30
Is Neuyunan te Juda wey Ehipto he Wazà Pulus
1 Migkaǥi is Nengazen te, “Mekehizuhizu is menge anak ku he menge mesinukulen. Mibpelanu sikandan te menge pelanu he supak te egkesuatan ku. Nekid-uyun sikandan te zuma te kandan dà he ketau, ne kenà kediey. Umbe mid-iseg medekelà is salè dan.
2 Midhendiyà sikandan te Ehipto su ebpelavan dan te hadì, ne wazè en sikandan mebpekisambag kedì.
3 Piru egkepeel-elezan dà sikandan dutun te kebpelavan dan te hadì te Ehipto.
4 Su minsan pa te nekeuma ziyà te Zoan wey Hanes is gehem te hadì te Ehipto,
5 egkepeel-elezan dà is menge tig-Juda su is menge etew ziyà te Ehipto wazè dan pulus. Wazà kayi igketavang kekenà, ebpekeveǥey zà sikandan te keelezan.”
6 Iyan heini menge lalag te Megbevayà mehitenged te menge langgam diyà te Negev: Ingkevayà te menge tig-Juda is sibsivayan he mereǥen he ibayà, he zuen menge erimaung, wey edhereg he menge uled, wey henduen be te ebpemenlayang. Igkarga zan te menge asnu wey menge kemilyu is menge ketiǥeyunan dan su igasa zan diyà te Ehipto he kenà ebpeketavang kandan.
7 Is tavang te nasyun he Ehipto, ne wazè din pulus. Umbe egngezanan ku heini te “Dragun he Midleku.”
8 Migkaǥi is Nengazen kayi te kedì te, “Genat ka, isurat nu ziyà te libru is egkeǥiyen ku he ebpekesuǥat te menge Israilihanen su wey zuen pengintutuu ziyà te menge etew te huziyan he timpu. Egkehimu heini he wazè din pidtemanan he pengintutuu te kelelalung dan.
9 Su menge mesinupaken sikandan, menge teruen, wey kenà egkesuat he ebpemineg te menge penurù ku.
10 Migkeǥiyan dan is menge ebpeneuven ku te, ‘Kenè niw en tudtula ziyà te kenami is impezayag te Megbevayà diyà te keniyu. Kenè key en keniyu keǥiyi te hustu. Iyan tudtula niw kenami is ebpekelipey kenami wey is menge nelewasan niw he kenà egkehitavù.
11 Awè kew ziyà te ibayè dey, kenè key keniyu elangi. Kenè key en keniyu tudtuli mehitenged te Waǥas he Megbevayà te Israel.’ ”
12 Umbe, migkaǥi is Waǥas he Megbevayà te Israel te, “Geina te inselikwey niw is menge lalag ku wey midsarig kew te kebpendaagdaag niw wey kebpenlimbung niw,
13 segugunè kew egkezeeti. Is salè niw egkeiring te veka te metikang he verengbeng.
14 Egkerupet kew iring te ziniyun he egkepurung egkerupet ne wazè en keving kayi he egkehimu he idsekilut te vaǥa ziyà te avu etawa idsekilut te wahig diyà te teleǥuey zuen.”
15 Migkaǥi pa is Nengazen he MEGBEVAYÀ, is Waǥas he Megbevayà te Israel te, “Likù kew kayi te kediey ne ipehulenè niw is gehinawa niw su edlibriyen ku sikiyu. Pekelinew kew ne sarig kew kedì su edlig-enan ku sikiyu. Piru kenè niw heini egkesuatan te ebaal.
16 Migkaǥi kew hinuun te, ‘Ebpeleǥuyan dey is menge kuntada zey pinaaǥi te menge kudà he mezesen he ebpelelaǥuy.’ Uya, ebpelaǥuy kew, piru edhuna pa he meǥaan is edal-as keniyu.
17 Is kebpenhulgà te sevaha kandan ne ibpekepelaǥuy te nengkelibu he menge sundaru niw. Ne is kebpenhulgà te lelima kandan ibpekepelaǥuy niw te langun. Egkeiring kew te tukud te bendirà he sebsevaha zà diyà te puntur te vuntud.”
18 Piru edtaǥad is Nengazen te ked-uvey niw ziyà te kandin su para ikepeehè din is hizu zin keniyu. Andam sikandin he ebpaahà te kegkeipeng din keniyu. Su is Nengazen, metazeng he Megbevayà, ne utew zeyzey is langun he midsarig diyà te kandin.
19 Sikiyu is menge etew ziyà te Zion he menge meǥinged diyà te Jerusalem, kenè kew en ebpekeuman ebpekesineǥew! Egkehizuwan kew te Nengazen, emun ebpetavang kew kandin. Emun egkezineg din is pengemuyù niw, ne edtevaken kew zin.
20 Minsan imbeǥey te Nengazen keniyu is kemeresayan wey kelised he henduen be te iyan en heini keenen niw wey inumen niw, iyan sikandin is menunudlù niw ne kenè kew zin en human ed-elesan. Egkeehè niw sikandin
21 wey egkezineg niw is laǥeng din he iyan egiya keniyu ziyà te hustu he zalan, minsan hendei kew.
22 Igkeremerik niw en is menge ed-ezapen niw he mibpekeplaan te pelata wey vulawan. Idtimbag niw heini iring te meremerik he terapu, ne egkaǥi kew te, “Kenè ku en sikiyu egkesuatan te ed-ahà!”
23 Ebeǥayan kew te Nengazen te uzan dutun te timpu te kebpemula, ne ed-uzaren kew. Dutun he timpu ebpenabtab is menge ayam niw ziyà te meluag he menge penebtavà.
24 Is menge vaka niw wey menge asnu he para te id-eradu, ebpenabtab te igketaami zan he kumpey.
25 Dutun te andew te kebpenhimetayi te menge kuntada niw wey kedrundusa te menge turi zan, edtudà is wahig diyà te kada metikang he vuntud wey vuvungan.
26 Is kerayag te vulan egkehimu he iring te kerayag te andew, ne is kerayag te andew ne kepipitu egketakep, iring kerayag te kerayag te pitu he andew he impedtempuwà. Egkeulaula heini zutun te timpu te kebewii te Nengazen te menge palì he nehimu tenged te kedletiguwa zin keniyu te menge etew zin.
27 Pemineg kew! Edhendini is Nengazen he ebpuun diyà te meziyù he utew egkepauk, ne neliǥuy sikandin te evel. Is menge lalag din he egkezumahan te pauk he henduen be te edriyubriyub he hapuy.
28 Is gehinawa zin iring te zalem he teǥelieg. Edezeetan din is menge nasyun he henduen be te ebpesiriyen din iring te trigu. Iring sikandan te uyaǥen he mibusalan wey miguyud.
29 Piru sikiyu is menge etew te Megbevayà egkanta kew mulà iring te layun niw ebeeli zutun te mezukilem he edsilibrahan niw is pista te kebeǥayi te Nengazen te zengeg. Edlipey kew mulà iring te menge etew he ebmartsa he egkumpas te zaǥing te pulalà dutun te kedhendiyè dan te Buntud te Nengazen te ked-azap kandin te vatu he endilungà te Israel.
30 Ibpezineg te Nengazen is mezaǥing he laǥeng din, wey ibpeehè din is belad din he andam en he edsilut tenged te utew zin kegkepauk. Egkezumahan heini te edriyubriyub he hapuy, egketik-ew he kedtanà te uzan, kebpenruǥung wey kebpengilat, wey ked-uzan te ǥiyew he iring kengezekelà te menge vatu.
31 Siguradu he egkahandek is menge tig-Asiria emun egkezineg dan is laǥeng te Nengazen. Ebpurungan din sikandan edsiluti.
32 Edsurungen din sikandan. Ne kada sikandan edlegkuta te Nengazen ne eduyuǥan haazà te zaǥing te tamburin wey alpa.
33 Neuǥet en he naandam is lugar he zutun ebinsuli is hadì te Asiria. Meluag wey mezalem heini he lugar, ne zutun dekelà is hapuy wey kayu he tavun. Is gehinawa te Nengazen he iring te edriyubriyub he esupri ne iyan ebpekeregreg duen te tavun.