4
Is menge Singyal para ki Moises
1 Ne midtavak si Moises te, “Hengkey is ebeelan ku emun kenà sikandan edtuu kediey etawa kenà sikandan ebpemineg kediey? Su và dan dà egkaǥi te, kenà tutuu he mibpaahà kenikew is Megbevayà.”
2 Ne migkaǥi is Nengazen diyà te kandin te, “Hengkey heeyan is egewezan nu?” Ne midtavak sikandin te, “Tuked.”
3 Ne migkaǥi is Nengazen te, “Itimbag nu ziyà te tanà.” Ne intimbag ni Moises haazà diyà te tanà ne mibaluy he uled, ne zutun nepeleǥuyan din tenged te kegkahandek din.
4 Ne migkaǥi is Nengazen diyà te kandin te, “Kuwaa nu, ne ziyè nu ǥewazi te ikug.” Umbe migkuwa ni Moises haazà is uled ne te kegkegewezi zin dutun mibaluy zed he tuked.
5 Ne migkaǥi is Nengazen te, “Pinaaǥi keniyan he singyal ebpeketuu zan he, is Nengazen, he Megbevayà he ed-ezapen te menge kepuun dan he si Abraham, si Isaac, wey si Jacob, iyan mibpaahà kenikew.”
6 Ne mid-uman megkaǥi is Nengazen te, “Isuksuk nu is belad nu ziyà te kumbalè nu.” Midtuman haazà ni Moises, ne hein in-awè din en is belad din, ne utew heini mibmeputì tenged te midletunan heini te melimezang he zaru te lundis.
7 Ne migkaǥi is Nengazen te, “Iuman nu isuksuk diyà te kumbalè nu.” Ne inlikù ni Moises isuksuk is belad din diyà te kumbalè din, ne hein in-awè din ne iring ded te zuma he vahin te lawa zin su neulian en.
8 Ne migkaǥi is Nengazen te, “Emun kenè ke zan edtuuwan etawa kenè ke zan edseǥipaan pinaaǥi zuen te nehuna he singyal, ne egkehimu he edtuuwan ke zan pinaaǥi keniyan te ikezuwa.
9 Iyan, emun kenè ke zan pa ebpemineǥen pinaaǥi kayi te zezuwa he singyal, kuwa ka te wahig diyà te Wahig he Nilo ne ivusbus nu ziyà te memaza he tanà, ne egkehimu heini he lengesa.”
10 Ne migkaǥi si Moises diyà te Nengazen te, “He Nengazen, wazè ku pa meseǥazi is mibmetau a he ebpengaǥikaǥi puun pa zengan taman en guntaan te kebpekidlalag nu kedì te suluǥuen nu. Kenà a metau he epengaǥikaǥi wey ngulit a zaan.”
11 Ne migkaǥi is Nengazen diyà te kandin te, “Hentei ves is mibaal te vèbà te etew? Hentei is midhimu kandin he vengel etawa emew? Hentei is midhimu kandin he ebpekaahà etawa midhimu kandin he lakap? Kenè be iyan a, is Nengazen?
12 Umbe, genat ke en ne ed-uǥupan ku sikew te kegkaǥi wey ibpenurù ku kenikew ke hengkey is egkeǥiyen nu.”
13 Piru migkaǥi en maan si Moises te, “He Nengazen, iyan nu keniyan ipevaal is sengeeetew en.”
14 Dutun nepeukan si Moises te Nengazen ne migkaǥi te, “Iyan nasì is kakey nu he si Aaron he kevuwazan daan ni Levi. Netuenan ku he metau mulà sikandin he ebpengaǥikaǥi. Guntaan kemulu en sikandin edhipanew te kedsinuǥung kenikew, ne ibmeupiya te ǥehinawa zin is kegkaahaa zin kenikew.
15 Lelaǥi nu sikandin, ne ipenurù nu kandin is egkeǥiyen din. Ne ed-uǥupan ku sikiyu is dezuwa te kegkaǥi, wey ibpenurù ku keniyu is ereg he ebeelan niw.
16 Is idlalag nu pezem diyà te menge etew ne si Aaron is egkaǥi. Penurua nu sikandin ke hengkey is idlalag din; kuwinta henduen te iyan ka Megbevayà.
17 Iyan, uwita nu heeyan is tuked he egewezan nu su pinaaǥi keniyan ebpekehimu ka te menge singyal.”
Is Kedlikù ni Moises diyà te Ehipto
18 Ne mid-ulì si Moises diyà te enuǥang din he si Jetro ne migkeǥiyan din te, “Tuǥuti a kenikew te kedlikù diyà te menge kezumahan ku ziyà te Ehipto te ked-ahà ke menge uuyag ded be sikandan.” Ne midtavak si Jetro te, “Uya, egkehimu he egenat ka, ne verakat he meupiya is hipanew nu.”
19 Ne zutun he timpu te kemulu pa si Moises diyà te Midian ne migkeǥiyan sikandin te Nengazen te, “Likù ke en diyà te Ehipto su pudu en minatey sikan is menge etew he egkesuat he edhimatey kenikew.”
20 Ne migkuwa ni Moises is esawa zin wey sikan is menge anak din he pudu maama, ne impeuntud din sikandan te asnu su egenat dan en pehendiyà te Ehipto. Ne mid-uwit daan ni Moises sikan is tuked te Megbevayà.
21 Migkaǥi is Nengazen diyà te ki Moises te, “Emun diyè ke en te Ehipto kinahanglan he ipeehè nu te hadì te Ehipto is langun he menge singyal he impeehè ku kenikew. Imbeǥey ku en kenikew is gehem te ked-ul-ulaha zuen. Ne zutun ebpengelinteuwan ku he kenà haazà med-uteng diyà te ǥehinawa zin su wey kew zin kenà metuǥuti te ked-awà puun te Ehipto.
22 Ne zutun keǥiyi nu haazà is hadì te, ‘Iyan heini lalag te Nengazen diyà te kenikew: Ed-isipen ku is menge Israilihanen he iring te kakey he anak ku,
23 umbe, migkeǥiyan ku sikew he tuǥuti nu he mekeǥenat heeyan is anak ku su wey mekaazap kedì. Iyan, wazè nu tuǥuti he mekeǥenat, umbe edhimetayan ku is kakey he anak nu he maama!’ ”
24 Dutun te kedhipanew eni Moises wey is pemilya zin, midhulavung dan diyà te himelayà. Midhinguma si Moises te Nengazen su edhimetayan din pezem.
25-26 Piru migkuwa si Zipora te meǥarang he vatu ne midsirkunsidar zin is anak din, ne is lundis he nekuwa zin, indazas din diyà te sineruwan ni Moises. Ne migkaǥi si Zipora te, “Tutuu iyan he esawa ku sikew tenged te lengesa.” (Nekaǥi ni Zipora heini he iyan ibpesavut is kegkesirkunsidara.) Umbe wazà himetayi te Nengazen si Moises.
27 Migkaǥi is Nengazen diyà te ki Aaron te, “Hipanew ka ne sinuǥunga nu si Moises diyà te sibsivayan.” Umbe midsinuǥung din si Moises diyà te Buntud te Megbevayà ne midhezekan din si Moises tuus te kegkeǥalew zin.
28 Ne midtudtul ni Moises diyà te ki Aaron is minsan hengkey he ibpekaǥi kandin te Nengazen, wey is langun he menge singyal he ebpeveelan kandin te Nengazen.
29 Umbe midhendiyè dan is dezuwa, ne midtiǥum dan is langun he ebpemendumala te menge Israilihanen.
30 Ne migkaǥi ni Aaron diyà te kandan is langun he migkaǥi te Nengazen diyà te ki Moises. Wey impaahà ni Moises te menge etew sikan is menge singyal,
31 ne midtuu sikandan. Ne hein netuenan dan he igkeseeng sikandan te Nengazen wey naahà te Nengazen is kemeresayan dan, midluhud sikandan te ked-azap kandin.