1 Ne mid-engkezan en si Job te edtavak duen te tetelu he menge emiǥu zin, su midhitindeǥan man ni Job he wazè din salà.

2 Ne zutun, duen sevaha he etew he iyan ngazan din si Elihu. Anak sikandin ni Barakel he tig-Buz he kevuwazan te pemilya ni Ram. Nepeukan din si Job su wazà besula ni Job is keugelingen din, kekenà, iyan mibasul zin is Megbevayà. 3 Nepeukan din daan sikan is tetelu he emiǥu ni Job su kenè dan igkepeletew he nekesalà si Job ne nekeletew hinuun he iyan nekesalà is Megbevayà. 4 Midtaǥad si Elihu ke ebpekepasad he egkaǥi sikandan is langun ne human din egkeǥiyi si Job, su geina te meǥurang sikandan kandin. 5 Ne hein neehè din he wazè en egkekaǥi zuen te tetelu, ne utew sikandin nepauk. 6 Umbe, migkaǥi sikandin te, “Batè e pa ne meǥurang kew en mulà, umbe ebpeneǥana a he egkaǥi. Wazà a mebpeǥaruǥaru he egkaǥi ziyà te keniyu te netuenan ku. 7 Su neisip ku he iyan kew ereg he ebpenurù, su meǥurang kew en ne zekelè en is netuenan niw. 8 Piru iyan heini tutuu: Is mulin-ulin te Mekeǥeǥehem he Megbevayà he imbeǥey zin diyà te etew, iyan ebeǥey kandin te kedsavut. 9 Is kegkeǥurang ne kenà gerentiya he is sevaha he etew uluwanen wey metau te hustu. 10 Umbe, pemineǥa a keniyu. Egkeǥiyen ku is netuenan ku. 11 Midtaǥad a hein ed-isip-isip kew pa ke hengkey is ereg he egkeǥiyen niw. Mibpemineg ku is menge ketezengan niw. 12 Mibpurungan ku sikiyu pemineǥa, piru wazà minsan sevaha keniyu he nekepeletew he nekesalà si Job; wazè niw metavak is menge ketezengan din. 13 Kenè kew kaǥi te, ‘Nesavut dey he edhuna sikandin he metau kenami. Iyan en ibpetavak kandin is Megbevayà, ne kenà iyan is etew.’ 14 Emun iyan a edlelisen ni Job, ne kenè ku sikandin edtevaken te iring te keniyu he kedtavak. 15 Guntaan nekepereremek kew ne wazè niw en egkekaǥi. 16 Kinahanglan pe be he edtaǥad a, te ǥuntaan mibpereremek kew en ne wazè niw en igketavak? 17 Duen daan egkeǥiyen ku; egkeǥiyen ku is netuenan ku. 18 Mezakel iyan is egkekaǥi ku, ne henduen be te kenè en heini egkeeǥen. 19 Iring a te veǥu he lundis he teleǥuey te vinu he nepurung mepenù he henduen be te ebensì en. 20 Ne kinahanglan he egkaǥi a su wey meterini is taǥù ku. 21 Wazà edepiǥan ku wey wazè ku edigdiǥen. 22 Wazà a melayam te kedigdig. Ne emun ebeelan ku heini, ne segugunà a edsiluti te Megbevayà he iyan mibaal kedì.”