1 “Neehè ku wey nezineg ku is langun he migkaǥi niw, wey nesavut ku heini. 2 Ke hengkey is netuenan niw ne netuenan ku zaan; kenè kew lavew kediey. 3 Piru kenà a ebpekidlalis keniyu mehitenged te kasu ku, kekenà, diyà a ebpekidlalis te Megbevayà he Mekeǥeǥehem. 4 Su ebpenigudu kew he ebawì kedì te ketetarù niw. Pudu kew iring te duktur he wazè din pulus. 5 Deyzey pa ke pudu kew ebpereremek. Iyan heeyan kineupiyahan he ereg he ebeelan niw.

6 “Guntaan, pemineǥa niw is ketezengan ku. 7 Edlevanan niw ve is Megbevayà pinaaǥi te kedtarùtarù niw? 8 Edlevanan niw ve sikandin wey edipinsahan niw is kasu zin? 9 Emun edsusiyen kew te Megbevayà, duen be vuwa meupiya he egkeehè din diyà te keniyu? Kenè niw isipa he egkelimbungan niw sikandin iring te kegkelimbungi niw te menge etew. 10 Kenà duwazuwa he edewayen kew te Megbevayà minsan pa te edlevanan niw sikandin. 11 Wazè kew ve mahandek te ǥehem din? 12 Henduen dà te avu is menge erubasa niw su wazè din pulus; wey henduen dà te ziniyun he tanà is menge ketezengan niw su melemu heini he eberawen.

13 “Kenè kew kaǥi emun egkaǥi a, ne vey-ani ad keniyu minsan hengkey is egkehitavù kedì. 14 Su ibpedseraken ku en is untung ku. 15 Siguradu he edhimetayan a te Megbevayà; wazè ku en meupiya he egkeperateng. Piru edipinsahan ku ǥihapun is keugelingen ku ziyà te etuvangan din. 16 Su kela ke pinaaǥi kayi egkelibri a, su is etew he kenà edsunud te Megbevayà kenà ebpekeuvey ziyà te etuvangan din.

17 “Purungi niw pemineǥa is ebpengeǥiyen ku. 18 Guntaan te andam ad he edipinsa te keugelingen ku, netuenan ku he iyan hukum kedì is wazè ku salà. 19 Ke zuen ebpekesumbung kedì he nekesalà a, ebpereremek ad taman te kebpatey ku.

20 “He Megbevayà, kenà a ed-eles kenikew emun ibeǥey nu kediey heini is dezuwa he ebuyuen ku: 21 engkezi ad kenikew te ebpaantus, wey kenà ad kenikew pelihendeka te mekahandekhandek he menge vaal nu kayi te kedì. 22 Ne ǥuntaan, kaǥi ka kayi te kediey ne edtevaken ku sikew, etawa iyan a egkaǥi ne tevaka a kenikew. 23 Keǥiyi a kenikew ke hengkey he salà is nehimu ku. Ipeehè nu kedì is menge kerepasan ku wey menge salè ku. 24 Maan is edlikayan a kenikew, wey ed-isipen a kenikew he kuntada nu? 25 Maan is ebpelihendeken a wey edel-asen a kenikew is iring dà te reǥami etawa zahun he idlayap te keramag? 26 Insurat nu is mesakit he sumbung nu kediey, ne ebpeveyazan nu kediey is menge salà he neveelan ku zengan te vetan-en e pa. 27 Henduen be te egkedinahan nu is menge paa ku. Ebenteyanan nu is kada langkad ku, wey edsunuzen nu is menge nayè ku. 28 Umbe, iring a te repuk he egkeredak en wey visti he egketketen te zezeizey he keranapranap.”