33
Is Kebpeked-uma ni Esau wey ni Jacob
Ne hein kebpantew ni Jacob, neehè din si Esau is ebpelingguma he edumahan te 400 he menge maama. Ne zutun, impedtetepizè din is menge anak din diyà te menge esawa zin he si Lea wey si Raquel, wey ziyà te menge suluǥuen dan he vahi. Ne hein migenat sikandan, impehuna zin is dezuwa he menge suluǥuen din wey is menge anak dan, ne edtinundug si Lea wey is menge anak din, ne midtinundug si Raquel wey is anak din he si Jose. Ne iyan sikandin midhuna te langun kandan ne kepipitu sikandin medlangkeb diyà te tanà dutun te ked-uvey zin diyà te kakey zin.
Ne si Esau mibpelelaǥuy is edsinuǥung ki Jacob ne migkepkepan din ne midhezekan din, ne nekesineǥew zan is dezuwa. Ne hein neehè din is menge vahi wey menge vatà, ne mid-insaan din si Jacob te, “Hentei heini is menge zuma nu?” Ne midtavak si Jacob te, “Iyan heini menge anak ku he imbeǥey kediey te Megbevayà su ingkehizu e zin.” Ne mid-uvey ziyà te ki Esau haazà is dezuwa he suluǥuen he vahi wey is menge anak dan, ne midluhud sikandan he iyan kedtahud dan kandin. Ne midsunud si Lea wey is menge anak din, ne midluhud daan sikandan. Ne iyan nehuziyan he mid-uvey he ed-luhud si Jose wey is iney zin he si Raquel.
Ne mid-insaan ni Esau si Jacob te, “Hengkey is ibpesavut dutun te nesinuǥung ku he grupu te menge uyaǥen nu?” Midtavak si Jacob te, “Ibpayùpayù ku kenikew para mezawat a kenikew.” Ne migkaǥi si Esau te, “Mezakel en is menge azen ku, geli, umbe kenikew zed haazà.” 10 Piru midteǥel ni Jacob, ke sikandin te, “Sigi en, dewata nud haazà. Su emun tutuu he igkeǥaǥew a kenikew dewata nu en is gasa ku kenikew. Su hein kedtengtengi ku te zagwey nu ne henduen be te zagwey te Megbevayà. Ne ǥuntaan te midawat a kenikew, 11 dewata nu en is ibeǥey ku kenikew su nehizuwan a te Megbevayà ne wazà a mekurangi te menge penginehenglanen ku.” Midteǥel ni Jacob si Esau taman te nezawat en nasì ni Esau haazà is igasa zin.
12 Ne migkaǥi si Esau te, “Kuwa kiw en su egenat kiw en. Ebpezumehè kiw en.” 13 Piru midtavak si Jacob te, “Netuenan nu he utew key menaney he edhipanew su memenaney he edhipanew is menge vatà, ne egkesuatan ku zaan he egkepurungan egkeelimahi is menge uyaǥen he edsusuwan. Emun ebpeǥesen ta te kedhipanew is menge uyaǥen te tivuuk he andew ne kela ke mebpematey sikandan. 14 Deyzey ke edhuna ke en kenami. Ednaneynaney key en edsunud kenikew sumalà te kegaan kayi te menge vatà wey te menge uyaǥen he egketundug dey. Diyè kiw en ebpeked-uuma te Seir.” 15 Ne migkaǥi si Esau te, “Emun iyan heeyan, idtaǥak ku nasì is duma he menge sakup ku kenikew.” Midtavak si Jacob te, “Kenè en kinahanglan. Is impurtanti ne midawat a kenikew.” 16 Ne zutun he andew migenat si Esau is ed-ulì diyà te Seir. 17 Piru ziyà mebpevayà ensi Jacob te Sucot, he ke và dà egkeǥiya, “Helungà,” ne hein nekeuma zan diyà, midlelawig si Jacob te helungà te menge uyaǥen din. Umbe Sucot is inngazan dan dutun te inged.
18 Hein neuǥet ne nekeuma sikandan diyà te Canaan puun te Padan Aram he wazà mezaat he neulaula kandan. Nekeuma zan diyà te inged he Shekem. Ne impehitindeg dan dutun is menge tulda zan diyà te uvey zutun te inged. 19 Ne haazà is tanà he mibpehitindeǥan dan te tulda ne mibpemasa ni Jacob diyà te menge anak ni Hamor te 100 he vuuk he pelata. Si Hamor ne iyan amey ni Shekem. 20 Ne zutun mibaal si Jacob te pemuhatà he migngezanan din te El Elohe Israel, he ke và dà egkaǥiya, “Utew mekeǥeǥehem is Megbevayà he ed-ezapen ni Israel.”