piru is ketau zuen te pubri he etew ne wazà beǥeyi te keveǥat ne wazà midseǥipà te lalag din.
17 Meupiya pa is kebpemineg te menayù he kegkaǥi te uluwanen he etew kenà te kebpemineg te bensaǥen te egalen te menge tulebung.
18 Is ketau meupiya pa kenà te menge ǥumaan te tebek. Piru is mekesasalà ebpekezezaat te mahabet he menge keupiyaanan.