27
Is Pemuhatà te Edtutungen he Pemuhat
(Exodus 38:1-7)
1 Migkaǥi is Nengazen diyà te ki Moises te, “Baal kew te kuwedradu he pemuhatà he kayu he ekasya. Pitu wey tengà he ǥiek is kelayat din ne pitu zaan wey tengà he ǥiek is keluag din, ne heepat wey tengà he ǥiek is ketikang din.
2 Ne veeli niw te sungeysungey is heepat he suyuk dutun, he idredsè dà is kebeeli zuen te kebeeli zutun te pemuhatà. Kinahanglan he ed-epizan te brunsi haazà is pemuhatà.
3 Is langun he menge gelemiten dutun te pemuhatà ne brunsi, he iyan is: menge selevukà te avu, menge pala, menge yahung, menge dezekelà he tinidur he para te usa, wey is menge selevukà te vaǥa.
4 Baal kew zaan te tuuǥà he brunsi he para zutun te pemuhatà, ne pikiti niw te menge brunsi he mibpen-iring te rintì is kada suyuk dutun.
5 Ne isavuk niw heini ziyà te untuzè din he ziyà te tengàtengà he vahin te seled duen te pemuhatà puun te zivavew.
6 Baal kew te tival he ekasya he para zutun te pemuhatà, ne epizi niw haazà te brunsi.
7 Ne haazà is menge tival zuen niw idluglug te mibpen-iring te rintì he ziyà te pesikilizà dutun te pemuhatà su iyan haazà idtival zutun te pemuhatà emun ed-uwiten.
8 Kinahanglan he kahun is beeli niw he pemuhatà. Ne iyan niw iringi sikan is impeehè ku kenikew kayi te vuntud.”
Is Lama zuen te Tulda he Ed-ezapan
(Exodus 38:9-20)
9 “Kinahanglan he zuen lama zutun te Tulda he Ed-ezapan, elaza niw haazà pinaaǥi te kegkurtinahi zuen te linu. Is keluǥayad te kurtina he impelingut diyà te zivavà he kilid ne 150 he ǥiek.
10 Ibpikit heini he kurtina ziyà te 20 he tukud he brunsi he ziyà ipehitindeg te 20 daan he ebpeuntuzan duen he brunsi. Is ebpemikitan duen te menge kurtina, ne iyan is menge kaw-it he pelata he impikit diyà te menge kebilya he pelata ziyà te menge tukud.
11 Is kurtina he ziyà dapit te zizaya ne 150 daan he ǥiek is keleyatan din. Ibpikit daan heini ziyà te 20 he tukud he brunsi he ziyà ipehitindeg te 20 he ebpeuntuzan duen he brunsi. Is ebpikitan duen te menge kurtina ne iyan is menge kaw-it he pelata he ibpemikit diyà te menge kebilya he pelata ziyà te tukud.
12 “Is kurtina he ziyà dapit te edsenlepan he kilid, 75 he ǥiek is keluǥayad din, ne ibpikit heini ziyà te sepulù he tukud he impehulma ziyà te sepulù daan he menge peuntuzà.
13 Is dapit te edsilaan he kilid duen te lama 75 zaan he ǥiek is keluǥayad din.
14 Ne zuen kayi ǥemawan he ed-elangan daan te kurtina is kilid din. Is kurtina ziyà te egkekewanan, 22 he ǥiek is keluǥayad din, ne ibpikit heini ziyà te tetelu he tukud he ibpemehulma ziyà te tetelu zaan he menge peuntuzà.
15 Is kurtina ziyà te egkeǥivang, 22 wey tengà he ǥiek is keluǥayad din, ne idtaud heini ziyà te tetelu he tukud he ibpehulma ziyà te tetelu he peuntuzà.
16 Ne haazà is gemawan, kinahanglan he egkurtinahan te 30 he ǥiek is keluǥayad din he linu he eburdahan te welin he meitem is kaavuavu zin, merudtem wey kanggan ne ebpurungan heini eburdahi. Ne idtaud haazà is kurtina ziyà te heepat he menge tukud he ibpehulma ziyà te heepat he peuntuzà.
17 Is langun he menge tukud he ebpekeliǥuy zutun te lama kinahanglan he zuen dutun menge kaw-it wey menge kebilya he pelata, wey zuen menge pundasyun he brunsi.
18 “Umbe, haazà is lama, zuen din keleyatan he 150 he ǥiek wey 75 he ǥiek he keluaǥan. Ebpeliǥuyan heini te kurtina he linu he is kelayat din, pitu wey tengà he ǥiek. Is menge tukud kayi, ibpehulma ziyà te menge peuntuzà he brunsi.
19 Kinahanglan he pudu brunsi is langun he menge idhiman duen te Tulda he Ed-ezapan ragkes is langun he menge palpal he ibanting dutun te tulda wey is menge kurtina ziyà te lama kayi.
Is Ked-atur te menge Sulù diyà te Tulda he Ed-ezapan
(Leviticus 24:1-4)
20 “Suǥua nu is menge Israilihanen he uwiti ke zan te lunsey he lana te mibevayu he ulibu he idtubil te menge sulù dutun te Tulda su para layun mekesiǥa.
21 Is selevukà te sulù, kinahanglan he idsavuk diyà te ǥawas te kurtina he ebpeketambun duen te Kavan te Kebpekid-uyun. Si Aaron wey is menge kevuwazan din iyan ed-etiman duen te menge sulù duen te Tulda he Edtelevukaayan. Ibpesiǥa zan heini ziyà te etuvangan ku meselem wey mezukilem. Heini he menge sulunuzen ereg he edtumanen te menge Israilihanen taman te huziyan he menge lapis te menge kevuwazan dan.