25
Is menge Halad para te Tulda he Ed-ezapan
(Exodus 35:4-9)
1 Migkaǥi is Nengazen diyà te ki Moises te,
2 “Keǥiyi nu is menge Israilihanen te uwiti e zan te menge halad. Ne iyan ka zawat dutun te idhalad dan kayi te kediey he ebpuun diyà te keputian te atey zan is kebeǥaya zan duen.
3 Iyan heini menge halad he egkuwaan nu ziyà te kandan: vulawan, pelata, brunsi,
4 welin he meitem is kaavuavu zin, merudtem wey kanggan, linu, wey bulvul te kambing he hinavel,
5 lundis te meemahan he kerehidu he midtinà te meriǥà, meupiya he kelasi he lundis, kayu he ekasya,
6 lana te ulibu para te sulù, menge pehemut he para te lana he idlana wey para te mehemut he veyewà,
7 wey vatu he uniks wey zuma pa he mahalen he menge vatu he para ibpemikit duen te ipud wey zuen te teleǥuey ziyà te kumeng kayi.
8 Ipevaal nu sikandan te tulda he zutun a ed-ezapa, ne edlumun a ziyà te kandan.
9 Is kebeeli zutun te Tulda he Ed-ezapan wey is langun he menge gelemiten dutun, kinahanglan he iyan egkesunud sikan is mudilu he ibpeehè ku kenikew.
Is Kavan te Kebpekid-uyun
(Exodus 37:1-9)
10 “Pevaal ka te Kavan, iyan niw veeli is kayu he ekasya, ne haazà, 45 he vaney is kelayat din, 27 he vaney is keluag din, ne 27 he vaney is ketikang din.
11 Ne ed-epizan te lunsey he vulawan is diyà te seled wey is diyà te gawas te kavan wey ebpeliǥuyan te ribiti he vulawan.
12 Pevaal ka te heepat he mibpen-iring te rintì he vulawan, ne haazà diyà ibpikit te heepat he paa zutun te kavan.
13 Pevaal ka zaan te menge tival he kayu he ekasya ne haazà ed-epizan te vulawan,
14 ne id-ahuk haazà is tival zuen te menge mibpen-iring te rintì duen te kada kilid te Kavan para metival zan haazà is Kavan.
15 Ne haazà is menge tival kinahanglan he kenè en ed-ew-ewaan dutun.
16 Ne itaǥù niw zutun te Kavan is dezuwa he melumpipì he vatu he ibeǥey ku ziyà te kenikew he zutun idsurat is menge Kesuǥuan.
17 “Peveeli nu heini he Kavan te lunsey he vulawan he tangeb, he 45 he vaney is kelayat din wey 27 he vaney is keluag din.
18-19 Ne pesalsal ka te vulawan ne haazà, ebeelan he zezuwa he ledawan te velinsuǥuen he kirubin. Ne ziyà haazà ibpelastar te pesiziveluyà he egkepengkusan duen te tangeb su para teleubpu zà sikan is menge kirubin wey haazà is tangeb.
20 Kinahanglan he is menge pakpak duen te menge kirubin ne egkevekar ziyà te zivavew zuen te tangeb su para ebpekelambung duen. Ibpedsineru haazà is dezuwa he kirubin ne zutun sikandan ibpetengteng te tangeb.
21 Ne itaǥù nu zutun te Kavan is midlumpipì he menge vatu he edsuratan te menge Kesuǥuan ku he ibeǥey ku kenikew, ne tengevi nu haazà is kavan.
22 Ne ebpekidhinguma a kenikew zutun te mid-elangan duen te dezuwa he kirubin he ziyà te zivavew zuen te Kavan, ne ibeǥey ku kenikew is langun he menge velaud ku para te menge Israilihanen.
Is Lemisahan he Edsevukan te Supas
(Exodus 37:10-16)
23 “Pevaal ka te lemisahan he ekasya, he 36 he vaney is keluǥayad din, ne 18 he vaney is keluag din wey 27 he vaney is ketikang din.
24 Ne peepizi nu haazà te lunsey he vulawan wey peribitiyi nu te vulawan is peliǥuy zutun.
25 Sevuki niw te senipa is ebpekeliǥuy ziyà te zivavew zutun te lemisahan he heepat he vaney is keluag din ne haazà is ibpekaplè niw lituwi niw pekeplai ziyà te zivavew zin te vulawan he ribiti zin.
26 Ne vaal kew te heepat he mibpen-iring te rintì he vulawan ne ipikit niw haazà diyà te heepat he tukud te lemisahan,
27 ne ebpemekeuvey is kebpikita zuen diyà te ibpekaplà he senipa ziyà te zivavew su iyan haazà ed-ehukan te menge tival he idtival zutun te lemisahan.
28 Baal kew te menge tival he kayu he ekasya, ne epizi niw te vulawan ne iyan haazà itival niw zutun te lemisahan.
29 “Baal kew zaan te lunsey he vulawan he menge pinggan, menge tasa, menge umuy, wey menge yehung. Ne haazà, iyan ebpen-ehukan te menge pemuhat he inumen.
30 Kinahanglan he pirmeninti is supas dutun te lemisahan he ibpemuhat kayi te kedì.
Is Selevukà te Sulù
(Exodus 37:17-24)
31 “Pevaal ka zaan te selevukà te sulù he lunsey he vulawan is menge paa zin, lawa zin, wey is dayandayan dutun he menge vulak, he is duma zuen wazè pa mebekar ne is duma mibekar en. Haazà is dayandayan idredsè dà is kebpurmaha kayi zuen te kebpurmaha te selevukà te menge sulù su teleubpu zà heini.
32 Haazà is selevukà te sulù, duen din heenem he subpang, tigtetelu is diyà te kada kilid kayi.
33 Is kada subpang dutun, duen din tetelu he zayandayan he menge vulak he mid-iring te vulak he almindru, he is duma, memetivurun pa, ne is duma nememekar en.
34 Ne is lawa zutun te selevukà te sulù, ne zuen dutun heepat he zayandayan he ed-iringen te vulak he almindru he wazè pa mebekar wey mibekar en.
35 Duen sevaha he vulak diyà te zizalem te kada paris te subpang.
36 Haazà is menge zayandayan wey menge subpang, idredsè dà is kebpurmaha zuen te kebeeli zuen te lewahan te selevukà te sulù.
37 Ne pevaal ka te pitu he sulù he idsavuk niw zuen te selevukà te sulù, ne ziyè niw haazà ipelastar is selevukà te lugar he egketeyawan is diyà te egkesineruwan din.
38 Kinahanglan he lunsey he vulawan is menge lipit wey is menge selevukà te igmuk.
39 Menge 35 he kilu he lunsey he vulawan is egkeǥamit niw te kebaal te selevukà te sulù wey te langun he menge gelemiten kayi.
40 Kinahanglan he edsungkad is kebeeli niw kayi zuen te mudilu he impeehè ku kenikew kayi te vuntud.