11
Is Melinew he Ginhedian
1 Is menge kevuwazan ni David he menge hadì dengan, iring sikandan te mibpiley he kayu. Ne ǥeina te neneringsing en guntaan is tued kayi, duen gihapun kevuwazan daan ni David he egeraran te Subpang. Egkehimu sikandin he veǥu he hadì tew.
2 Edumelahan sikandin te Mulin-ulin te Nengazen su wey meveǥayi sikandin te ketau, kedsavut, ebilidad te kebpelanu, gehem, keuluwanen, wey kedtahud diyà te Nengazen.
3 Ne igkelipey zin is kedtahud te Nengazen. Kenà sikandin edhukum tenged dà te neehè din etawa nengezineg din he tudtul, kekenà,
4 ebeǥayan din te metazeng he kukuman is menge pubri ne edlevanan din sikandan pinaaǥi te kebeǥey kandan te ketenged dan. Ne pinaaǥi te kebmandù din, edsilut sikandin kayi te kelibutan ne ebpematey is lalung he menge etew.
5 Layun diyà te kandin is ketazeng wey kegkeseriǥi, iring te idseluub din heini.
6 Duen kelinew zutun te kedhadì din. Ne zutun ebpeemurà is dumezaas he menge asu wey is menge kerehidu. Edleku is liyupardu zuma te menge kambing. Ebpezumahà is nati he vaka wey is anak te erimaung, ne iyan ed-atur kandan is dezeisey pa he menge vatà.
7 Ebpezumahà is baka wey is bir emun egkaan dan, ne is menge nati zan ebpezumdumahà he ebpemenleku. Is erimaung ebpenabtab te reǥami iring te vaka.
8 Minsan egusà is batà diyà te uvey te vudsi te uled he edhereg, etawa idsikep din dutun is belad din, ne kena sikandin egkemenu.
9 Wazè en ebpesipala etawa ebpendezaat te segradu he vuvungan ku. Su is menge linimbag kayi te kelibutan egkepurung egketeǥui te keuluwanen mehitenged te Nengazen, iring te kegkepenua te zaǥat te wahig.
10 Egkeuma is andew he is beǥu he hadì he kevuwazan ni David, egkeiring te bendirà he iyan tuus te menge etew ziyà te menge nasyun he kinahanglan edtiǥum dan. Edtiǥum dan diyà te kandin. Ne egkevantug is ubpeey zin.
11 Dutun daan he timpu, ed-umanan egemita te Nengazen is gehem din te kebpeulì te nesamà he menge etew zin diyà te Asiria, Ehipto, Patros, Etiopia, Elam. Babilonia, Hamat, wey is diyà te menge pulu.
12 Ibayew te Nengazen is sevaha he bendirà su ibpeehè din te menge nasyun he edtiǥumen din en is menge etew zin diyà te Israel wey Juda he ebpuun te nekedseselekawà he vahin te kelibutan.
13 Egkeawà is kesina te Israel te Juda ne kenè dan en edtebek.
14 Edsevaha sikandan te kedsurung te menge Filistihanen diyè dapit te edsenlepan. Edsurungen dan daan is menge nasyun diyà te edsilaan ne edtevanen dan is menge azen kayi. Edsekupen dan is Edom wey Moab, ne is menge Amunihanen ebpesakup daan kandan.
15 Ebpekemezahan te Nengazen is Daǥat te Ehipto, ne ebpekeremaǥan din te meinit he keramag is Wahig he Eufrates para mehimu zà heini he pitu he zezeisey he menge zal-ug para egkehimu zà heini he edrepasen te etew he edlayun.
16 Ne iring te zuen meluag he zalan he mid-ikul te menge etew te Israel hein mid-awà sikandan diyà te Ehipto, ne zuen daan meluag he zalan he egkeikul te menge nesamà he menge etew zin diyà te Asiria.