6
1 Ne migkaǥi is Nengazen diyà te ki Moises te, “Egkeehè nu en human is ed-ul-ulahan ku ziyà te hadì te Ehipto. Pinaaǥi te ǥehem he ibpeehè ku, edtuǥut sikandin he mekeǥenat kew puun te nasyun din. Ne egketeǥel sikandin te kebpeǥenat keniyu.”
2 Migkaǥi zaan is Megbevayà diyà te ki Moises te, “Iyan a Nengazen.
3 Hein mibpaahà a ki Abraham, ki Isaac, wey ki Jacob, nesavut dan he iyan a is Mekeǥeǥehem he Megbevayà. Iyan, wazà a mekepekilala kandan pinaaǥi te ngazan ku he Nengazen.
4 Midhimu ku is kebpekid-uyun ku kandan, he ibeǥey ku kandan is tanà te Canaan he iyan neubpaan dan dutun te kegkelumelengyawè dan.
5 Ne ǥuntaan nezineg ku en is dag-es te menge Israilihanen he ed-uripenen te menge Ehiptohanen, ne netenuzan ku en haazà is kebpekid-uyun ku kandan.
6 Umbe, keǥiyi nu is menge Israilihanen: ‘Iyan a Nengazen. Ne ibpeǥawas ku sikiyu te kegkeuripena keniyu te menge Ehiptohanen. Pinaaǥi te ǥehem ku, ebpurungan ku edsiluti is menge Ehiptohanen, ne edlibriyen ku sikiyu.
7 Ed-isipen ku sikiyu he menge etew ku ne iyan a egkehimu he Megbevayè niw. Ne egketuenan niw he siak is Nengazen he Megbevayè niw, iyan a mibpeǥawas keniyu puun te kegkeuripena keniyu te menge tig-Ehipto.
8 Ne ziyè ku sikiyu ed-uwita te tanà he insaad ku he ibeǥey ku ziyà te ki Abraham, ki Isaac, wey ki Jacob. Ibeǥey ku haazà keniyu, ne egkaangken niw en. Iyan a sikan is Nengazen.’ ”
9 Ne midtultul haazà ni Moises diyà te menge Israilihanen, iyan, wazè dan sikandin pemineǥa tenged te kegkesuǥey zan wey te gerabi he pesipala kandan dutun te ked-uripena kandan.
10 Ne migkeǥiyan si Moises te Nengazen te,
11 “Genat ka, ne keǥiyi nu is Faraon he hadì te Ehipto he tuǥuti zin en is menge Israilihanen he egawas te nasyun din.”
12 Iyan, migkaǥi si Moises diyà te Nengazen te, “Emun wazà mebpemineg kedì is menge Israilihanen, iyan pe be is hadì? Su kenà a metau he ebpengaǥikaǥi!”
13 Ne migkaǥi is Nengazen diyà te ki Moises wey ki Aaron te, “Keǥiyi niw is menge Israilihanen wey is Faraon he hadì te Ehipto he midsuǥù ku sikiyu is dezuwa te kebpeǥawas te menge Israilihanen diyà te Ehipto.”
Is menge Kepuun ni Moises wey ni Aaron
14 Iyan heini menge kepuun te nepipira he menge pemilya te tribu te Israel: Is menge anak ni Reuben he maama te kinekekayan he anak ni Israel iyan ensi Hanoc, Palu, Hezron wey si Carmi. Ne iyan sikandan wey is menge kevuwazan dan menge pemilya he ebpuun diyà te ki Reuben.
15 Is menge anak he maama ni Simeon iyan ensi Jemuel, Jamin, Ohad, Jakin, Zohar, wey si Shaul. (Heini si Shaul anak ni Simeon he Canaanhen is iney zin.) Ne iyan sikandan wey is menge kevuwazan dan menge pemilya he ebpuun ki Simeon.
16 Sumalà is insurat he keguǥuza iyan heini menge ngazan te menge maama he menge anak ni Levi: si Gershon, si Kohat, wey si Merari. Is keluǥayad te untung ni Levi 137 he tuig.
17 Is menge anak he maama ni Gershon iyan si Libni wey si Shimei.
18 Is menge anak he maama ni Kohat iyan si Amram, si Izhar, si Hebron, wey si Uziel. Is keluǥayad te untung ni Kohat 133 he tuig.
19 Is menge anak he maama ni Merari iyan si Mali wey si Mushi. Ne iyan heini ebpuunan te menge kevuwazan ni Levi sumalà is keguǥuza te menge kevuwazan dan.
20 Mid-esawa ni Amram is etevey te amey zin he si Jokebed. Ne iyan menge anak dan he maama si Moises wey si Aaron. Is keluǥayad te untung ni Amram 137 he tuig.
21 Is maama he menge anak ni Izhar iyan si Kora, si Nefeg, wey si Zicri.
22 Is maama he menge anak ni Uziel iyan si Mishael, si Elzafan, wey si Sitri.
23 Si Aaron, neesawa zin si Elisheba is anak he vahi ni Aminadab wey etevey zaan ni Nashon. Ne in-anak dan si Nadab, si Abihu, si Eleazar, wey si Itamar.
24 Is maama he menge anak ni Kora iyan si Asir, si Elkana, wey si Abiasaf. Ne iyan sikandan wey is menge kevuwazan dan menge pemilya he ebpuun te ki Kora.
25 Si Eleazar is anak he maama ni Aaron, neesawa zin is sevaha zuen te menge anak he vahi ni Putiel ne in-anak dan si Finehas.
Iyan heini menge kepuun te menge pemilya he Levihanen.
26 Sikan is Aaron wey Moises he ingkelista kayi te guǥud te menge pemilya iyan en sikan is Aaron wey Moises he migkeǥiyan te Nengazen te, “Dumaha niw is menge Israilihanen pehendiyà te ǥawas te Ehipto.”
27 Iyan sikandan sikan is nekidlalag te Faraon he hadì te Ehipto mehitenged te kedumaha zan te menge Israilihanen pehendiyà te ǥawas te Ehipto.
Si Aaron is Egkaǥi te Egkeǥiyen ni Moises
28 Ne hein nekidlalag is Nengazen ki Moises diyà te Ehipto,
29 migkeǥiyan din si Moises te, “Siak, is Nengazen, edsuǥuen ku sikew. Keǥiya nu ziyà te Faraon he hadì te Ehipto is langun he migkaǥi ku ziyà te kenikew.”
30 Iyan, migkaǥi si Moises diyà te Nengazen te, “Kenà ebpemineg kedì is hadì su kenà a metau he ebpengaǥikaǥi.”