30
1 Hein naahà ni Raquel he kenà sikandin ed-anak, neima sikandin ki Lea. Migkeǥiyan din si Jacob te, “Beǥayi a te anak su emun kenà a kenikew ebeǥayan te vatà ne ebpatey e en!”
2 Ne nepeukan sikandin ni Jacob he egkaǥi te, “Maan, Megbevayè e ve? Kandin he ketau is kenè nu kebpekaanak!”
3 Migkaǥi si Raquel ziyà te ki Jacob te, “Emun iyan heeyan, pekidhulid ka ki Bilha he uripen ku su minsan pinaaǥi zà kandin is kebpekekuwa ku te vatà.”
4 Ne imbeǥey ni Raquel ki Jacob si Bilha is uripen din para mehimu he esawa zin daan, ne mibpekidhulid si Jacob kandin.
5 Mibmeǥingey si Bilha, ne mid-anak te maama.
6 Ne migkaǥi si Raquel te, “In-awà human te Megbevayà is keelezan ku. Midtavak din is pengemuyù ku, su imbeǥey zin kedì is sevaha he anak he maama.” Umbe migngezanan din haazà is batà ki Dan.
7 Ne mibmeǥingey en maan si Bilha is suluǥuen ni Raquel, ne mid-anak sikandin te maama, ikezuwe en haazà he anak dan ki Jacob.
8 Migkaǥi si Raquel te, “Mibpurung a mebpekidlawan te suled ku, ne nezaag ku sikandin.” Umbe migngezanan din haazà ki Naftali.
9 Ne hein kenè en si Lea ebpekaanak, ne impeesawa zin ki Jacob is uripen din he si Zilpa.
10 Mibmeǥingey si Zilpa, ne mid-anak te maama.
11 Migkaǥi si Lea te, “Utew meupiya is palad ku!” Umbe migngezanan din haazà is batà ki Gad.
12 Mid-uman med-anak si Zilpa te maama he ikezuwa he anak dan ki Jacob.
13 Migkaǥi si Lea te, “Utew a nelipey! Ebpekekaǥi is menge zuma ku he vahi he utew ad melipayen.” Umbe migngezanan din haazà is batà ki Asher.
14 Sevaha zutun he timpu he iyan ting-eǥani te trigu, midhendiyà si Reuben te vevesukà, ne zuen neehè din he pinemula he mandaǥura. Mibpenguwa sikandin te veǥas kayi, ne mid-uwit din diyà te iney zin he si Lea. Hein naahà haazà ni Raquel, migkaǥi sikandin te, “Beǥayi ad kun keniyan te mandragura he mid-uwit te anak nu.”
15 Ne midtavak si Lea te, “Wazè nu pe bes ikesuat is ked-eǥawa nu te esawa ku? Egkuwaan nu pa zaan is mandragura te anak ku?” Migkaǥi si Raquel te, “Emun ebeǥayan a kenikew te mandragura ne ibpehulid ku si Jacob kenikew kengkuwan ke mezukilem.”
16 Hein mahapun en, ne ebpelingguma si Jacob is ebpuun diyà te vevesukà is ed-ulì en, ne midsinuǥung sikandin ni Lea, he egkaǥi te, “Kinahanglan he kayi ka edhulid te kedì guntaan te mezukilem, su mibeyazan ku en sikew ziyà te ki Raquel te mandragura he mid-uwit te anak ku.” Umbe ziyà te ki Lea medhulid si Jacob dutun te kezukilemi.
17 Midtavak te Megbevayà is pengemuyù ni Lea, ne mibmeǥingey sikandin. Ne mid-anak sikandin te maama he ikelima te anak dan ki Jacob.
18 Migkaǥi si Lea te, “Midsuhulan a te Megbevayà su impeesawa ku is uripen ku te esawa ku.” Umbe migngezanan din haazà is batà ki Isacar.
19 Mibmeǥingey en maan si Lea ne mid-anak te maama he ikeenem te anak dan ki Jacob.
20 Migkaǥi si Lea te, “Utew mahal is imbeǥey kediey te Megbevayà. Edtehuzen ad human te esawa ku su neveǥayan ku en sikandin te heenem he anak he maama.” Umbe migngezanan din haazà is batà te Zebulun.
21 Ne is huziyan he in-anak ni Lea vahi, ne migngezanan din ki Dina.
22 Si Raquel ne wazà daan melipati te Megbevayà. Midtavak din daan is pengemuyù din he mekaanak daan sikandin.
23 Mibmeǥingey sikandin ne mid-anak te maama. Migkaǥi sikandin te, “In-awà human te Megbevayà is utew ku igkeeled.” Umbe migngezanan din haazà is batà te Jose, su ke sikandin te,
24 “Berakat he umani e pa te Nengazen te sevaha pa he anak.”
Is Neuyunan ni Jacob wey ni Laban
25 Hein in-anak en ni Raquel si Jose, migkeǥiyan ni Jacob si Laban te, “Tuǥuti e en human he mekeulì a ziyà te inged dey.
26 Iveǥey nu en kediey is menge esawa ku he mibpenilbiyan ku ziyan te kenikew wey menge anak ku, su ed-ulì e en. Netuenan nu ke hengkey kezekelà is nehimu ku te kebpenilbi ku kenikew.”
27 Midtavak si Laban te, “Emun meupiya zà is gehinawa nu, ne zini ke pa ubpà. Su sumalà te kebarè ku, netuenan ku he midtuvazan a te Nengazen pinaaǥi kenikew.
28 Keǥiya nu ke pira is idsuhul ku kenikew, su ebeyazan ku sikew.”
29 Ne midtavak si Jacob te, “Nesavut nu en he utew a midhaǥù dini te kenikew, ne nesavut nu zaan ke hengkey is uswag te menge uyaǥen nu tenged te ked-elima ku.
30 Hein nekeuma a keyi pirapira zà is menge uyaǥen nu, piru ǥuntaan utew en mibmezakel, su midtuvazan ka te Nengazen pinaaǥi kedì. Umbe ǥuntaan kinahanglan he edsiguruwen ku is para te keugelingen ku he pemilya.”
31 Nenginginsà si Laban te, “Hengkey is egkesuatan nu he ibayad ku kenikew?” Midtavak si Jacob te, “Kenè e en kenikew suhuli. Emun ebpemineg ka te egkesuatan ku ne kenà a ed-awà kayi, su ed-elimahan ku is menge uyaǥen nu.
32 Iyan heini: edsusiyen ku ǥuntaan is menge uyaǥen nu ne egkuwaan ku is meitem he menge kerehidu wey kevangan he menge kambing. Iyan dà haazà suhul ku.
33 Ne emun egkeuǥet en, egketuenan nu ke egkeseriǥan a wey ke kenà, su edsusiyen nu haazà is menge uyaǥen he insuhul nu kedì. Emun duen egkeehè nu he kambing he kevangan etawa kerehidu he kenà meitem, keǥiya nu he tinakew ku.”
34 Midtavak si Laban te, “Emun iyan heeyan egkesuatan nu, ebpemineg a.”
35 Piru te haazà he andew, insivey ni Laban is kevangan he kambing, meemahan wey vehiyan, ragkes is meitem he menge kerehidu. Mibpeelimahan din heini te anak din he maama.
36 Insivey ni Laban is kandin he menge uyaǥen dutun te menge uyaǥen ni Jacob te keziyù he tetelu he andew emun edhipenawen. Iyan dà nesamà he uyaǥen dutun is mid-elimahan ni Jacob.
37 Ne zutun, migkuwa si Jacob te menge subpang te kayu he alamu, ebilyanu wey platanu ne mibpenluk-itan din. Piru wazè din emini penluk-iti, umbe mibpemelvel-etan din te wazà luk-iti su wey mebeverekà he ed-ehaan haazà is subpang.
38 Diyè din haazà ipasek te uvey te peinumà te menge uyaǥen para maahà haazà dutun te menge uyaǥen emun ebpekeinum dan.
39 Dutun te egkesineruwan te subpang ebpepenpeniwelayà haazà is menge kambing emun edhendutun dan is ed-inum. Emun ed-anak dan, ne kevengan is anak dan.
40 Piru is ki Jacob he mibeelan te menge kerehidu: Zutun te kemulu en ebpepenpeniwelayà haazà is menge uyaǥen, ibpesinaru zin sikandan duen te kevangan he kambing wey zuen te menge meitem he kambing ni Laban. Ne pinaaǥi zutun te paaǥi ni Jacob, mibmezakel is kandin he menge uyaǥen, ne insivey zin te menge uyaǥen ni Laban.
41 Emun ebpepenpeniwelayè en haazà is menge uyaǥen he memeupiya is lawa ziyà te peinumà, ne ibpasek en maan ni Jacob haazà is beverekà he subpang dutun te egkesineruwan dan.
42 Emun memeluya haazà is menge uyaǥen he ebpepenpeniwelayà, ne kenè din ibpasek haazà is subpang. Umbe egketuusan is ki Laban su memeluya piru is ki Jacob ne memeupiya is menge lawa mulà.
43 Pinaaǥi kayi, midsepian utew si Jacob. Ne utew midmezakel is menge uyaǥen din ragkes is menge kemilyu wey menge asnu. Mezakel zaan is menge suluǥuen din he menge maama wey vahi.