11
Is Turi te Babilonia
1 Ne zutun he timpu, sebsevaha pa is kineǥiyan te langun he menge etew te tivuuk he kelibutan.
2 Ne zutun te kedhalinhalin te menge etew pehendiyà te zapit te edsilaan, neehè dan is meluag he menge suǥud diyà te Shinar, ne zutun dan med-ubpà.
3-4 Ne zutun, pesikaǥi zan te, “Ebaal kiw te sevaha he inged he zuen turi he ebpekeuma ziyà te langit, para mehimu kiw he bentuǥan wey para zaan kenè kiw mekedsusuwey kayi te tivuuk he kelibutan.” Umbe mibaal sikandan te brik, ne mid-init dan heini para mebmezesen utew. Brik is migamit dan batu man pezem. Ispaltu is migamit dan wey mekedezeket haazà.
5 Ne zutun, mibulus is Nengazen su ed-ahaan din is mibeelan te etew he inged wey turi.
6 Migkaǥi sikandin te, “Heini he menge etew, nesevaha zan wey sevaha zà is kineǥiyan dan. Ne heini is mibeelan dan ne puunè pa heini. Kenà egkeuǥet ne ebeelan dan is minsan hengkey he egkesuatan dan.
7 Kuwa kew en, edhendiyè kiw, ne ibpedseselekawè tew is kineǥiyan dan su wey zuen mezakel he menge kineǥiyan su wey kenè dan mekedsesevutà.”
8 Umbe mibpedsusuwey te sikandan te Nengazen kayi te tivuuk he kelibutan, ne neengkezan dan is kedtukud dan te inged.
9 Umbe, migngezanan haazà is inged he Babel, he ke và dà egkeǥiya, “Kegkengeliveǥi,” su zutun impedseselekawà te Nengazen is kineǥiyan te tivuuk he menusiyà. Ne puun dutun midhimu te Megbevayà he mekedsusuwey sikandan pehendiyà te minsan hendei zini te kelibutan.
Is menge Kevuwazan ni Shem
(1 Cronica 1:24-27)
10 Iyan heini guǥud mehitenged te pemilya ni Shem.
Hein menge dezuwe en he tuig puun dutun te timpu te kegkeiwas en te kedlapey te zaǥat, 100 en is penuiǥen ni Shem, ne zutun nevuwad sikandin ki Arfaxad.
11 Ne puun dutun te ked-enaka ki Arfaxad, 500 pa he tuig is keluǥayad te untung ni Shem, ne zuen duma pa he menge anak din he maama wey vahi.
12 Hein 105 en is penuiǥen ni Arfaxad nevuwad sikandin ki Shela.
13 Ne puun dutun te ked-enaka ki Shela, 403 pa he tuig is keluǥayad te untung ni Arfaxad, ne zuen duma pa he menge anak din he maama wey vahi.
14 Hein 30 en is penuiǥen Shela ne nevuwad sikandin ki Eber.
15 Ne puun dutun te ked-enaka ki Eber, 403 pa he tuig is keluǥayad te untung ni Shela, ne zuen duma pa he menge anak din he maama wey vahi.
16 Hein 34 en is penuiǥen ni Eber ne nevuwad sikandin ki Peleg.
17 Ne puun dutun te ked-enaka ki Peleg, 403 pa is keluǥayad te untung ni Eber, ne zuen duma pa he menge anak din he maama wey vahi.
18 Hein 30 en is penuiǥen ni Peleg ne nevuwad sikandin ki Reu.
19 Ne puun dutun te ked-enaka ki Reu, 209 pa he tuig is keluǥayad te untung ni Peleg, ne zuen duma pa he menge anak din he maama wey vahi.
20 Hein 32 en is penuiǥen ni Reu ne nevuwad sikandin ki Serug.
21 Ne puun dutun te ked-enaka ki Serug, 207 pa he tuig is keluǥayad te untung ni Reu, ne zuen duma pa zaan he menge anak din he maama wey vahi.
22 Hein 30 en is penuiǥen ni Serug ne nevuwad sikandin ki Nahor.
23 Ne puun dutun te ked-enaka ki Nahor, 200 pa he tuig is keluǥayad te untung ni Serug, ne zuen duma pa zaan he menge anak din he maama wey vahi.
24 Hein 29 en is penuiǥen Nahor ne nevuwad sikandin ki Tera.
25 Ne puun dutun te ked-enaka ki Tera, 119 pa he tuig is keluǥayad te untung ni Nahor, ne zuen duma pa zaan he menge anak din he maama wey vahi.
26 Hein 70 is penuiǥen ni Tera ne nevuwad sikandin ki Abram, Nahor, wey si Haran.
Is menge Kevuwazan ni Tera
27 Iyan heini guǥud mehitenged te pemilya ni Tera.
Si Tera, iyan amey eni Abram, si Nahor, wey si Haran. Ne si Haran, ne nevuwad sikandin ki Lot.
28 Ne hein kemulu pa uuyag si Tera minatey is anak din he si Haran diyà te Ur he iyan inged dan te menge Kildiyanhen he zutun si Haran ianak.
29 Ne mibpengesawa si Abram wey si Nahor. Iyan esawa ni Abram si Sarai, ne iyan esawa ni Nahor si Milca. Anak si Milca ni Haran te amey zaan ni Isca.
30 Ne si Sarai, kenà ed-anak umbe wazè din menge anak.
31 Ne midumahan ni Tera is anak din he si Abram, is ambey zin he si Sarai, wey is apù din he si Lot he anak ni Haran, ne mid-awè dan diyà te Ur he sakup te inged te menge Kildiyanhen su edhendiyè dan pezem te Canaan. Piru hein nekeuma zan diyà te inged he Haran, diyè dan dà med-ubpà.
32 Ne ziyà en mebpatey si Tera te Haran hein mibpenuiǥen sikandin te 205 he tuig.