4
Dutun he timpu, pitu he vahi is ebpeeg-eǥawà te sevaha he maama he ke sikandan te, “Iyan key en metau te egkekaan dey wey visti zey, esewaa key zà su wey key kenà mepeel-elezi tenged te wazè dey esawa.”
Ed-umanan Edtuvazi te Megbevayà is Tanà diyà te Jerusalem
Egkeuma is timpu he ibpeuswag wey ibpemekempet te Nengazen is menge pinemula ziyà te Israel, ne is menge sebpet dutun te tanà, egkehimu he zengeg wey kelipey te egkesamà he menge etew ziyà te Israel. Egngezanan he menge segradu is menge etew he egkesamà diyà te Zion, he iyan is inged he Jerusalem. Pinaaǥi te ǥehem din edhukuman din wey edlumpiyuwan din is kelelalung te menge vahi ziyà te Jerusalem wey is kebpemenhimatey zutun. Ne ebaal is Nengazen te ǥapun he ebpekelambung te Jerusalem wey te mid-amur-amur zutun. Wey ebaal zaan sikandin te edriyubriyub he hapuy he ebpeketeyew emun mezukilem. Epeketambun heini te Jerusalem iring te meluag he tulda. Ne egkeiring heini te lawig he egkehelungan emun meinit is andew wey egkehelungan daan amun duen bagyu wey uzan.