3
Is Kebeeli te Beǥu he Pemuhatà
1 Ne hein neume en is pitu he vulan te ked-ubpà te menge Israilihanen diyà te menge inged dan, midtiǥum sikandan is langun diyà te Jerusalem he zuen dan kegkesevaha.
2 Ne mid-umanan dan beeli is pemuhatà he para te Megbevayà te Israel su wey mepemuhati heini te menge pemuhat he edtutungen, sumalà te ingkesurat diyà te Kesuǥuan ni Moises he suluǥuen din. Is mibaal kayi iyan ensi Jeshua he anak ni Jozadak wey is duma zin he menge memumuhat, wey si Zerubabel he anak ni Shealtiel wey is menge kezuzumahi zin.
3 Minsan nahandek dan te menge etew he zaan he nemen-ubpà dutun te tanà, mibangun dan is pemuhatà diyà te nehuna he mibengunan kayi. Ne nemuhat sikandan te menge pemuhat he edtutungen meselem wey mezukilem.
4 Midsilibra zan daan is Pista te Kebaal te menge Lawig sumalà te ingkesurat diyà te Kesuǥuan ni Moises. Ne nemuhat dan te menge pemuhat he edtutungen he kinahanglan he ibpemuhat kada andew kayi he pista.
5 Kenà ragkes kayi is menge pemuhat he edtutungen he ibpemuhat dan te meselem wey mahapun, ebpemuhat daan sikandan te menge pemuhat te kada Pista te Kebpuun te Hayag wey te zuma pa he menge pista te ked-azap te Nengazen. Ebpemuhaten dan daan is Nengazen te menge pemuhat he keugelingen he suat is kebeeli zuen.
6 Minsan wazè pa mepuuni is kebenguna ked-umana zuen te valey te Nengazen, mibpuun en is menge Israilihanen te kebpemuhat te menge pemuhat he edtutungen duen te nehuna he andew te ikepitu he vulan dutun he tuig.
Mid-umanan Benguna is Baley te Nengazen
7 Mibeǥey is menge Israilihanen te selapì he ibayad te menge edsapsap te vatu wey te menge pandey. Mibeǥey zaan sikandan te menge keenen, menge inumen, wey lana he ibayad diyà te menge tig-Sidon wey te menge tig-Tyre para te menge kayu he sidru he ebpuun diyà te Lebanon. Heini he menge kayu, igkarga te varku ne ed-uwiten diyà te Jopa. Intuǥut heini ni Hadì Cyrus he hadì te Persia.
8 Mibpuunan is kebenguna zuen te valey te Nengazen te ikezuwa he vulan te ikezuwa he tuig puun te kebpekeulì te menge Israilihanen diyà te Jerusalem. Mibpeug-uǥupà he edterebahu is langun he mid-ulì diyà te Jerusalem puun te kegkevihag, ragkes en ensi Zerubabel he anak ni Shealtiel, Jeshua he anak ni Jozadak wey is duma zin he menge memumuhat, wey menge Levihanen. Is midseriǥan te kedumala te kebenguna zuen te valey te Nengazen iyan is menge Levihanen he 20 he tuig is keǥurang dan pehendiyà te metikang.
9 Iyan sikandan ensi Jeshua, is menge anak din wey kezuzumahi zin, si Kadmiel wey menge anak din. Menge kevuwazan sikandan ni Juda is langun. Mid-uǥup daan kandan is menge kevuwazan wey menge kezuzumahi ni Henadad he menge Levihanen daan.
10 Hein nepasad en duen te ebpemenerebahu is pundasyun duen te valey te Nengazen, mibpelastar is menge memumuhat su ebpezaǥing dan te menge trumpita. Heini sikandan nekevivisti te visti zan te kegkememumuhat. Mibpelastar zaan is menge Levihanen he menge kevuwazan ni Asaf su edtukar zan te menge simbal su edeliǥen dan is Nengazen sumalà te paaǥi he impenurù kandan ni Hadì David he hadì te Israel.
11 Dutun midalig dan wey mibpeselematan is Nengazen; migkanta zan he edhenduen te, “Meupiya iyan is Nengazen, su is kebmahala zin te Israel ne wazà pidtemanan.” Ne ingkulahì te mezaǥing te langun he menge etew zutun is kedeliǥa zan te Nengazen su ǥeina te nepasad en is pundasyun duen te valey te Nengazen.
12 Mahabet dutun is meǥurang en he menge memumuhat, menge Levihanen, wey menge pengulu te menge pemilya he nekeehè pa zuen te nehuna he valey te Nengazen. Ne utew sikandan nekesineǥew hein neehè dan is pundasyun te veǥu he valey te Nengazen. Piru mahabet he menge etew zutun is nemengulahì tenged te kegkelipey zan.
13 Kenè te en egketuenan is kulahì te egkelipey wey is kulahì te edlelendag su utew en subra is keǥurub te menge etew, ne egkezineg heini ziyà te meziyù.