27
1 Dutun he timpu, egemiten te Nengazen is meǥarang wey mekeǥeǥehem he ispada zin te kedhimatey te Leviatan, kes edlayewlayew he langgam diyà te zaǥat.
2 Dutun daan he timpu, egkanta kew mehitenged te zekelà he sebpet he egkekuwa niw ziyà te pemuleey niw te paras.
3 Iyan a, is Nengazen, mid-etiman keniyan he pemuleey te paras. Layun ku heini ebinyaǥi. Ebentayan ku heini te maandew wey mezukilem su para wazà ebpekezezaat kayi.
4 Naawè en is pauk ku kayi he pemuleey. Piru emun duen egkeehè ku ziyà te kandin he zuǥiyen he zezeisey he menge kayu, egkuntedahan ku sikandin ne ebinsulan ku.
5 Piru egkelibri sikandin emun ebpekid-emiǥu sikandin kediey, ne edhangyù he pengelangi ku.
6 Egkeuma is timpu he zutun is menge tig-Israel, he menge kevuwazan ni Jacob, ebpendalid iring te pinemula. Ebpeneringsing heini wey ebpengevukad. Ebpemeǥas heini te mahabet ne ebpekeeneb te tivuuk he kelibutan.
7 Wazà siluti wey wazà penhimetayi te Nengazen is menge tig-Israel iring te kedsiluti zin wey kebpenhimetayi zin te menge kuntada zan.
8 Impevihag te Nengazen is menge etew zin su iyan silut din kandan. Midsegseg din sikandan pinaaǥi te kegkesuǥata kandan te mevendes he keramag he ebpuun te edsilaan.
9 Wey zà sikandan egkepesaylu emun edrupeten dan is menge vatu he pemuhatè dan, ne ebekbeken dan heini, wey id-awè dan is menge tukud he simbulu te ed-ezapen he si Ashera, wey is menge pemuhatà he edtutungan dan te veyewà.
10 Nevengkag en is inged he neliǥuy te verengbeng. Nehimu en heini he mekevulungbulung iring te sibsivayan, ne wazè en ed-ubpà kayi. Nehimu zà heini he penebtavà wey himelayà te menge vaka. Ed-eminen edtebtava te menge vaka is menge zahun te menge subpang.
11 Ne hein nengeǥangu en haazà is menge subpang ne nengevadtì heini, ne ed-em-emuren te menge vahi su wey iketavun. Su is menge etew kayi he inged ne wazè dan kedsavut, kenà sikandan egkehizuwan te Megbevayà he mibaal kandan.
12 Emun egkeume en haazà, edtiǥumen te Nengazen is menge Israilihanen puun te Wahig he Eufrates taman te zal-ug te Ehipto he iring te kedtiǥum te ginunas he trigu.
13 Dutun he timpu ibpezaǥing is mezaǥing he vudyung. Ne ebpemenlikù diyà te Jerusalem is menge Israilihanen he nekaantus te kegkevihaǥa kandan diyà te Asiria wey Ehipto. Ne ed-ezapen dan is Nengazen, diyà te segradu he vuvungan diyà te Jerusalem.