36
Midsurung te Tig-Asiria is Juda
(2 Menge Hadì 18:13-27; 2 Cronica 32:1-19)
1 Hein ike-14 he tuig te kedhadì ni Hezekia ziyà te Juda, midsurung ni Hadì Senakerib he hadì te Asiria is langun he vinerengbeng he menge inged diyà te Juda, ne naaǥew zin heini.
2 Ne zutun te ziyà si Senakerib te Lakish, midsuǥù din is peremandar te menge sundaru zin duma te mahabet he menge sundaru he menge sakup din te kedhendiyà te Jerusalem te kebpekidhinguma ki Hadì Hezekia. Ne hein diyè en is peremandar te gawas te inged he Jerusalem, diyà sikandan mebpundu te uvey te veyeey te wahig he ebpuun diyà te egkezivavew he peneng, he ziyà dapit te zalan he ibpenhendiyà te pemìpiey.
3 Midhendiyà te kandin si Eliakim he anak ni Hilkia, te edumala te turuǥan, si Shebna he sikritaryu, wey si Joa he anak ni Asaf, he sineriǥan te menge libru te ginhedian.
4 Migkaǥi ziyà te kandan sikan is peremandar te menge sundaru te, “Keǥiyi niw si Hezekia he iyan heini egkeǥiyen duen te mekeǥeǥehem he hadì te Asiria:
“Hengkey is edseriǥan nu?
5 Egkeisip nu ve he ebpekezaag ka te tebek pinaaǥi zà te lalag, ne kenà pinaaǥi te ebilidad wey zesen te menge sundaru nu? Hentei is edseriǥan nu he iyan ibpekidsulè nu kediey?
6 Iyan be is Ehipto? Heini he nasyun wey is hadì duen, iring dà te nevadtì he tuked he emun idtutuked nu ne ebpekepalì te belad nu.
7 Kela ke iyan egkeǥiyen nu kayi te kedì is iyan edseriǥan niw is Nengazen he Megbevayè niw. Kenè be imperundus nu man is menge simbahan he para kandin diyà te metikang he menge lugar ragkes en is menge pemuhatà kayi, ne migkeǥiyan nu is menge meǥinged diyà te Juda wey Jerusalem he kinahanglan he ziyè dan dà med-azap te sevaha zà he pemuhatà?”
8 Impelaus dutun te peremandar is lalag din, “Ne guntaan keǥiyi niw is hadì niw he zuen idhanyag kandin te egalen ku he hadì te Asiria. Ebeǥayan dey sikandin te 2,000 he menge kudà emun duen din daan 2,000 he pereuntud te kudà.
9 Wazè din igkesukul minsan te kinemevevaan he upisyal te egalen ku. Edsarig dà sikandin te Ehipto he ebeǥey kandin te menge kerwahi wey menge pereuntud te kudà.
10 Kunaan din buwa ke wazà a suǥua te Nengazen te kedhendini te kedezaat kayi he nasyun? Iyan mismu is Nengazen midsuǥù kedì te kedsurung wey kedezaat kayi he nasyun.”
11 Migkeǥiyan ni Eliakim, ni Shebna, wey ni Joa haazà is peremandar te sundaru te, “Deyzey ke iyan nu egemiten te kebpekidlalag kenami is kineǥiyan he Aramico, su egkesavut dey heini. Kenè ka kaǥi te Hebriyuhanen su egkezineg ka te menge etew he ziyà te menge verengbeng te inged.”
12 Piru midtavak haazà is peremandar te menge sundaru te, “Midsuǥù a te egalen ku he ibpetuenan is lalag din te langun he meǥinged kayi te Jerusalem, kenà diyè dà te keniyu wey te hadì niw. Sikiyu is langun, egkengevitil kew wey egkengemezahan kew zutun te timpu te kedsurunga zey keniyu. Egkeenen niw is tai niw wey ed-inumen niw is ihì niw.”
13 Ne zutun, midhitindeg haazà is peremandar te menge sundaru ne nemensag te Hebriyuhanen te, “Pemineǥa niw is migkaǥi te mekeǥeǥehem he hadì diyà te Asiria!
14 Iyan heini egkeǥiyen din: Kenè kew petuntu ki Hezekia. Kenè kew zin egkelibri puun te kegkesekupa ku keniyu!
15 Kenè kew petuntu kandin mehitenged te kedsarig te Nengazen, emun egkaǥi sikandin te, ‘Siguradu he edlibriyen kiw te Nengazen; heini is inged tew, kenè din ibeǥey ziyà te hadì te Asiria.’
16 “Kenè kew pemineg ki Hezekia! Iyan heini egkeǥiyen te hadì te Asiria: Kenè kew en pekidtebek kediey; surindir kew en! Ne idtuǥut ku keniyu is kegkaan te veǥas te paras wey higus niw, ne ebpekeinum kew te wahig diyà te menge punduwè niw te wahig,
17 taman te edliku a is eduma keniyu pehendiyà te tanà he iring te tanè niw–tanà he zuen duen menge pemuleey te paras he ebpekeveǥey keniyu te vinu, wey zuen duen menge trigu he egkehimu he keuyaǥan niw.
18 Kenè kew pelimbung ki Hezekia emun egkaǥi sikandin te edlibriyen kew te Nengazen. Duen be menge ed-ezapen diyà te minsan hendei he menge nasyun he nekelibri te menge meǥinged duen para kenà sikandan mezaag te hadì te Asiria?
19 Duen be nehimu te menge ed-ezapen diyà te Hamat, Arpad, wey Sefarvaim? Nelibri ve te menge ed-ezapen diyà te Samaria is tanè dan puun te gehem ku? Wazà daan!
20 Hentei te menge ed-ezapen kayi he menge nasyun is nekelibri te nasyun dan puun te gehem ku? Ne ebmenmenuwen man te Nengazen is kedlibriya zin te Jerusalem puun te gehem ku?”
21 Piru wazà medtavak is menge etew su mibmandù si Hadì Hezekia he kenè dan medtavak.
22 Ne zutun mibindas ni Eliakim, ni Shebna, wey ni Joa is bisti zan tenged te kegkeseeng dan, ne midhendiyè dan te ki Hezekia ne midtudtul zan is menge lalag duen te peremandar te menge sundaru.