34
Edsilutan te Megbevayà is menge Kuntada Zin
1 Uvey kew, is menge etew ziyà te menge nasyun, ne purung kew pemineg. Is tivuuk he kelibutan wey is langun he netaǥù kayi, kinahanglan he mebpemineg.
2 Su nepeukan te Nengazen is langun he menge meǥinged diyà te menge nasyun; nepeukan din is menge sundaru zan. Umbe ebpurungan din sikandan edezeeti, ne ebpenhimetayan din sikandan is langun.
3 Kenè en idleveng is menge lawa zan, umbe edsengew is kemahù kayi, ne edranew is lengesa ziyà te menge vuvungan.
4 Egketunew is langun he ziyà te langit, ne egkelulun is langit iring te papil. Egkengeulug is menge vituen iring te neǥangu he menge zahun te paras wey higus he egketaktak.
5 Ne emun egkepasad en te egamit te Nengazen is ispada zin diyà te langit, ne ebpenaug en sikandin diyà te Edom he zutun is menge etew he edezeetan din su edsilutan din sikandan.
6 Is ispada te Nengazen egkelupit te lengesa wey tavà, egkeiring te egemiten te kedlapà te menge ibpemuhat he kambing wey kerehidu. Su ebpenhimetayan te Nengazen is menge etew ziyà te Bozra ne pemuhat haazà diyà te kandin. Mahabet is ebpenhimetayan din diyà te zuma pa he menge inged diyà te Edom.
7 Ebpenhimetayan din daan is mekeǥeǥehem he menge etew he henduen be te menge tudu te vaka. Ebpeketambù diyà te tanè dan is lengesa wey tavà.
8 Su zuen timpu he idteǥana te Nengazen he zutun ebelesan din is menge kuntada zin su edtevangan din is menge tig-Jerusalem.
9 Is menge zal-ug diyà te Edom, egkehimu he ispaltu, ne is tanà ne egkehimu he esupri. Is tivuuk he nasyun egkehimu he ispaltu he egkeregreg.
10 Ne kenà heini egkeevukan te maandew wey mezukilem. Is evel kayi edlipuwak te wazà pidtemanan. Wazè en ed-ubpà wey edsaǥad diyà te Edom taman te taman.
11 Ed-ubpaan dà heini te menge ekang wey menge uwak. Mibpelenuwan en te Nengazen is ked-ewaa zin te purma wey taǥù kayi.
12 Egngezanan heini te, “Wazè din Pulus he Ginhedian.” Egkahanew is langun he menge ebpemendumala kayi.
13 Ebpenuvuan dà te menge zuǥiyen he zezeisey he kayu is binerengbeng he menge inged dan wey is melig-en he menge vahin kayi. Ne ed-ubpà dutun is menge ekang wey is leew he menge asu.
14 Is leew he menge langgam wey is dumezaas he menge langgam he henduen be te menge asu, ne ebpeked-uuma zutun. Is leew he menge kambing ebpengumew zutun te menge zuma zan, ne is menge langgam he mezukilem dà is kegawas dan, edhendutun su edhimeley.
15 Is menge ekang, edsesalag dutun, ed-impis, ebpesà, ne edipinsahan dan is menge pispis dan pinaaǥi te kedlekupi zan duen. Edhendutun daan is menge uwak he ebparisparis.
16 Ahaa niw is libru te Nengazen ne vesaha niw. Wazà minsan hengkey he migkaǥi ku he kenà egketuman. Wazà minsan sevaha he egkaawà kayi he menge langgam, ne wazà sevaha kandan he wazè din paris. Su iyan heini kebayà te Nengazen, ne iyan mismu sikandin edtiǥum kayi he menge langgam.
17 Inteǥana zin en is tanà he imbahin din te menge langgam. Ne egkaangken dan heini taman te taman, ne zutun dan ebpekeubpà te wazà pidtemanan.