41
Inseysey ni Jose is Kehuluǥan te Teǥeinep te Hadì
1 Ne hein midlavey en is dezuwa he tuig ne neketeǥeinep is hadì te Ehipto he edhithitindeg sikandin diyà te veyvey te Wahig he Nilo.
2 Ne neehè din he zuen egaun diyà te wahig he pitu he vaka he utew memeupiya wey memelambù he mibpemenabtab dan te menge sagbet diyà te veyvey.
3 Ne zuen daan neehè din he pitu he vaka he nekesunud he migaun, he memeǥasà wey memezaat.
4 Ne heini is nengehuziyan he vaka he memeǥasà wey memezaat, migkaan dan haazà is nengehuna he utew memelambù wey memeupiya. Ne zutun nepukew haazà is hadì.
5 Ne midlipezeng en maan sikan is hadì ne nekeuman meketeǥeinep. Ne zutun te teǥeinep din duen neehè din he menge pungu he utew memeupiya wey memetiugkey.
6 Ne huziyan dutun duen mibpenuvù he pitu zaan he pungu he mid-ukap dà he nezeetan te keramag he ziyà ebpuun te edsilaan.
7 Ne mibpengeveleng duen te nengepis haazà is pitu he utew memerimiǥas. Ne zutun nepukew haazà is hadì ne teǥeinep dè bes.
8 Ne hein nepawà, utew neliveg haazà is hadì tenged dutun te menge teǥeinep din, ne impetawag din is langun he menge selemengkiru wey uluwanen he menge etew ziyà te ǥinhedian din he Ehipto. Ne midtudtulan din sikandan te menge teǥeinep din, piru wazà minsan hentei kandan he ebpekeseysey zutun te hadì ke hengkey is kehuluǥan dutun.
9 Ne zutun mid-uvayan duen te egalen te pereuwit te vinu sikan is hadì te Ehipto he egkaǥi te, “Netenuzan ku ǥuntaan is menge salè ku.
10 Netenuzan ku is kegkepeuki nu zengan kedì wey zuen te egalen te mememaal te supas, ne impepirisu key kenikew ziyà te valey te kepitan te menge vantey te turuǥan?
11 Sevaha zutun he kezukileman, neketeǥeinep key is dezuwa, ne nekedselekawà is kehuluǥan te teǥeinep dey.
12 Duen duma zey ziyà he kenakan he Hebriyuhanen, he suluǥuen te kepitan te menge vantey te turuǥan. Midtudtul zey kandin is menge teǥeinep dey ne midseysey zin kenami is kehuluǥan dutun.
13 Ne sumalà is kehuluǥan te kada sevaha ne iyan daan neulaula kenami, su siak, impelikù a kenikew kayi te zaan he terebahu ku ne sikan is sevaha, ne impevitey nu.”
14 Ne zutun mibpeveyaan te hadì si Jose, ne segugunà impeǥawas sikandin duen te pirisuwan. Hein nepesazan sikandin te ed-alut wey ebpemarbas, ne mid-ilis sikandin ne mid-etuvang diyà te hadì.
15 Ne migkaǥi is hadì diyà te ki Jose te, “Neketeǥeinep a piru wazà minsan hentei he ebpekeseysey te kehuluǥan din. Duen mibpenudtul kedì he metau ka he edseysey te kehuluǥan te menge teǥeinep.”
16 Ne midtavak si Jose te, “Kenà a iyan, Mahal he Hadì, kekenà, iyan dà is Megbevayà ebpekeveǥey te kehuluǥan te menge teǥeinep he meupiya para kenikew.”
17 Ne migkaǥi zutun te hadì is menge teǥeinep din diyà te ki Jose. Ke sikandin te, “Neteǥeinep ku he ziyà a edhithitindeg te veyvey te Wahig he Nilo.
18 Ne zuen neehè ku he pitu he menge vaka he memeupiya wey memelambù he migaun, ne mibpemenabtab te menge sagbet.
19 Ne netegteǥaad duen migaun daan he pitu he vaka he memezaat wey memeǥasà. Wazà a mekaahà te vaka kayi te tivuuk he ǥinhedian ku he Ehipto te iring dutun te utew mezaat.
20 Ne migkaan dutun te memezaat wey memeǥasà haazà is pitu he memelambù he nengehuna he migaun.
21 Piru hein nekaan dan en, kenà egketuusan he nekaan dan su memeǥasè ded gihapun sikandan. Ne zutun nepukew a.
22 Ne nekeuman a mekelipezeng ne neketeǥeinep ad maan he zutun duen neehè ku he senge puun te parey he trigu he pitu is pungu zin he utew memeupiya wey memetiugkey.
23 Ne zutun midlepew zaan is pitu he pungu he mid-ukap dà he nezeetan te keramag he ziyà ebpuun te edsilaan.
24 Ne haazà is menge pungu he mid-ukap, ne mid-eveleng dan is pitu he pungu he memeupiya. Ne impenudtul ku heini ziyà te menge selemengkiru, iyan, wazà minsan hentei kandan he nekeseysey kediey te kehuluǥan din.”
25 Ne migkaǥi zutun si Jose ziyà te hadì te, “Mahal he Hadì, sebsevaha zà is kehuluǥan duen te zezuwa he teǥeinep nu. Impezayag en kenikew te Megbevayà ke hengkey is ed-ul-ulahan din.
26 Su haazà is pitu he vaka he memelambù wey kes pitu he memetiugkey he menge parey ne sevaha zà is kehuluǥan din he iyan is pitu he tuig.
27 Ne haazà is pitu he vaka he memeǥasà wey memezaat wey haazà is pitu he pungu te parey he mid-ukap ne iyan ibpaalung dutun is pitu he tuig he vitil.
28 Ne haazà he egkehitavù ne iyan en kes migkaǥi ku kenikew, Mahal he Hadì, he impezayag en kenikew te Megbevayà ke hengkey is ed-ul-ulahan din.
29 Puun guntaan ebpekesunud is pitu he tuig he utew zekelà is uzar he parey zini te tivuuk he ǥinhedian te Ehipto.
30 Piru zuen daan pitu he tuig he vitil he ebpekesunud dutun te egkehuna he pitu he tuig ne tenged dutun egkelipatan en haazà is nehuna he menge tuig he zekelà is egkeenen su haazà is bitil ebpekezezaat kayi te tanà te Ehipto.
31 Ne tenged dutun te utew mepait he vitil, ne henduen be te wazà mekesaǥad is tig-Ehipto te zekelà he uzar.
32 Kezezuwa ipeteǥeinep te Megbevayà kenikew, Mahal he Hadì, su ibpesavut din he siguradu he ed-ul-ulahan din haazà wey meǥaan en utew is kegkeul-ulaha zuen.
33 “Umbe, Mahal he Hadì, kinahanglan he ebpen-ahaan nu is sevaha he etew he uluwanen para egkehimu he iyan edumala te tanà te Ehipto.
34 Ne kinahanglan daan he zuen ebpilien nu he menge egalen dini te tivuuk he Ehipto para ibpepenukut te ikelima he vahin te langun he egkeraǥun seled te pitu he tuig he zekelà is uzar.
35 Kinahanglan he ibeǥey nu kandan is keǥehem wey zan mekepenguwa te egkeenen dutun te menge tuig he meupiya is menge abut su wey zan ikepezerengdeng wey ikepeventayi kandan seled te menge inged.
36 Ne haazà is iderengdeng, ne egkehimu he iyan egkeenen te menge meǥinged dini te Ehipto emun ed-aǥi en is pitu he tuig he vitil, su wey kenà sikandan mengevitil.”
37 Ne haazà is hadì wey is menge upisyal zin, ingkesuat dan utew heini is sambag ni Jose.
38 Ne migkaǥi haazà is hadì diyà te menge upisyal zin te, “Wazè en duma pa he egkeehè tew he iring ki Jose su mid-ulinan iyan sikandin te Megbevayà.”
39 Ne migkeǥiyan din si Jose te, “Geina te iyan ka kes mibpezayaǥan te Megbevayà te langun kayi, nesavut dey he wazà duma pa he etew he metau wey zuen din kedsavut he iring kenikew.
40 Edhimuwen ku sikew he iyan ebayàbayà te turuǥan ku ne kinahanglan he ebpevayàbayà kenikew is minsan hentei he sakup ku. Iyan e zà lavew kenikew su iyan a hadì.”
41 Ne mid-uman megkaǥi is hadì diyà te ki Jose te, “Idsarig ku en kenikew ǥuntaan is kebayàbayà te tivuuk he ǥinhedian ku he Ehipto.”
42 Ne mibpul-ut dutun te hadì is sising din he iyan tuus te keǥehem din he insarig din ki Jose. Mibpesun-uzan din si Jose te utew mahal he manggad he meputì ne mibpevelieǥan din sikandin te rantey he vulawan.
43 Ne insuǥù din he ibpeuntud si Jose te ikezuwa he lavew he kerwahi zin, ne insuǥù din daan he zuen menge etew he edhuna ki Jose wey zan mekevensag te, “Luhud kew!” Ne iyan haazà neulaula hein insarig duen te hadì te Ehipto ki Jose is kebayàbayà te tivuuk he ǥinhedian din he Ehipto.
44 Ne migkeǥiyan te hadì si Jose te, “Minsan pa te iyan a sikan is hadì, wazà minsan hentei he menge sakup ku kayi te tivuuk he ǥinhedian ku he Ehipto he ebpekeulaula te minsan hengkey emun kenè nu idtuǥut.”
45 Ne migngezanan dutun te hadì si Jose te si Zafenat Panea, ne impepengesawa zin ki Asenat he anak ni Potifera he iyan lavew he memumuhat diyà te inged he On. Ne nehimu si Jose he gubirnedur te tivuuk he ǥinhedian te Ehipto.
46 Mibpenuiǥen dutun si Jose te 30 zutun te timpu te kedhimuwa kandin he lavew he upisyal te hadì. Ne mid-awà sikandin dutun te etuvangan te hadì ne midhipanew he midtukid din susiya is langun he menge inged diyà te Ehipto.
47 Ne zutun te netagnà he pitu he tuig he zekelà is uzar, dekelà iyan is menge abut dan diyà te menge tanè dan.
48 Ne heini he menge tuig, impetiǥum ni Jose is langun he nekulikta he ebpuun te menge neraǥun. Ne impezerengdeng din diyà te kada inged is menge neraǥun he ebpuun te menge vevesukà diyà te pelingut kayi.
49 Utew zekelà he parey he trigu is impezerengdeng ni Jose; iring kezekelà haazà is parey te pantad diyà te veyvey te zaǥat. Ne ǥeina te utew haazà dekelà mid-engkezan en ni Jose is kedtimbanga wey kebilanga zuen su kenè en egkengevilang.
50 Ne te wazè pa meuma sikan is pitu he tuig he vitil duen dezuwa he anak he maama ni Jose he in-anak te esawa zin he si Asenat, sikan is anak ni Potifera he memumuhat diyà te On.
51 Is kakey he anak ni Jose, ne migngezanan din ki Manase su ke sikandin te, “Geina te midhimu te Megbevayà he melipati ku is langun he menge keseengan ku wey is kebulunga ku te amey ku wey menge kezuzumahi ku.”
52 Ne haazà is hazi he anak din, migngezanan din ki Efraim su ke sikandin te, “Midhimu te Megbevayà he mebmeuswaǥen a zini te tanà he mezakel is menge kemereǥenan ku.”
53 Ne nepangkus haazà is pitu he tuig he utew zekelà is neraǥun diyà te Ehipto,
54 ne neume en haazà is pitu he tuig he vitil sumalà is netagnà ni Jose. Mibitil is menge meǥinged te minsan hendei he ǥinhedian, iyan, duen mulà egkeenen diyà te ǥinhedian he Ehipto.
55 Ne hein neǥezam en te langun he menge tig-Ehipto is bitil midhengyuan dan is hadì dan he veǥayi sikandan te egkeenen. Ne migkeǥiyan din sikandan te, “Hendiyè kew te ki Jose ne veeli niw is egkeǥiyen din.”
56 Ne hein nekeeneb en is bitil ziyà te tivuuk he ǥinhedian, mibpepuwasan ni Jose is menge budiga ne mibelegyà te egkeenen diyà te menge tig-Ehipto su utew en mepait is bitil ziyà te tivuuk he Ehipto.
57 Ne zuen menge etew he ebpuun te langun he menge zuma he ǥinhedian ne midhendiyè dan te Ehipto, su ebpemasa zan te egkeenen diyà te ki Jose, su mepait daan is bitil ziyà te minsan hendei he lugar.