8
1 ne migkeǥiyan te Nengazen si Moises te, “Hendiyè ka te hadì te Ehipto ne keǥiyi nu sikandin te, ‘Iyan heini lalag te Nengazen diyà te kenikew: Tuǥuti nu is menge etew ku te kegenat su wey zan mekaazap kedì.
2 Ne emun kenè nu sikandan edtuǥutan, ebpigedahan ku sikiyu is menge Ehiptohanen kayi te tivuuk he Ehipto pinaaǥi te menge vakbak.
3 Utew edsubra is kebmahabet te menge vakbak diyà te Wahig he Nilo ne edseled dan diyà te turuǥan nu, diyà te ruǥu nu wey minsan diyà te hizeǥaan nu. Edseled dan daan diyà te menge valey te menge upisyal nu wey te ginsekupan nu, ragkes en is menge avu wey menge lugar he ebmesahan te herina.
4 Edlingketawan ka te menge bakbak wey is menge etew nu wey elin is menge upisyal nu.’ ”
5 Ne zutun migkaǥi is Nengazen diyà te ki Moises te, “Keǥiyi nu si Aaron he beyawa zin is belad din he zuen tuked he ibpetezù diyà te menge dezekelà he wahig he edtudà, beuǥan, kanal, wey menge wahig he mibpeneng, ne egaun is menge vakbak kayi te tivuuk he tanà he Ehipto.”
6 Ne imbayew ni Aaron is belad din he ibpetezù diyà te zivavew te menge wahig diyà te Ehipto, ne zutun migaun is utew midtaman he mahabet he menge vakbak ne giranap dan diyà te tivuuk he Ehipto.
7 Ne sikan is menge selemengkiru nehimu zan daan is iring dutun su ingkepeǥaun dan daan is menge vakbak puun te menge wahig diyà te Ehipto.
8 Ne mibpesuǥuan te hadì te Ehipto si Moises wey si Aaron ne migkeǥiyan din te, “Ampù kew ziyà te Nengazen he iawè din heini is menge vakbak kayi te kediey wey te menge etew ku, ne edtuǥutan ku te kegenat is menge zuma niw su wey zan mepemuhat is Nengazen.”
9 Ne migkaǥi si Moises te, “Iyan ke en telaan ke keenu ku sikew id-ampù duma te menge upisyal nu wey te tivuuk he gin-etawan nu, su wey maawà is nenggaun he menge vakbak diyà te keniyu wey ziyà te menge valey niw. Iyan dà egkesamà he menge vakbak is diyà te Wahig he Nilo.”
10 Ne midtavak haazà is hadì te, “Keeselem iampù a kenikew.” Ne midtavak si Moises te, “Uya, edtumanen ku heeyan is nekaǥi nu, su wey nu metueni he wazà ebpekerepeng te Nengazen he iyan Megbevayè dey.
11 Ed-awà is langun he menge vakbak diyà te keniyu ne iyan dà egkesamà is diyà te Wahig he Nilo.”
12 Ne hein mid-ewaan en ni Moises wey ni Aaron kes hadì, ne mibpengemuyù si Moises diyà te Nengazen he iawè din sikan is menge vakbak he midsuǥù din diyà te Ehipto.
13 Ne mibeelan te Nengazen is inhangyù ni Moises. Nemematey is menge vakbak diyà te menge valey, diyà te menge lama, wey menge vevesukà.
14 Ne miburunburun heini te menge Ehiptohanen ne metikang is tambù dan ne mibmemahù is tivuuk he Ehipto tenged dutun.
15 Iyan, hein naahà duen te hadì he naawè en sikan is menge vakbak, ne impemezesen din en maan is gehinawa zin, ne wazà sikandin mebpemineg ki Moises wey ki Aaron, sumalà te nekaǥi te Nengazen.
Is Pigada Pinaaǥi te menge Rengit
16 Ne migkaǥi is Nengazen diyà te ki Moises te, “Keǥiyi nu si Aaron te ilagkut nu is tuked nu ziyà te tanà, ne egkehimu he rengit is eliyavuk te tanà te tivuuk he Ehipto.”
17 Ne mibeelan dan heini, ne hein inlagkut ni Aaron diyà te tanà sikan is tuked din, ne mibaluy he menge rengit is eliyavuk diyà te tivuuk he tanà he Ehipto. Ne midhurunan te menge rengit is menge etew wey menge uyaǥen.
18 Ne hein iyan migezam mebaal te menge rengit sikan is menge selemengkiru pinaaǥi te kegkeselemengkiru zan, ne wazà sikandan mekehimu. Ne zutun midhurun is menge rengit diyà te menge etew wey menge uyaǥen.
19 Ne migkaǥi sikan is menge selemengkiru ziyà te hadì te, “Baal heini te Megbevayà!” Piru mezesen gihapun is gehinawa zuen te hadì, ne wazà sikandin mebpezumazuma ki Moises wey ki Aaron, su iyan heini migkaǥi te Nengazen.
Is Pigada Pinaaǥi te menge Dezeizey he Keranapranap
20 Ne migkaǥi is Nengazen diyà te ki Moises te, “Sayu ka enew keeselem ne veyai nu kes hadì te kedhendiyà din te wahig. Ne keǥiyi nu sikandin he iyan heini migkaǥi ku: ‘Tuǥuti nu is menge etew ku te kegenat su wey zan mekaazap kedì.
21 Ne emun kenè nu sikandan edtuǥutan, ebpengelinteuwan ku he ebpekeuma keniyan te kenikew is ebmelinguwan he menge dezeizey he keranapranap he edhurun diyà te kenikew wey ziyà te menge upisyal nu wey te menge keet-etawan nu. Egkengepenù te menge dezeisey he keranapranap is menge valey niw, ne is tanà ne egketembunan kayi.
22 Iyan, emun egkehitavù en haazà ne kenà mulà egkehitavù diyà te tanà he Goshen, he iyan ed-ubpaan te menge etew ku; kenà mulà edhendiyà te kandan is menge dezeizey he keranapranap he ebpezumdumahà, su para metueni niw he siak, is Nengazen, dutun a he lugar.
23 Edhimuwen ku is kebpekeviza te kediey he menge etew wey is kenikew he menge etew. Ne heini is singyal egkehitavù keeselem.’ ”
24 Mid-ulaula iyan heini te Nengazen. Midselezan te mezakel he menge dezeisey he menge keranapranap is turuǥan te hadì wey is baley te menge perezumala zin, ne is tivuuk he tanà te Ehipto ne nezeetan tenged kayi.
25 Ne mibpesuǥuan te hadì si Moises wey si Aaron ne ke sikandin diyà te kandan te, “Genat kew en, pemuhata niw is Megbevayà, piru kayi kew zà te seled te Ehipto.”
26 Iyan, midtavak si Moises te, “Kenà heeyan hustu, su is menge pemuhat he ibpemuhat dey te Nengazen he Megbevayè dey, ne utew igkelimezangi te menge Ehiptohanen. Ne emun igkeremerik dan is ibpemuhat dey, ne ebpenulengen key zan te vatu.
27 Umbe, kinahanglan he edtumanen dey is insuǥù kenami te Nengazen he iyan Megbevayè dey he ibpehipanew key zin pehendiyà te sibsivayan seled te tetelu he andew ne human dey sikandin ebpemuhata.”
28 Ne migkaǥi is hadì te, “Edtuǥutan ku sikiyu te kedhendiyà te sibsivayan su wey niw mepemuhat is Nengazen he Megbevayè niw, piru kinahanglan he kenè kew edhendiyà te utew meziyù. Ne iampù e en keniyu.”
29 Midtavak si Moises te, “Ǥuntaan ke ed-ewaan ku en sikew, id-ampù ku en sikew ziyà te Nengazen, ne keeselem ed-awà is menge zezeizey he keranapranap diyà te keniyu te langun. Iyan dà is, kinahanglan he kenè key en kenikew ed-umanan edlimbungi pinaaǥi te kenè nu kebpeǥenata kenami emun egenat key en su wey zey mepemuhat is Nengazen.”
30 Ne zutun mid-ewaan ni Moises haazà is hadì ne mid-ampù diyà te Nengazen.
31 Ne intuǥut te Nengazen is mibuyù ni Moises. Mid-awà is menge zezeizey he keranapranap diyà te langun he menge Ehiptohanen, ne wazà minsan sevaha he nesamà.
32 Ne zutun he timpu impemezesen en maan duen te hadì is gehinawa zin he kenè din edtuǥutan he mekeǥenat haazà is menge Israilihanen.