8
Is Suǥù te Hadì para Metevangi is menge Judio
1 Dutun daan he timpu, imbeǥey ni Hadì Ahasuerus diyà te ki Rayna Ester is keǥehem te kebayàbayà te langun he azen ni Haman te kuntada te menge Judio. Ne midtudtul ni Ester is kedepitè dan ki Mordecai, umbe mibpesuǥuan dutun te hadì si Mordecai su wey zan meked-etuvang.
2 Ne zutun te kebpeetuvengè dan, mibpul-ut duen te hadì sikan is sising he para idtuus he midhawì din diyà te ki Haman, ne imbeǥey zin diyà te ki Mordecai. Ne si Ester, imbeǥey zin diyà te ki Mordecai is keǥehem te kebayàbayà te langun he azen ni Haman.
3 Ne mid-uman en maan si Ester medhangyù dutun te hadì te meheǥet he kedhangyù su midlangkeb en sikandin diyà te uvey te paa zutun te hadì is edsineǥew. Midhangyù sikandin he kenè en edleusen is mezaat he pelanu ni Haman he kevuwazan ni Agag, he idezaat din te menge Judio.
4 Ne imbayew zutun te hadì diyà te ki Ester sikan is tuked din he vulawan, ne midhitindeg si Ester ziyà te etuvangan din.
5 Migkaǥi si Ester te, “Emun tutuu he ebpurungan a kenikew, Mahal he Hadì, wey nekepenunuat a kenikew, wey ke hustu ziyà te kenikew: Pevaal ka te velaud he kenè en edleusen edtumana sikan is suǥù ni Haman he anak ni Hamedata he kevuwazan ni Agag. Heini he suǥù impesurat ni Haman, ne egkaǥi te ebpuawen is langun he menge Judio ziyà te minsan hendei he prubinsya he sakup te ginhedian nu.
6 Kenè ku egkaantus he egkeehè ku is kegkeǥerà te menge emurè ku te inged wey menge kezuzumahi ku.”
7 Ne migkaǥi si Hadì Ahasuerus ziyà te ki Rayna Ester wey ki Mordecai te, “Impevitey ku en si Haman tenged te mezaat he vaal zin he idezaat din te menge Judio. Imbeǥey ku en diyà te kenikew, Rayna Ester, is keǥehem te kebayàbayà te langun he azen ni Haman.
8 Guntaan, surat kew en te sevaha pa he suǥù pinaaǥi te ngazan ku para te menge Judio. Ne isurat niw ke hengkey is meupiya para keniyu, ne merkahi niw heini te sising ku. Su is minsan hengkey he dukumintu, kenà egkehimu he edhelinen emun ingkemarka zuen is ngazan ku wey sising ku.”
9 Ne hein ike-23 he andew te iketelu he vulan te tuig he migngezanan te vulan he Sivan, mibpesuǥuan sikan is menge sikritaryu zuen te hadì. Ne insurat dan is suǥù he impesurat kandan ni Mordecai he para te menge Judio, menge gubirnedur, menge pengulu, wey te lavew he menge upisyal zutun te 127 he menge prubinsya su puun dà te nasyun he India ne pehendiyè en te Etiopia. Ne is paaǥi te kedsurata zutun he suǥù, migamit dan is keugelingen he kineǥiyan te menge etew ziyà te kada prubinsya wey is kineǥiyan te menge Judio.
10 Impesurat heini ni Mordecai pinaaǥi te ngazan ni Hadì Ahasuerus, wey midtuusan te sising te hadì. Ne impeuwit te menge sinuǥù he nemen-untud diyà te meǥaan he menge kudà te hadì.
11 Ne zutun te surat, intuǥut te hadì diyà te menge Judio he ziyà te minsan hendei he inged dutun te ginhedian is ketenged te kedsevaha, su wey zan mepengelangi is keugelingen dan. Intuǥut kandan is kedezaat, kebpenhimatey, wey kebpuew te menge edsurung kandan, minsan hengkey he nasyun is ebpuunan dan wey minsan hengkey he prubinsya, ragkes en is menge vahi wey menge vatà. Ne elin daan intuǥut kandan is kedtavan te menge azen te menge kuntada zan.
12 Ne ebeelan heini te menge Judio ziyà te langun he menge prubinsya he sakup te ginhedian ni Hadì Ahasuerus seled dà te senga andew he iyan is ike-13 he andew zutun te ike-12 he vulan he iyan kes migngezanan te vulan he Adar.
13 Is menge kupya kayi he surat, ibpeuwit diyà te kada prubinsya zutun te ginhedian he sevaha he velaud te hadì. Ne haazà, impetuenan te langun he menge etew zutun te ginhedian su wey mekepengandam is menge Judio te kebales te menge kuntada zan.
14 Tenged te suǥù te hadì, migenat is menge menunudtulà he mid-untud te mezesen he menge kudà te hadì. Impehibelu zaan haazà he suǥù diyà te vinerengbeng he inged he Susa.
15 Ne si Mordecai mulà, migawas diyà te turuǥan is mibivisti te visti te hadì he meitem is kaavuavu zin wey meputì, ne zuen din pendivavew he visti he linu he merudtem. Ne kukuruna sikandin te zekelà he kuruna he vulawan. Ne uruhuyan dà te menge meǥinged diyà te Susa tenged te utew zan kegkengelipey tenged duen te suǥù.
16 Ne utew heini ingkelipey te menge Judio wey nekeveǥey kandan te zengeg.
17 Diyà te kada prubinsya wey kada inged he neumahan dutun te suǥù te hadì, mibmelipayen wey midlipeylipey is menge Judio ne mid-andam dan te pista te kedsilibraha kayi. Ne mahabet he menge etew zutun te ginhedian he kenà menge Judio, iyan, nehimu sikandan he menge Judio su egkahandek dan te menge Judio.