9
Nemengesawa is menge Israilihanen te Kenà menge Israilihanen
1 Migkaǥi pa si Ezra te: Ne hein neulaula en heini, midhendiyà te kedì is menge pengulu te menge Judio he ke sikandan te, “Mahabet he menge etew te Israel, ragkes en is menge memumuhat wey menge Levihanen, is mid-iring te ulaula te menge etew ziyà te peliǥuy zan. Ebeelan dan is utew mezaat he menge vaal te menge Canaanhen, menge Hitihanen, menge Pirisihanen, menge Jebusihanen, menge Amorihanen, menge Moabitanhen, menge Ehiptohanen, wey menge Amunihanen.
2 Nemengesawa pa ganì sikandan wey is menge anak dan te menge vahi he ebpemuun keniyan he menge etew. Umbe is menge etew he pinilì te Megbevayà nesehuǥan te zuma he menge etew. Ne is menge pengulu tew wey menge upisyal iyan en nengulu te kebaal kayi.”
3 Ne hein nezineg ku heini mibindas ku is kumbalè ku tenged te kegkeseeng ku; migingit ku is bulvul ku wey sumpè ku, ne mibpinuu a is neseeng.
4 Ne mid-amur-amur kayi te kedì is menge etew he nahandek te menge lalag te Megbevayà diyà te menge Israilihanen mehitenged te kegkemesinupaken te zuma zan he menge Israilihanen he nemen-ulì puun te kegkevihag. Mibpinuu e zà is neseeng taman te neuma is uras te mahapun he kebpemuhat.
5 Dutun te kegkeuma keniyan he uras, mid-engked a he edseengseeng. Midluhud a is nevindas is bisti, ne nengemuyù a he ebayew te menge velad ku ziyà te Nengazen he Megbevayè ku.
6 Ke siak te, “Megbevayè ku, utew a neeled. Ebpekezuzungul a tenged te kegkeeled ku su utew zekelà is menge salè dey; henduen be te nelapew key en kayi wey nekeume en diyà te langit.
7 Puun pa te timpu te menge kepuun dey taman en guntaan, ne utew zekelà is salè dey, ne tenged kayi, sikami wey is menge hadì dey wey menge memumuhat layun en edsekupa te menge hadì diyà te zuma he menge nasyun. Mibpenhimetayan dan is duma kenami, ne is duma mibihag dan, mibpenekawan key wey mibpeel-elezan, iring te nehitavù kenami ǥuntaan.
8 “Ne ǥuntaan, seled te mevavà he timpu, nehizuwan key kenikew, Nengazen he Megbevayè dey. Intuǥut nu he zuen nesamà kenami, ne impeubpè key kenikew kayi he lugar he wazà ebpekekaid kenami te menge pinilì nu. Impeperateng key kenikew wey midhimu nu he malù mebmahagkap is elentusen dey tenged te kegkeuripena kenami.
9 Minsan menge uripen key, ne wazè key kenikew vey-ani zutun he kebpekesavuk, kekenà, ibpeehè nu kenami is gaǥew nu pinaaǥi te kebpurungi kenami te hadì te Persia. Mibeelan nu heini su wey key kenikew meveǥayi te veǥu he untung, ne wey zey meuman mevangun is nerundus he valey nu, ne wey key kenikew mepengelangi kayi te Juda wey Jerusalem.
10 “Iyan, guntaan te nekesalè key, Megbevayè dey, henduen be te wazè dey en egkekaǥi. Su mibpekahagkap dey is menge suǥù nu
11 he imbeǥey nu kenami pinaaǥi te menge suluǥuen nu he menge ebpeneuven. Migkaǥi sikandan diyà te kenami he is tanà he zutun key ebpevayà su ed-engkenen dey, meremerik he tanà tenged te kelelalung te menge meǥinged duen. Midremerikan dan is minsan hendei he vahin kayi he tanà pinaaǥi te utew mezaat he menge vaal zan.
12 Migkaǥi zaan is menge ebpeneuven diyà te kenami he kenè key mebpengesawa etawa mebpeesawa kandan, wey kenè dey sikandan ed-uǥupan para med-uswag sikandan, su wey key mebmelig-en wey mebmeuswaǥen, su para kenà maawà heini he keuswagan diyà te menge kevuwazan dey taman te taman.
13 Midsilutan key kenikew, Megbevayè dey, tenged te menge salè dey. Piru is silut nu kenami, kenè en ereg he vayad te salà he nehimu zey, ne intuǥut nu pa he zuen mesamà he uuyag kenami.
14 Piru minsan pa te iyan haazà, mid-umanan dey ǥihapun supaka is menge suǥù nu, wey nengesawa key wey mibpeesawa te menge etew he ebaal te utew mezaat he menge vaal. Kenà duwazuwa he egkepeukan key kenikew ne edezeetan key kenikew taman te wazè en egkesamà kenami.
15 He Nengazen he Megbevayà te Israel, metazeng ka. Su intuǥut nu he zuen nesamà kenami he uuyag taman en guntaan. Idtug-an dey is menge salè dey, su kenè key ebpekehimu he ed-etuvang kenikew tenged kayi.”