41
1 Ne miduma a zuen te etew ziyà te Segradu he Lugar zuen te valey te Nengazen. Ne midsukud din is nekedtimbang he verengbeng te veyeey zutun te Segradu he Lugar, ne is kada verengbeng sepulù he ǥiek is keluǥayad din.
2 Ne walu he ǥiek is kekepal zin. Is keluag dutun te veyeey 17 he ǥiek. Midsukud din daan sikan is Segradu he Lugar, ne 68 he ǥiek is keluǥayad din ne 34 he ǥiek is keluag din.
3 Ne midseled sikan is etew ziyà te Utew Segradu he Lugar. Midsukud din is nekedtimbang he verengbeng te veyeey zuen te Utew Segradu he Lugar, ne is kada verengbeng 12 he ǥiek is keluag din ne tetelu he ǥiek is kekepal zin. Ne is keluǥayad te veyeey zutun ne sepulù he ǥiek.
4 Midsukud din sikan is Utew Segradu he Lugar, ne 34 he ǥiek kuwedradu. Ne migkaǥi haazà is etew kayi te kedì te, “Iyan heini Utew Segradu he Lugar.”
5 Ne midsukud duen te etew is berengbeng duen te valey te Nengazen, ne sepulù he ǥiek is kekepal kayi. Kayi te verengbeng duen nekelinya he menge ruǥu he pitu he ǥiek is keluǥayad din.
6 Heini he menge ruǥu tetelu he endana, ne is kada endana 30 he ruǥu. Is berengbeng duen te valey te Nengazen, nekeiseg-iseg is kenipis din diyà te kada endana su wey mekeuntud is menge ruǥu zutun te verengbeng he kenè en kinahanglan is menge sintas.
7 Heini he menge ruǥu is nekeliǥuy zuen te valey te Nengazen, nekeiseg-iseg is keluag dan puun te egkehuna he endana pehendiyà te iketelu he endana. Duen kayi heǥezan he ebpuun te egkehuna he endana pehendiyà te ikezuwa he endana taman te iketelu he endana.
8 Neehè ku he haazà is baley te Nengazen nevangun diyà te metikang he lugar he sepulù he ǥiek is ketikang din, ne iyan heini nehimu he pundasyun duen te menge ruǥu ziyà te kilid.
9 Is diyà te ǥawas he verengbeng duen te menge ruǥu ne walu he ǥiek is kekepal zin. Duen bekanti he lugar ziyà te teliwazà kayi te menge ruǥu
10 wey ziyà te sevaha pa he vilding he pudu zaan ruǥu. Is keluag kayi te vekanti he lugar 34 he ǥiek, ne nekeliǥuy heini zuen te valey te Nengazen.
11 Duen dezuwa he ǥemawan he para te kedseled dutun te valey te Nengazen. Heini he menge ǥemawan, ebpekesinaru zuen te vekanti he lugar; is sevaha, ne ziyà dapit te edsilaan ne is sevaha, ziyà dapit te zivavà. Diyà te avey zuen te bekanti he lugar zuen beyeey he is keluǥayad din, walu he ǥiek peliǥuy.
12 Duen neehè ku he sevaha he vilding he ebpekesinaru zuen te seled he lama zuen te valey te Nengazen. Is keluag kayi, 118 he ǥiek ne is keluǥayad din 150 he ǥiek. Ne is kekepal te verengbeng kayi, walu he ǥiek.
13 Ne midsukud duen te etew sikan is baley te Nengazen, ne 170 he ǥiek is keluǥayad kayi. Is keziyù puun te egkeiniyuǥan duen te valey te Nengazen pehendiyà te zivaluy he verengbeng duen te bilding he zapit te edsenlepan, 170 he ǥiek.
14 Is keluǥayad te seled he lama he zapit te edsilaan, he egkesineruwan duen te valey te Nengazen, ne 170 zaan he ǥiek.
15 Ne midsukud daan duen te etew is keluǥayad duen te bilding he zapit te zivavà, he ebpekesinaru zuen te seled he lama he egkeiniyuǥan te valey te Nengazen, ragkes is menge verengbeng kayi ziyà te kada kilid, ne 170 zaan he ǥiek. Is Segradu he Lugar, is Utew Segradu he Lugar, wey is barkun te valey te Nengazen,
16 ne mibpekeplaan te tabla, ragkes is peliǥuy zuen te zezeisey he menge sulawà. Is tetelu he ruǥu ziyà te pesiziveluyà he kilid te veyeey, mibpekeplaan daan te tabla puun te saag pehendiyà te sulawà. Heini he menge sulawà egkehimu he edlekevan.
17 Is elavat he ziyà te zivavew zuen te ǥemawan he para te kedseled duen te Utew Segradu he Lugar, mibpekeplaan daan te tabla. Is tivuuk he elavat diyà te seled te valey te Nengazen,
18 ne mideyzeyanan te menge palma wey te menge kirubin he zezuwa is dagwey.
19 Is sevaha he zagwey zutun te kirubin, ne zagwey te etew, ne edsinaru heini te palma. Ne is sevaha pa he zagwey zutun te kirubin, ne zagwey te erimaung ne edsinaru heini ziyà te palma he ziyà te zivaluy. Heini he menge zayandayan, in-ukir zuen te tivuuk he elavat duen te valey te Nengazen
20 puun te saag taman te zivavew, ragkes en is dapit te ǥawas he elavat duen te Segradu he Lugar.
21 Kuwadradu is menge marku zuen te ǥemawan duen te Segradu he Lugar. He ziyà ebpekesinaru te Utew Segradu he Lugar he zuen duen henduen be te
22 pemuhatà he kayu he tetelu he ǥiek kuwedradu wey lelima he ǥiek is ketikang din. Is menge suyuk kayi, pundasyun, wey menge kilid pudu kayu. Ne migkaǥi sikan is etew kayi te kedì te, “Iyan heini lemisahan diyà te etuvangan te Nengazen.”
23 Sikan is Segradu he Lugar wey is Utew Segradu he Lugar, ne tig-dezuwa is lekeb.
24 Is kada lekeb, dezuwa he vahin ne egkehimu he edlumlumpien.
25 Is menge lekeb te Segradu he Lugar mideyzeyanan te menge kirubin wey menge palma he in-ukir iring te ziyà te menge elavat. Ne is barkun kayi ne mid-etepan te kayu.
26 Is diyà te kada kilid te varkun duen kayi dezeisey he menge sulawà he mideyzeyanan te menge palma is avey kayi. Is menge ruǥu ziyà te nekeliǥuy zuen te valey te Nengazen mid-etepan daan.