38
Is Kebaal te Pemuhatà te Pemuhat he Edtutungen
(Exodus 27:1-8)
1 Mibaal zaan sikandan te kuwedradu he pemuhatà te pemuhat he edtutungen. Iyan migamit dan is kayu he ekasya. Pitu wey tengà he ǥiek is kelayat din ne pitu zaan wey tengà he ǥiek is keluag din, ne heepat wey tengà he ǥiek is ketikang din.
2 Mibeelan dan heini te menge sungeysungey ziyà te heepat he suyuk kayi, he inredsè dà is kebpurmaha kayi te kebeeli zuen te pemuhatà. Mid-epizan dan heini is pemuhatà te brunsi.
3 Is langun he menge gelemiten dutun te pemuhatà ne brunsi, he iyan is: menge selevukà te avu, menge pala, menge yahung, menge zezekelà he tinidur he para te usa, wey is menge selevukà te vaǥa.
4 Mibaal zaan sikandan te tuuǥà he brunsi he para zutun te pemuhatà, ne midsevukan dan te untuzà diyà te seled dutun te pemuhatà, ne ziyà haazà te liwezaan puun te zivavew.
5 Mibaal zaan sikandan te heepat he mibpen-iring te rintì he brunsi ne impikit dan heini ziyà te heepat he suyuk dutun te tuuǥà he brunsi. Heini is mibpen-iring te rintì ne iyan edteuzan te menge tival he idtival zutun te pemuhatà.
6 Is menge tival he mibeelan, kayu he ekasya he mid-epizan te brunsi.
7 Intaud dan sikan is menge tival zuen te mibpen-iring te rintì he ziyà te kada kilid dutun te pemuhatà su para mevinting heini. Tabla is mibeelan dan he pemuhatà he mibpuwang is seled din.
Is Kebaal te Bisin
(Exodus 30:18-21)
8 Ne mibaal sikandan te brunsi he bisin wey te untuzà kayi he brunsi zed. Is menge brunsi he migamit te kebeeli kayi, ne ebpuun diyà te brunsi he peǥelungan te menge vahi he nemenilbi ziyà te gemawan te Tulda he Edtelevukaayan.
Is Kebaal te Lama te Tulda he Edtelevukaayan
(Exodus 27:9-19)
9 Mibeelan dan te lama sikan is Tulda, ne mibpeliǥuyan dan heini te kurtina he linu. Is keluǥayad te kurtina he impelingut diyà te zivavà he kilid ne 150 he ǥiek.
10 Impikit dan heini he kurtina ziyà te 20 he tukud he brunsi he ziyà ipehulma te 20 daan he peuntuzà he brunsi. Is mibpikitan dan dutun te kurtina, iyan is menge kaw-it he pelata he nekepikit diyà te menge kebilya he pelata zuen te menge tukud.
11 Is kurtina he ziyà te zizaya he kilid 150 daan he ǥiek is keluǥayad din, ne impikit heini ziyà te 20 he tukud he brunsi he impehulma ziyà te 20 he peuntuzà he brunsi. Is mibpikitan dutun te kurtina iyan is menge kaw-it he pelata he nekepikit diyà te menge kebilya he pelata zuen te menge tukud.
12 Is kurtina he ziyà dapit te edsenlepan he kilid, 75 he ǥiek is keluǥayad din, ne impikit heini ziyà te sepulù he tukud he impehulma ziyà te sepulù daan he menge peuntuzà. Is mibpikitan dutun te kurtina, iyan is menge kaw-it he pelata he nekepikit diyà te menge kebilya he pelata zuen te menge tukud.
13 Is dapit te edsilaan he kilid duen te lama 75 zaan he ǥiek is keluǥayad din.
14 Ne zuen kayi ǥemawan he ed-elangan daan te kurtina is kilid din. Is kurtina ziyà te egkekewanan, 22 he ǥiek is keluǥayad din, ne ibpikit heini ziyà te tetelu he tukud he ibpemehulma ziyà te tetelu zaan he menge peuntuzà.
15 Is kurtina ziyà te egkeǥivang, 22 wey tengà he ǥiek is keluǥayad din, ne intaud heini ziyà te tetelu he tukud he impehulma ziyà te tetelu he peuntuzà.
16 Pudu linu he manggad is kurtina he impeliǥuy zuen te lama.
17 Is menge pundasyun te menge tukud, brunsi, ne is menge kaw-it wey menge kebilya kayi, ne pelata. Is menge in-ulu te menge tukud, mid-epizan te pelata. Is langun he menge tukud dutun te peliǥuy te lama, ne zuen daan menge kebilya he pelata.
18 Is kurtina ziyà te pultahan dutun te lama, ne manggad he linu he miburdahan te meitem is kaavuavu zin, merudtem wey kanggan. Ne utew heini mibpurungan te eburda. Is keluǥayad kayi, 30 he ǥiek, ne is ketikang din, pitu wey tengà he ǥiek, iring te ketikang te menge kurtina ziyà te peliǥuy zuen te lama.
19 Heini he kurtina, impikit diyà te heepat he tukud he impehulma ziyà te heepat daan he brunsi he peuntuzà. Is menge kaw-it wey menge kebilya zutun te menge tukud, ne pelata, wey mid-epizan te pelata is menge in-ulu zutun te tukud.
20 Lunsey he brunsi is menge palpal te menge vanting dutun te Tulda he Ed-ezapan.
Is menge Himan he Migamit te Kebpehitindeǥa zuen te Tulda he Ed-ezapan
21 Iyan heini menge himan he neǥamit te kebpehitindeǥa zuen te Tulda he Ed-ezapan he zutun itaǥù sikan is Kesuǥuan. Heini is menge himan, inlista te menge kevuwazan ni Levi sumalà te suǥù ni Moises. Heini he vuluhaten, iyan midumala zuen si Itamar he anak ni Aaron he memumuhat.
22 Is midumala te kebenguna zuen te Tulda he Ed-ezapan, iyan si Bezalel he anak ni Uri he apù ni Hur, he ebpuun diyà te tribu ni Juda. Mibeelan din is langun he insuǥù te Nengazen ki Moises.
23 Is umuuǥup din, iyan si Oholiab he anak ni Ahisamac, he ebpuun diyà te tribu ni Dan. Metau sikandin he edterebahu wey metau he ebpurma te meupiya he ed-ahaan, wey eburda te linu te meitem is kaavuavu zin, merudtem wey kanggan.
24 Is keveǥat te langun he vulawan he inhalad para egemiten te kebeeli zuen te Tulda he Ed-ezapan, menge 1,000 he kilu ziyà te timbangan te menge memumuhat.
25-26 Is keveǥat te langun he pelata he netiǥum, ne menge 3,520 he kilu ziyà te timbangan te menge memumuhat. Iyan mibeǥey kayi is menge etew he nelista te sinsus. Is kada sevaha kandan mibeǥey te heenem he gramu ziyà te timbangan te menge memumuhat. Duen 603,550 he etew he is keǥurang dan 20 he tuig pehendiyà te metikang is nelista te sinsus.
27 Is 3,500 he kilu he pelata, migamit haazà te kebaal te 100 he menge peuntuzà duen te Tulda wey menge kurtina. Nekesavuk te tig-35 he kilu is kada peuntuzà.
28 Is nesamà he 20 he kilu he pelata, mibeelan he menge kaw-it wey menge kebilya zuen te menge tukud, wey in-apid te menge in-ulu te menge tukud.
29 Is keveǥat te brunsi he inhalad diyà te Nengazen, menge 2,500 he kilu.
30 Migamit heini te kebaal te menge pundasyun te menge tukud duen te menge gemawan te Tulda he Edtelevukaayan. Is duma zutun, migamit te kebaal te pemuhatà he brunsi wey te menge tuuǥà kayi, wey te langun he gelemiten dutun te pemuhatà.
31 Iyan ded haazà migamit dan te kebaal te menge pundasyun te menge tukud duen te alad, wey zuen te gemawan dutun te lama wey te langun he menge palpal zuen te Tulda he Ed-ezapan wey menge palpal ziyà te alad.