12
Is Kedlavey te Belinsuǥuen
1 Ne migkaǥi is Nengazen diyà te ki Moises wey ki Aaron diyà te Ehipto te,
2 “Heini is bulan guntaan iyan egkehuna he vulan te tuig para keniyu.
3 Keǥiyi niw is tivuuk he keet-etawan te Israel he ziyà te ikesepulù he andew kayi he vulan kinahanglan he megkuwa is kada pemilya te nati he kerehidu etawa kambing para te pemilya zin.
4 Ne emun egkeerangan te senge pemilya he kenè dan egkaamin te egkaan is sengetiman he kerehidu, mebpetelewizè dan dutun te avey zin. Edtelazen dan heini sumalà te kezakel zan wey sumalà te egkekaan te kada etew.
5 Iyan niw pilia is menge meemahan he uyaǥen niw he senge-tuig pa is keǥurang din wey wazè din sazir, egkehimu ke kerehidu, ne egkehimu zaan emun kambing.
6 Elimahi niw haazà taman te ike-14 he andew kayi he vulan, su sikiyu is tivuuk he keet-etawan te Israel, edlepaan niw haazà dutun he timpu emun ebpengirum-irum en.
7 Ne kuwa kew te lengesa kayi ne izazas niw haazà diyà te ǥawas he ziyà te pesikilizà te marku te gemawan wey egkezivavew te marku zutun te ǥemawan te menge valey niw he zutun niw egkeena is edlepaan niw.
8 Dutun he kezukileman, egkeenen niw is usa he tinuug duma te memepait he utanen wey supas he wazè din tapey.
9 Kenè kew kaan te usa he mehilew etawa sinevawan, kekenà, tuuǥa niw heini is tivuuk duma is ulu, paa wey is seled te ǥetek dutun te usa.
10 Kinahanglan he ed-eminen niw haazà egkeena te kenè pa ebmeselem, ne emun duen niw egkesamà te egkeume en is meselem kinahanglan he edtutungen niw haazà.
11 Dutun te kegkeena niw kayi, kinahanglan he naandam kew en te kedhipanew. Sesendalyas kew ne ǥewezi niw is tuked niw, ne ǥaanggaan kew is egkaan. Iyan haazà timpu te Pista te Kedlavey te Belinsuǥuen he edsilibrahan niw te kebeǥey te zengeg kedì.
12 “Su zutun daan he kezukileman edhipenawen ku is tivuuk he Ehipto ne ebpenhimetayan ku is langun he menge pengenayan he menge maama te menge Ehiptohanen, meetew se meuyaǥen. Ne edsilutan ku is langun he menge ed-ezapen kayi te Ehipto. Su iyan a Nengazen.
13 Ne haazà is lengesa, ne iyan tuus te menge valey he zutun kew is menge Israilihanen ed-ubpà. Ne emun egkeehè ku haazà is lengesa ne edlevayan ku zà sikiyu. Ne wazà mulà kezeetan he egkehitavù keniyu kayi te kebpigedahi ku te menge Ehiptohanen.
14 “Ne heini he andew, ne tentenuzi niw heini minsan keenu. Silibraha niw heini kada tuig he iyan pista te kebeǥayi niw kedì te zengeg. Heini he sulunuzen, ne kinahanglan he edtumanen niw taman te peleebuten he menge lapis te kevuwazan.
15 Ne iyan heini ibpeulaula ku keniyu: Kinahanglan he kenè niw edtepayan is supas he egkeenen niw seled te pitu he andew. Umbe kinahanglan he id-awè niw is tapey ziyà te menge valey niw zutun te egkehuna he andew. Su is minsan hentei keniyu he egkaan te midtepayan puun dutun te egkehuna he andew pehendiyà te ikepitu he andew ne ed-isipen sikandin he kenà ragkes te kevuwazan ni Israel.
16 Dutun te egkehuna he andew tiǥum kew te ked-azap kedì ne umana niw heini ul-ulaha zutun te ikepitu he andew. Kinahanglan he wazà duma he terebahu niw seled dutun te pitu he andew, kekenà, iyan dà is kebaal te egkekaan te uman sevaha keniyu.
17 “Silibraha niw is Pista te Supas he Wazè din Tapey, su wey niw kenà melipati haazà is andew te kebpeǥewasa ku keniyu te menge tribu ni Israel puun diyà te Ehipto. Ne iyan suǥù ku is: Kinahanglan he ibpezume en diyà te egketulung egkelapislapis he kevuwazan niw is kedsilibraha kayi.
18 Puun kew te kedsilibra kayi zutun te mezukilem te ike-14 he andew te egkehuna he vulan taman te mezukilem dutun te ike-21 he andew, ne kenè niw tepayi is supas he egkeenen niw.
19 Seled te pitu he andew kinahanglan he wazà tapey ziyà te menge valey niw. Is minsan hentei he egkaan te midtepayan kenè en sikandin ed-isipen he ragkes te kevuwazan ni Israel, tutuu man sikandin he kevuwazan ni Israel wey ke kenà.
20 Dutun he timpu kenè kew kaan te edtepayan. Minsan hendei kew ed-ubpà.”
21 Ne impetawag ni Moises is langun he ebpemendumala te Israel ne migkeǥiyan din te, “Pen-ulì kew en ne keǥiyi niw is langun he menge pemilya niw, he megkuwa zan te nati he kerehidu etawa kambing ne lepaa zan haazà para te kedsilibra te Pista te Kedlavey te Belinsuǥuen.
22 Ipetiǥis niw haazà is lengesa ziyà te yahung. Ne kuwa kew te subpang te hisup ne ipevudseng niw haazà diyà te lengesa ne izazas niw ziyà te zivavew wey pesikilizà he marku te menge ǥemawan niw. Ne wazà edliǥawang keniyu ziyà te valey niw taman te egkepawà.
23 Su edhipenawen te Nengazen is Ehipto te kebpenhimatey te kinekekayan he menge anak he maama te menge Ehiptohanen. Piru emun egkaahà te Nengazen is lengesa ziyà te zivavew wey pesikilizà he marku te ǥemawan, ne edlevayan din dà is baley niw ne kenè din edtuǥutan is ebpendezaat te kedseled diyà te menge valey niw te kebpenhimatey te kinekekayan he anak niw he maama.
24 Tumana niw heini he sulunuzen wey te menge kevuwazan niw taman te taman.
25 Emun ebpekeseled kew en duen te tanà he impenaad te Nengazen he ibeǥey zin keniyu pedeyuna niw is ked-ul-ulaha niw kayi he tulumanen.
26 Ne emun ed-insà is menge anak niw ke hengkey is kehuluǥan duen te tulumanen,
27 keǥiyi niw sikandan te, ‘Pista heini te Kedlavey te Belinsuǥuen te Nengazen he edsilibrahan para te kebeǥey te zengeg te Nengazen, su midlevayan din dà is menge valey tew te menge Israilihanen diyà te Ehipto hein kebpenhimetayi zin te menge Ehiptohanen.’ ”
Ne hein nekepasad dutun he edlalag si Moises, ne midluhud is menge Israilihanen ne mid-azap dan is Nengazen.
28 Ne midtuman dan is insuǥù te Nengazen ki Moises wey ki Aaron.
29 Ne hein liwazè en is kezukileman, midhimetayan en te Nengazen is langun he penganey he menge anak he maama diyà te Ehipto, puun te penganey he anak te hadì, he iyan pezem ebpekeilis kandin te kedhadì, pehendiyà te penganey te menge pinirisu ziyà te pirisuwan wey is langun he penganey te menge uyaǥen.
30 Ne zutun he kezukileman mid-enew is hadì wey is langun he menge upisyal zin wey is langun he menge Ehiptohanen. Ne zutun nezineg dan is utew mezaǥing he sineǥawan diyà te Ehipto, su kada valey zan ne zuen duen mibpatey.
31 Dutun he kezukileman, mibpesuǥuan te hadì si Moises wey si Aaron ne ke sikandin diyà te kandan te, “Sigi, genat kew en! Ewai niw en heini is nasyun ku. Genat kew en wey niw maazap is Nengazen, su iyan heeyan edtulungan niw edhengyua.
32 Elin niw en tundana is menge uyaǥen niw su iyan heeyan migkaǥi niw. Ne hengyui niw is Megbevayà he kehizuwi e zin!”
33 Dutun he timpu edeǥusuwen en te menge Ehiptohanen is menge Israilihanen te ked-awà diyà te kandan. Su ke sikandan te, “Egkaamin key en ebpematey emun kenè kew pa egenat!”
34 Ne tenged dutun impenaǥù dan diyà te menge teleǥuey zan is herina he mibmasa zan he wazè pa tepayi. Mibpenenges dan te manggad ne mibpeniang dan te egenat.
35 Midtuman te menge Israilihanen is mibpeveelan kandan ni Moises su mibuyù dan diyà te menge Ehiptohanen te menge elahas he pelata, menge elahas he vulawan, wey menge ebistiyen.
36 Midhimu te Nengazen he mebmeupiya is gehinawa te menge Ehiptohanen diyà te menge Israilihanen umbe imbeǥey zan is mibuyù te menge Israilihanen; pinaaǥi zutun nepenevanan dan is menge Ehiptohanen.
37 Midhipanew is menge Israilihanen puun te Rameses pehendiyà te Sucot. Ne 600,000 is kahabet te menge maama zutun te nemenhipanew ne zuen pa menge vahi wey menge vatà.
38 Ne liyu kandan duen pa mahabet he menge etew he nemenduma kandan he kenà Israilihanen ne elin pa midtundan dan is menge uyaǥen dan he utew mahabet.
39 Pinaaǥi zuen te uwiten dan he minasa he herina he wazè en metepayi, nekevaal sikandan te supas he wazè din tapey. Wazà haazà metepayi is minasa zan su geina te egkezeǥusu sikandan su edsegseǥen en sikandan te menge Ehiptohanen.
40 Is keluǥayad te ked-ubpà te menge Israilihanen diyà te Ehipto, ne 430 he tuig.
41 Ne netapus haazà is 430 he tuig, ne iyan en andew te ked-awà dutun te menge etew te Nengazen diyà te Ehipto.
42 Dutun te tivuuk he kezukileman te kegenat te menge Israilihanen puun te Ehipto, henduen be te wazà medlipezeng is Nengazen te kebantey kandan. Umbe zutun daan he kezukileman ne kenà edlipezeng is menge Israilihanen su ebeǥayan dan te zengeg is Nengazen. Kinahanglan he ed-ul-ulahan dan heini taman te peleebuten he lapis te menge kevuwazan.
Is menge Sulunuzen Mehitenged te Pista te Kedlavey te Belinsuǥuen
43 Migkaǥi is Nengazen diyà te ki Moises wey ki Aaron te, “Iyan heini menge sulunuzen mehitenged te Pista te Kedlavey te Belinsuǥuen:
“Dutun te kedsilibra, kenè niw ipekaan is lumelengyawà.
44 Is uripen he egkepemasa niw, egkehimu he egkaan dutun emun midsirkunsidar niw en,
45 piru is midteǥaad dà med-ubpà diyà te keniyu wey is menge sinuhulan niw zà ne kenè niw ipekaan dutun.
46 Diyè dà haazà egkeenà te seled te valey he zutun heini endama. Ne haazà is usa kinahanglan he wazà minsan deisey zutun he ed-uwiten diyà te ǥawas. Ne kenè niw zaan bedtìa wey kenè niw rupeta is minsan hengkey he tulan din.
47 Kinahanglan he edsilibrahan heini te tivuuk he keet-etawan te Israel.
48 “Is kenà Hebriyuhanen he ebpekesahug diyà te keniyu he egkesuat he edsilibra te Pista te Kedlavey te Belinsuǥuen su wey meveǥayi te zengeg is Nengazen, kinahanglan he ipesirkunsidar zin is langun he menge maama he sakup te pemilya zin. Ne human sikandin egkehimu he edtampu su kuwinta, egkehimu en sikandin he Hebriyuhanen. Kenà egkehimu he ebpeketampu zutun is minsan hentei he maama he wazà mesirkunsidar.
49 Is belaud he para keniyu te menge Israilihanen ne iyan ded belaud he para te kenà menge Israilihanen he mid-ubpà duma keniyu.”
50 Midtuman te langun he menge Israilihanen is insuǥù te Nengazen diyà te ki Moises wey ki Aaron.
51 Dutun he andew impeǥawas te Nengazen puun diyà te Ehipto is menge tribu te Israel.