19
Is Lalag Mehitenged te Ehipto
1 Heini he menge lalag ne mehitenged te Ehipto:
Pemineg kew! Ed-untud is Nengazen te meǥaan he ǥapun su edhendiyà sikandin te Ehipto. Ne emun ebpekeume en, ne ebpengerkeren te kegkahandek is menge ed-ezapen diyà te Ehipto, ne egkeheratan is menge Ehiptohanen.
2 Migkaǥi is Nengazen te, “Ibped-uney ku ibpedtetebek is menge Ehiptohanen: suled kuntra te suled, siringan kuntra te siringan, inged kuntra te inged, wey ginhedian kuntra te ginhedian.
3 Egkaawà is kevurut te menge Ehiptohanen, ne edhimuwen ku he meliveg sikandan is ebpelanu. Edangep dan diyà te menge ed-ezapen dan, diyà te menge ǥimukud te nemematey en, diyà te menge veyilan, wey menge etew he edsarig te menge mulin-ulin.
4 Ibpezizalem ku sikandan te gehem te mesipala he hadì.” Iyan heini migkaǥi te Nengazen he MEGBEVAYÀ he Mekeǥeǥehem.
5 Ebmevavew is Wahig he Nilo taman te egkemezahan heini.
6 Ebmengazeg is menge edtudaan dutun te wahig wey egkemezahan heini. Egkengeǥangu is menge memelayat he menge sagbet,
7 ragkes is menge pinemula ziyà te veyvey te Wahig he Nilo. Ebadtik is langun he menge vevesukà diyà te uvey te Wahig he Nilo, ne ebpematey is menge pinemula kayi.
8 Edsineǥew wey ebpenhulùhulù is menge mengingisdà diyà te Wahig he Nilo,
9 ne edlalew is menge mememaal te manggad he linu.
10 Egkeseeng is menge mengengavel wey is duma he menge terebahanti.
11 Menge tulebung is menge upisyal ziyà te Zoan! Egkilelaan sikandan he kinemeteuwan he menge sumesambag te hadì te Ehipto, piru wazà pulus te menge sambag dan. Ne kenà sikandan ereg he egkaǥi te, “Menge kevuwazan key te uluwanen he menge etew wey menge hadì dengan.”
12 Sikew is hadì te Ehipto, hendei en is uluwanen he menge etew nu? Emun uluwanen sikandan, ne ipekaǥi kandan ke hengkey is pelanu te Nengazen he Mekeǥeǥehem para te Ehipto.
13 Utew menge tulebung is menge upisyal ziyà te Zoan, wey is menge upisyal ziyà te Memfis egkehimu he edigdiǥen. Iyan pezem sikandan sikan is menge pengulu he ereg he egiya te menge etew ziyà te Ehipto, piru iyan en hinuun sikandan midtazin kayi he menge etew.
14 Edlivegen te Nengazen is menge Ehiptohanen. Egkengeliveg sikandan te langun he ebeelan dan. Iring sikandan te egkelangut he ebpekeziregdireg is ebpekeutà.
15 Wazà minsan sevaha ziyà te Ehipto he ebpekehimu he ebpekelibri te nasyun dan, sepian man etawa pubri, dungganen man etawa kenà dungganen.
16 Dutun he timpu, is menge Ehiptohanen egkehimu he meluya iring te vahi. Ebpengerkeren sikandan tenged te kegkahandek dan te silut he idsilut kandan te Nengazen he Mekeǥeǥehem.
17 Igkahandek dan is Juda, minsan egkezineg dan dà is kegngezani kayi ne egkengeheratan en sikandan. Egkeulaula heini tenged te pelanu te Nengazen he Mekeǥeǥehem he nekesuǥat diyà te kandan.
18 Dutun daan he timpu is menge meǥinged diyà te lelima he inged diyà te Ehipto edsunud en te Nengazen he Mekeǥeǥehem, ne Hebriyuhanen is kineǥiyan he egemiten dan. Is sevaha kayi he inged egngezanan te Inged te Andew.
19 Dutun he timpu ebengunen is pemuhatà para te Nengazen diyà te teliwazà te tanà he Ehipto, ne ibpelastar zaan is tedeman he vatu ziyà te dulunà kayi.
20 Egkehimu heini he tuus wey pengintutuu he zutun is Nengazen he Mekeǥeǥehem te tanà he Ehipto. Emun ebuyù te tavang is menge Ehiptohanen diyà te Nengazen tenged te kebpeentusa wey kedèdaaǥa kandan, edsuǥù sikandin te ebpekelibri wey ebpekepengalang kandan.
21 Ibpekilala te Nengazen is keugelingen din diyà te kandan, ne zutun he timpu egkilelaan dan is Nengazen. Ed-ezapen dan sikandin pinaaǥi te kebpemuhat te nekedseselekawà he menge pemuhat. Ebpenaad dan diyà te Nengazen ne edtumanen dan heini.
22 Edsilutan te Nengazen is menge Ehiptohanen pinaaǥi te kebpeeǥiya zin te vangkit diyà te kandan, piru ebewian din sikandan. Edangep sikandan diyà te kandin, ne ebpemineǥen din is menge kebpengemuyù dan ne ebewian din sikandan.
23 Dutun he timpu zuen meluag he zalan he ebpuun te Ehipto pehendiyà te Asiria. Umbe ebpekedsusuvar zà is menge Ehiptohanen wey menge Asiryanhen, ne edsevaha sikandan te kedsimba.
24 Dutun he timpu ebpekidsevaha is Israel te Ehipto wey Asiria, ne heini is tetelu he nasyun egkehimu he tuvad te kelibutan.
25 Ebpenubtuvazan sikandan te Nengazen he Mekeǥeǥehem he edhenduen te, “Ebpenubtuvazan ku is menge Ehiptohanen he menge etew ku, is menge Asiryanhen he menge linimbag ku, wey is menge Israilihanen he ǥaked ku.”