1 Hentei is ebpeketuu te menge lalag dey? Hentei is mibpeheyaǥan te Nengazen te ǥehem din he midtuu? 2 Egkesuatan te Nengazen he med-uswag is suluǥuen din he iring te pinemula he midtuvù he nendalid diyà te memaza he tanà. Wazè din keguwapu etawa tindeg he ibpekekabig din kenita. 3 Mid-undaunda sikandin wey inselikwey te menge etew. Mahabet is neseǥazan din he menge kemeresayan wey menge elentusen. Mid-iniyuǥan tew sikandin, midsudì tew, wey mid-isip tew he wazè din bali. 4 Benar iyan, mid-antus din is menge kemeresayan wey menge elentusen he para pezem kenitew. Piru kunaan tew ke midsilutan sikandin te Megbevayà tenged te menge salè din. 5 Iyan tutuu is, mibpelian sikandin tenged te menge kedrapas tew; nevuǥel sikandin tenged te kelelalung tew. Is silut he mid-antus din iyan nekeveǥey kenitew te meupiya he kebpekesavuk; ne pinaaǥi te menge palì din nengeulian kiw. 6 Iring kiw is langun te nengetazin he menge kerehidu; is kada sevaha kenitew ne iyan en mibeelan din is egkesuatan din. Piru iyan sikandin impaantus te Nengazen te silut he para pezem kenitew te langun. 7 Midaagdaag sikandin wey mibpesekitan, iyan, wazà sikandin medriklamu. Iring sikandin te kerehidu he ed-uwiten diyà te lepeey, wey iring te kerehidu he ebpereremek dà emun ed-elutan. 8 Midakep sikandin, midhukuman, wey midhimetayan. Wazè nekeseǥipà dutun he lapis te kevuwazan he iyan inhimetayi kandin is tenged te menge salè dan, ne mid-antus din is silut he para pezem kandan. 9 Minsan wazà salà he nehimu zin wey wazà sikandin medlimbung, inleveng sikandin he henduen be te utew mekesesalà. Inleveng sikandin duma te menge sepian. 10 Piru egkasuatan te Nengazen he edresayen wey ibpaantus sikandin. Piru minsan midhimu te Nengazen is untung din he pemuhat para meveyazi is salà te menge etew, egkeehè din ded is menge kevuwazan din wey ebpekaangken ded sikandin te meluǥayad he untung, ne pinaaǥi kandin egketuman is egkesuatan te Nengazen. 11 Emun egkeehè din is beǥas te menge ked-antus din, ne egkelipey sikandin. Migkaǥi is Nengazen te, “Pinaaǥi te ketau te metazeng he suluǥuen ku mahabet is ebmetzengen din; ed-antus sikandin para te menge salè dan. 12 Umbe, ebeǥayan ku sikandin te zengeg he para te ventuǥan wey gemhanan he menge etew, su imbeǥey zin is untung din: Mid-isip sikandin he sevaha te menge mekesesalà. Ne nekaantus sikandin para te mahabet he menge mekesesalà ne mid-ampù sikandin he peseyluwa sikandan te Megbevayà.”