2
Midhimu he Rayna si Ester
1 Ne hein malù neuǥet, ne naawà dutun is kegkepauk ni Hadì Ahasuerus, netenuzan din si Bashti wey is mibeelan din. Netenuzan daan ni Hadì Ahasuerus is belaud he midhimu zin kuntra ki Bashti.
2 Umbe, migkaǥi sikan is keugelingen din he menge sineriǥan te, “Mahal he Hadì, maan is kenè ka ebpen-ahà te mekempet wey vetan-en he menge raǥa?
3 Pilì ka te menge upisyal ziyà te kada prubinsya he sakup te ginhedian nu para ebpekepen-ahà te mekempet he menge raǥa wey ed-uwit kandan diyà te ebpeubpaan te menge vahi kayì te miberengbeng he inged te Susa. Ipaatur nu is menge raǥa ki Hegai he upisyal nu he midseriǥan nu te ked-atur te menge vahi ziyà te turuǥan. Ne iyan en sikandin metau he ebeǥey te menge kinehenglanen dan para mebmekempet dan.
4 Ne is egkesuatan nu he raǥa, ne iyan nu iliwan ki Bashti he rayna.” Nesuatan te hadì haazà is migkaǥi ziyà te kandin, umbe mibpezumdumahan din heini.
5 Ne zutun te miberengbeng he inged diyà te Susa, ne zuen Judio he kevuwazan ni Benjamin he iyan ngazan din si Mordecai. Anak sikandin ni Jair he anak ni Shimei te anak ni Kish.
6 Si Mordecai, sevaha te menge nevihag puun te Jerusalem duma ki Hadì Jehoyakin he hadì te Juda, he mibihag ni Hadì Nebucadnezar he hadì te Babilonia.
7 Duen id-aǥew ni Mordecai he utew mezagwey wey mekempet he ed-ahaan is lawa zin. Iyan ngazan din si Hadasa ne egngezanan daan te Ester. Ne hein minatey en is ginikanan ni Ester, mid-elimahan sikandin ni Mordecai ne mid-isip din sikandin he hustu en he anak din.
8 Ne hein nesangyew en is suǥù te hadì mehitenged te kedtiǥuma te mekempet he menge raǥa, ne mezakel he menge raǥa is mid-uwit diyà te turuǥan te hadì diyà te vinerengbeng he inged he Susa. Ne is sevaha kandan iyan si Ester. Ne iyan mid-elima kandan si Hegai, kes midseriǥan he ed-elima te menge vahi zutun te turuǥan.
9 Ne utew nezeliǥi ni Hegai si Ester, ne utew zin midseǥipà. Segugunè din mid-endami te keenen wey menge kinehenglanen para med-iseg is kekempet din. Mibeǥeyan din sikandin te pitu he menge suluǥuen he vahi he ebpuun diyà te turuǥan te hadì. Ne impeubpà ni Hegai sikandin wey haazà is menge suluǥuen diyà te kinemeupiyahan he ruǥu.
10 Ne wazà ipetueni ni Ester he Judio sikandin su imbandu man kandin ni Mordecai haazà.
11 Kada andew edhendiyà si Mordecai te lama zutun te turuǥan he ed-ubpaan te menge vahi su wey zin maahà wey ikesusi ke hengkey en is egkeulaula ziyà ni Ester.
12 Ne is kada sevaha zutun te menge vahi, wey sikandin ibpehendiyà te ki Hadì Ahasuerus emun egketapus en is 12 he vulan te kedhimuwa te menge paaǥi wey med-iseg is kekempet din; seled te heenem he vulan is kedlenahi zin te lawa zin te mira ne heenem daan he vulan is kedsevuki zin te lawa zin te menge pehemut wey minsan hengkey he kelasi he menge ebpekeuman te kekempet din.
13 Ne zutun te kenè pa edhendiyà te hadì is kada sevaha kandan, ebeǥayan sikandan te minsan hengkey he visti wey elahas he egkesuatan dan te edsul-ub dutun te kedhendiyè dan te hadì.
14 Is kada sevaha kandan kinahanglan he mezukilem is kedhendiyè din te hadì ne kegkemeselem dutun ibpeulì sikandin, diyà te turuǥan he mibpeubpaan te menge esawa te hadì. Ne zutun sikandin ed-elimahi te sevaha he kapun he sineriǥan he si Shaashgaz. Si Shaashgaz, insarig kandin dutun te hadì is ked-elima te menge esawa zin. Ne haazà is bahi, kenè en ibpelikù dutun te hadì gawas ke nesuatan sikandin dutun te hadì su ibpetawag din man sikandin.
15-16 Hein ikesepulù he vulan, he iyan kes Tebet, dutun te ikepitu he tuig te kedhadì ni Ahasuerus, ne neuma is penahun te kedhendiyà ni Ester te hedì diyà te turuǥan. Midtuman ni Ester is sambag kandin ni Hegai, kes sineriǥan duen te hadì he ed-elima zuen te menge vahi zutun te turuǥan. Is migkaǥi kandin ni Hegai he ibpevivisti kandin te ebpehendiyà te hadì ne iyan din imbivisti, ne utew sikandin nezeliǥi te langun he nekaahà kandin.
17 Utew nesuati te hadì si Ester lavew zuen te langun he menge vahi he mid-uwit diyà te kandin. Utew zin nesuati sikandin, mibpurungan din utew sikandin. Migkurunahan din sikandin ne midhimu he rayna ilis ki Bashti.
18 Ne midtukud te zekelà he keemuran haazà is hadì su ibpehivantug din si Ester. Mid-imbita zin is langun he menge upisyal zin wey is duma pa he ebpemenilbi kandin. Midhimu zutun te hadì he mahal haazà he andew seled te tivuuk he ginhedian din. Ne mahalen he menge azen is impemeǥey zin diyà te menge etew.
Midlibri ni Mordecai sikan is Hadì
19 Ne hein ikezuwa he kedtiǥum te menge raǥa, ne si Mordecai, sevehe en he upisyal ziyà te turuǥan.
20 Dutun ne wazè pa ipetueni ni Ester he Judio sikandin, sumalà te imbandu kandin ni Mordecai. Edtumanen gihapun ni Ester is migkaǥi kandin ni Mordecai iring te vaal zin hein kemulu pa sikandin ed-elimahi ni Mordecai.
21 Ne zutun te timpu he upisyal en si Mordecai ziyà te turuǥan, utew nepauk is dezuwa he upisyal te hadì he si Bigtana wey si Teresh he iyan bantey te ǥemawan te ruǥu te hadì. Iyan netaǥù diyà te isip dan is edhimetayan dan sikan is hadì.
22 Ne netuenan ni Mordecai is netaǥù diyà te isip dutun te zezuwa ne mibpetuenan din ki Rayna Ester. Ne inlitu haazà ipeseyuzi ni Ester zuen te hadì ne migkaǥi zin he si Mordecai is netau zutun.
23 Impeimbistiga heini te hadì. Ne hein nesusi zin he tutuu iyan heini, impevitey zin si Bigtana wey si Teresh diyà te kayu. Midsuǥù is hadì he isurat heini he neulaula zuen te libru te keguǥuza te ginhedian.