20
Is Mesinupaken he menge Israilihanen
1 Hein ikesepulù he andew te ikelima he vulan, te ikepitu he tuig te kegkevihag dey, duen nepipira he menge pengulu te Israel he midhengkayi te kedì ne mibpinuu ziyà te etuvangan ku su ebpetudtul zan te menge lalag he ebpuun diyà te Nengazen.
2 Migkaǥi is Nengazen kayi te kedì te,
3 “Sikew is etew, keǥiyi nu heeyan is menge pengulu te Israel, he siak, is Nengazen he MEGBEVAYÀ, migkaǥi a te, ‘Midhengkayi kew ve te kebpetudtul kediey te menge lalag ku? Siak, is Nengazen he MEGBEVAYÀ he uuyag, ebpenangdù a he kenè ku edtudtulen is menge lalag ku ziyà te keniyu.’
4 “Sikew is etew, hukumi nu sikandan. Ipetentenuzi nu kandan is utew mezaat he menge vaal he mibeelan te menge kepuun dan.
5 Keǥiyi nu sikandan he siak, is Nengazen he MEGBEVAYÀ, migkaǥi a te, ‘Hein mibpilì ku is Israel he menge kevuwazan ni Jacob, ne mibpekilala a kandan diyà te Ehipto, nenangdù a ziyà te kandan. Ke siak te, “Iyan a Nengazen he Megbevayè niw.”
6 Ne zutun daan he timpu nenangdù a he ibpeǥawas ku sikandan puun te Ehipto ne ed-uwiten ku sikandan diyà te tanà he mibpilì ku para kandan–meupiya wey selebpeten he tanà, kineupiyahan te langun he tanà.
7 Ne migkeǥiyan ku sikandan te, “Iselikwey niw en is utew mezaat he menge ed-ezapen niw. Kenè niw remeriki is keugelingen niw pinaaǥi te ked-azap te menge ed-ezapen diyà te Ehipto, su iyan a, is Nengazen Megbevayè niw.”
8 “ ‘Piru midsupak e zan, ne wazè dan mebpemineg. Wazè dan iselikwey is utew mezaat he menge ed-ezapen diyà te Ehipto. Umbe migkaǥi a te ibpeǥezaman ku kandan is pauk ku zutun te ziyà sikandan te Ehipto.
9 Piru wazè ku heini himuwa, su midlevanan ku is dengeg ku su wey a kenà mependezeisey te menge etew ziyà te menge nasyun he nekeelingkus te Israel su netuenan dan he impahayag ku ziyà te menge Israilihanen he ibpeǥawas ku sikandan puun te Ehipto.
10 Umbe, impeǥawas ku sikandan puun te Ehipto ne mid-uwit ku ziyà te sibsivayan.
11 Ne zutun imbeǥey ku kandan is menge suǥù ku wey menge sulunuzen he ereg he edtumanen dan para mebpedayun is kegkeuyag-uyag dan.
12 Impetuman ku zaan kandan is Andew te Kedhimeley he tuus te paaǥi te kedepitè dey. Ebpetanudtanud heini kandan he iyan a, is Nengazen mibpilì kandan wey zan mehimu he menge etew ku.
13 “ ‘Piru midsupak gihapun kediey is menge etew te Israel te ziyè dan te sibsivayan. Wazè dan tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana zan kayi. Wazè dan daan isipa he segradu is Andew te Kedhimeley he impetuman ku kandan. Umbe migkaǥi a te ibpeǥezaman ku kandan is pauk ku su para mepurung sikandan mezeeti ziyà te sibsivayan.
14 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.
15 Piru nenangdù a ziyà te kandan dutun te sibsivayan he kenè ku sikandan ed-uwiten diyà te tanà he imbeǥey ku kandan, kes tanà he meupiya wey selebpeten, kes kineupiyahan te langun he tanà.
16 Impenangdù ku heini ziyà te kandan su geina te wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Impelavi zan is ked-azap te zuma he menge ed-ezapen dan.
17 “ ‘Piru minsan pa te iyan heini mibeelan dan, nehizuwan ku ǥihapun sikandan, ne wazè ku sikandan purungi zèdeeti ziyà te sibsivayan.
18 Dutun te sibsivayan migkeǥiyan ku is menge anak dan te, “Kenè niw iringi is menge sulunuzen wey menge mibeelan te menge ginikanan niw, ne kenè niw remeriki is keugelingen niw pinaaǥi te ked-azap te zuma he menge ed-ezapen.
19 Iyan a is Nengazen Megbevayè niw. Purungi niw tumana is menge suǥù ku wey menge sulunuzen.
20 Isipa niw he segradu is Andew te Kedhimeley su tuus heini te paaǥi te kedepitè tew, ne ebpetanudtanud heini keniyu he iyan a is Nengazen Megbevayè niw.”
21 “ ‘Piru minsan is menge anak dan midsupak daan kedì. Wazè dan purungi tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana kayi. Ne wazè dan daan isipa he segradu is Andew te Kedhimeley he impetuman ku kandan. Umbe migkaǥi a he ibpeǥezaman ku kandan dutun te sibsivayan is utew ku kegkepauk.
22 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.
23 Piru zutun te sibsivayan nenangdù a ziyà te kandan he ibpeyapat ku sikandan diyà te nekedseselekawà he menge nasyun,
24 su wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Iyan dan hinuun impelavi is ked-azap te menge ed-ezapen te menge kepuun dan.
25 Umbe, mibey-anan ku en sikandan he ebpedayun edtuman te menge suǥù wey menge sulunuzen he kenà meupiya wey kenà ebpekeveǥey kandan te meluǥayad he untung.
26 Mibey-anan ku en daan sikandan duen te kedremeriki zan te keugelingen dan pinaaǥi te kebpemuhata zan te zuma he menge ed-ezapen ragkes en is kebpemuhat dan he iyan dan ibpemuhat is kinekekayan he anak dan he maama. Intuǥut ku heini kandan su wey zan mahandek ne egketuenan dan he iyan a Nengazen.’
27 “Umbe, sikew is etew, keǥiyi nu is menge Israilihanen, he siak, is Nengazen he MEGBEVAYÀ, migkaǥi a te: ‘Is menge kepuun niw mibpedayun is kebpendezeisaya zan wey kedluivi zan kedì.
28 Su hein mid-uwit ku sikandan diyà te tanà he insaad ku he ibeǥey ziyà te kandan, mibpemuhat dan te menge pemuhat, menge veyewà, wey menge inumen diyà te metikang he menge lugar wey ziyà te merapung he menge kayu he egkeehè dan. Umbe utew ku sikandan nepeuki.
29 Mid-insaan ku sikandan te, “Hengkey ves heeyan is metikang he lugar he layun kew ebpehendutun?” ’ (Taman en guntaan is igngazan dan keniyan he lugar ‘simbahan diyà te metikang he lugar’.)
30 “Ne ǥuntaan, keǥiyi nu is menge etew te Israel te siak, is Nengazen he MEGBEVAYÀ, migkaǥi a te, ‘Edremerikan niw ve zaan is keugelingen niw iring te mibeelan te menge kepuun niw, wey ed-azap kew ve zaan te utew mezaat he menge ed-ezapen?
31 Minsan ganì guntaan midremerikan niw en is keugelingen niw pinaaǥi te kebpemuhat diyà te zuma he menge ed-ezapen ragkes en is kebpemuhata niw te menge anak niw he maama pinaaǥi te kedtevuna niw zuen diyà te hapuy. Umbe pemineg kew is menge etew te Israel, siak, is Nengazen he MEGBEVAYÀ he uuyag, he kenà ebpenudtul te menge lalag diyan te keniyu minsan edhangyù kew pa.
32 “ ‘Kenà egkehitavù is egkeisip niw he egkeiring kew te zuma he menge nasyun he is menge etew zuen ed-azap te menge ed-ezapen he ledawan he vatu wey kayu.
33 Siak, is Nengazen he MEGBEVAYÀ he uuyag, ebpenangdù a he edhedian ku sikiyu pinaaǥi te zekelà he ǥehem ku wey pauk ku.
34 Uya, tenged te zekelà he gehem ku wey pauk ku, id-awè ku sikiyu ziyà te nekedseselekawà he menge nasyun he zutun kew mekepeyapat,
35 ne ed-uwiten ku sikiyu ziyà te sibsivayan he ǥaked te menge etew ziyà te menge nasyun. Ne zutun ed-etuvangen ku sikiyu wey edhukuman.
36 Uya, edhukuman ku sikiyu iring te midhukuman ku is menge kepuun niw ziyà te sibsivayan te Ehipto. Iyan a, is Nengazen he MEGBEVAYÀ, is migkaǥi kayi.
37 Idsivey ku is menge lalung keniyu, ne edlig-enan ku is paaǥi ku te kebpekidepità keniyu.
38 Idtapid ku puun keniyu is menge midsupak kedì. Minsan ibpeǥawas ku sikandan puun te nasyun he mibihag kandan, piru kenè dan gihapun ebpekeseled diyà te tanà he Israel. Ne zutun egketuenan niw he iyan a Nengazen.’ ”
39 Migkeǥiyan daan te Nengazen he MEGBEVAYÀ is menge etew te Israel te, “Sigi, pedayun kew en he ebpenilbi te zuma he menge ed-ezapen niw emun kenè kew egkesuat he ebpezumazuma kediey. Piru egkeuma is timpu he kenà ad keniyu egkepeelimungawan pinaaǥi te kebpemuhat niw ziyà te menge ed-ezapen niw.
40 Su ebpekepenilbi kediey is langun he menge etew te Israel ziyà te segradu he vuvungan ku, he iyan kes metikang he vuvungan diyà te Israel. Dutun edewaten ku sikiyu wey ibpepemuhat ku te nekedseselekawà he menge pemuhat wey te ispisyal he menge gasa.
41 Emun egkekuwa ku en sikiyu puun diyà te nekedseselekawà menge nasyun he zutun kew mekepeyapat, edewaten ku sikiyu he iring te pemuhat he veyewà he mehemut. Pinaaǥi kayi te ebeelan ku ziyà te keniyu igkepeehè ku ziyà te keniyu is kegkewaǥas ku egkaahà heini te menge zuma he nasyun.
42 Ne emun egkeuwit ku en sikiyu ziyà te tanà te Israel he insaad ku ziyà te menge kepuun niw, egketuenan niw he iyan a Nengazen.
43 Ne zutun egketenuzan niw is menge vaal niw he nekeremerik keniyu, ne egkesilag kew te keugelingen niw tenged te langun he mezaat he mibeelan niw.
44 He menge etew te Israel, egketuenan niw he iyan a Nengazen, emun ebpurungan ku sikiyu para te zengeg ku minsan mezaat wey meremerik is menge vaal niw. Iyan a, is Nengazen he MEGBEVAYÀ, is migkaǥi kayi.”
Is Lalag te Megbevayà he Ebpekesuǥat diyà te Zivavà
45 Migkaǥi is Nengazen kayi te kedì te,
46 “Sikew is etew, sinaru ka ziyà te zivavà, kaǥi ka te ebpekesuǥat keniyan te ketelunan.
47 Keǥiyi nu heeyan he lugar he siak, is Nengazen he MEGBEVAYÀ, edretem a te hapuy he ebpekevinsul te menge kayu keniyan, neǥangu etawa wazà. Kenà egkeevukan heini is edriyubriyub he hapuy. Egkevinsulan kayi is langun puun te zivavà pehendiyà te zizaya.
48 Egkaahà te langun he iyan a, is Nengazen, midretem kayi, ne kenà heini egkeevukan.”
49 Ne migkaǥi a te, “He Nengazen he MEGBEVAYÀ, egkaǥi is menge etew te sempitè dà is ebpengeǥiyen ku.”