22
Is Lalag Mehitenged te Jerusalem
1 Heini he menge lalag ne mehitenged te suǥud-suǥud he zuen duen egkengelewasan:
Hengkey is nehitavù. Maan is nemenahik kew is langun diyà te menge atep?
2 Negurigew wey nemengulahì is menge etew ziyà te tivuuk he inged. Is nemematey keniyu ne wazà mebpatey te tebek.
3 Nemelaǥuy is langun he menge pengulu niw, ne utew zà sikandan meǥaan nezekepi. Is duma keniyu neninguhà he mekepelaǥuy, piru nezekepan gihapun.
4 Guntaan, bey-ani ad keniyu ke edsineǥawan ku is menge siringan ku he nemematey. Kenà ad keniyu lengana.
5 Su iyan en heini timpu he midtelaan te Nengazen he MEGBEVAYÀ he Mekeǥeǥehem he timpu te kegkegurigew, kebpemelaǥuy, wey kegkengeliveǥi te menge etew ziyà te suǥud-suǥud he zutun duen egkengelewasan. Egkengetempag is menge verengbeng kayi, ne is kulehian te menge etew ebpekeuma is kegkezineǥa zuen diyà te menge vuvungan.
6 Nenurung is menge sundaru he tig-Elam he ebpemen-untud te menge kudà he zuen dan menge panà. Is menge sundaru ziyà te Kir nenurung daan he zuen dan egewazan he menge kelasag.
7 Edliǥuyan dan is uuzaran he menge suǥud diyà te keniyu, ne ed-amur-amur zan diyà te menge pultahan te inged niw.
8 Naaǥew zan is menge pengalang te Juda.
Dutun he andew migkuwa kew te menge ǥumaan niw ziyà te teleǥuey kayi.
9 Mid-ehè niw is menge verengbeng te Inged ni David su wey niw metueni ke hendei is nengeǥevà kayi. Midtiǥum kew te wahig he ebpuun diyà te peneng he ziyà te alug.
10 Mid-ehè niw is menge valey ziyà te Jerusalem ne midrundus niw is duma zutun su egemiten niw is menge vatu zuen te kebpurung te verengbeng te inged.
11 Mibaal kew te punduwà te wahig diyà te mid-elangan te zezuwa he verengbeng, su para egketiǥum dutun is wahig he ebpuun diyà te zaan he peneng. Iyan, wazà kew medsarig wey medseǥipà te Megbevayà he iyan mibpelanu kayi, wey iyan mibayàbayà te kegkehitevùa kayi.
12 Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.
13 Piru midlipey kew wey midsilibra kew hinuun. Midlapè kew te menge vaka wey menge kerehidu, ne migkaan kew te usa wey mid-inum kew te vinu. Ke sikiyu te, “Egkaan kiw wey edlipey kiw su kela ke mebpatey kiw en keeselem.”
14 Migkaǥi is Nengazen he Mekeǥeǥehem kayi te kediey te heini is salè niw kenè din ebpeseyluwen taman te kebpatey niw.
Is Lalag para ki Shebna
15 Midsuǥù a te Nengazen he MEGBEVAYÀ he Mekeǥeǥehem te kedhendiyà te ki Shebna, he iyan edumala te turuǥan, ne egkeǥiyen heini ziyà te kandin:
16 “Hentei ka is edturtur keniyan te kelendiǥan te para te edlevengan kenikew zuma te dungganen he menge etew? Hentei is midtuǥut kenikew te kebaal keniyan?
17 Bantey ka su minsan mekeǥeǥehem ka, ne edekepen ka te Nengazen, ne idtimbag ke zin.
18 Egketilengtileng ka he iring te vula ne idtimbag ke zin diyà te meluag he lugar. Ne ebpatey ka zutun, ne egkengewaǥey zaan dutun is ibpahambug nu he menge kerwahi. Mibeǥayan nu te keelezan is pemilya te egalen nu.
19 Migkaǥi is Nengazen diyà te kenikew te, ‘Ibpeawè ku sikew ziyà te terebahu nu!
20 Dutun he andew ibpetawag ku is suluǥuen ku he si Eliakim he anak ni Hilkia.
21 Ibpeǥamit ku kandin is bisti nu, wey vakes nu he para te kegkeupisyal nu, ne ibeǥey ku kandin is keǥehem nu. Ne egkeiring sikandin te amey te menge tig-Jerusalem wey menge tig-Juda.
22 Idsarig ku kandin is yawi te ginhedian ni David. Is ebpuwasan din ne wazà duen ebpekelekeb ne is edlekevan din ne wazà duen ebpekepuwas.
23 Edhimuwen ku sikandin he melig-en diyà te ketengdanan din iring te senggatà diyà te elavat. Ne ebpekeveǥey sikandin te zengeg diyà te pemilya zin.
24 Ne is tivuuk he pemilya zin wey menge kezuzumahi zin ne edsarig kandin. Iring sikandin te selenggatà he zutun isanggat is nekedseselekawà he zezeisey he menge teleǥuey, puun te menge yehung pehendiyà te menge tivud.
25 Ne emun mahabet en is idsanggat dutun, ne egketangtang haazà is selenggatà ne egkengeulug wey egkengewaǥey is langun he insanggat dutun. Egkeulaula heini su iyan a is Nengazen migkaǥi kayi.’ ”