1 Ne midtavak si Bildad is tig-Shua te, 2 “Job, keenu nu ves ed-engkezi te egkaǥi heeyan is ebpengeǥiyen nu? Purungi nu is kegkaǥi nu su wey zey sikew melelaǥi. 3 Ed-isipen nu ve he iring key te menge vaka he wazè dan kedsavut? 4 Ebpesekitan nu zà is keugelingen nu pinaaǥi te pauk nu. Mid-isip nu ve he tenged dà kenikew ebey-anan te Megbevayà is kelibutan etawa idhalin din is menge vatu puun te nesevukan dan?

5 “Benar iyan, he siguradu he ebpatey is lalung he etew. Iring sikandin te sulù he kenè en edsiǥa. 6 Ebpekeiring sikandin te tulda he merusirem en su egkeevukan is sulù diyà te seled din. 7 Dutun te nehuna he timpu meupiya is lengkazan din, iyan, guntaan ebpekeziregdireg sikandin. Kandin mismu he paaǥi is ebpekezezaat kandin. 8 Iyan sikandin midhipanew pehendiyà te litag, ne nelitag sikandin. 9 Ne kenè ne egkehekazan is menge paa zin. 10 Idlitag heini ziyà te ebeyaan din, ne nekeeles heini ziyà te tanà. 11 Neliǥuy sikandin te igkahandek din ne henduen be te edal-as heini kandin. 12 Is bangkit henduen be te etew he egkevitil he egkesuat he ed-eveleng kandin. Is kezeetan andam en he edezaat kandin. 13 Is lundis din egketketen te ebpekepatey he zaru ne egkeredak is menge paa wey menge velad din. 14 Ibpaawà sikandin diyà te ubpeey zin he ebpekepengalang kandin, ne ed-uwiten diyà te mekahandekhandek he hadì. 15 Egkaawà is ubpeey zin su egkevinsulan heini te egkeregreg he esupri. 16 Egkeiring sikandin te kayu he egkeǥangu is menge zalid wey menge subpang din. 17 Ne wazè en ebpeketanud kandin kayi te kelibutan. Egkepurung en sikandin egkelipati. 18 Edsegseǥen sikandin puun kayi te merayag he kelibutan pehendiyà te merusirem he lugar te menge minatey. 19 Wazè din menge anak etawa menge kevuwazan, ne wazà egkesamà he uuyag diyà te pemilya zin. 20 Is menge etew ziyà te minsan hendei he lugar, egkengeinuinu wey egkengehandek tenged te nehitavù kandin. 21 Tutuu he iyan heeyan egketemanan te lalung he etew, he wazà megkilala te Megbevayà.”