36
Mibpedayun megkaǥi si Elihu te: “Pemineǥa a zèpa kenikew, su zuen ku pa egkeǥiyen he idlavan ku te Megbevayà. Mahabet is netuenan ku ne ibpeehè ku kenikew he wazà mesayep is Megbevayà he midlimbag kedì. Utew venar he wazè ku sikew terterui, su utew a metau is ed-etuvangen nu.
“Utew mekeǥeǥehem is Megbevayà, piru kenè din betasan is kedsudì te etew. Netuenan din is langun. Wazè din ituǥut he meuyag-uyag is lalung, ne ibeǥey zin is metazeng he kukuman diyà te edèdaaǥen he menge pubri. Wazè din bey-ani is menge metazeng. Ebeǥayan din sikandan te zengeg te wazà pidtemanan duma te menge hadì. Iyan, emun edèdaaǥen sikandan, he iring te egkedinahan, ibpahayag te Megbevayà is salà he nehimu zan duma te kebpelavew. 10 Ibpepemineg din sikandan te petizaan din, wey idsuǥù din kandan is ked-engked te kelelalung dan. 11 Emun ebpezumazuma zan wey ebpenilbi zan te Megbevayà, ebmeuswaǥen wey ebmelipayen dan seled te tivuuk he untung dan. 12 Piru emun kenè dan ebpezumazuma kandin, ebpatey zan te tebek he kurang dan te kedsavut. 13 Is menge etew he wazà medtuu te Megbevayà, duen pauk diyà te gehinawa zan, ne minsan edsilutan sikandan te Megbevayà, ne kenà sikandan ebpetavang kandin. 14 Ebpematey zan he egkepeel-elezan te vetan-en dan pa. 15 Piru pinaaǥi te menge elentusen, ebpenuruen te Megbevayà is menge etew. Ebpekeistudyu zan te kebpemineg kandin pinaaǥi te menge kegkerasey.
16 “Inlikey ka te Megbevayà te kezeetan wey wazè ke zin ipeveyveyai te zuma, ne impeuswag ke zin. Ne nepenù te metaam he keenen is lemisahan nu. 17 Piru ǥuntaan egkeseǥazan nu is silut he ereg te menge lalung. Kenè ka ebpekelikey te metazeng he kukuman. 18 Mebpekevantey ka he kenè ka meuwit te ketiǥeyunan wey zekelà he sipsip. 19 Ebpeketavang be te kelised nu is ketiǥeyunan nu wey is kebpekegaga nu? 20 Kenè nu isipa is ebpeebuten he mezukilem he iyan is timpu he egkezeetan is menge nasyun. 21 Andam ka he kenè ka mekevaal te kelelalung. Ibpaantus ka su para mekelikey ka te kebaal kayi.
22 “Isipa nu ke sengemenu is kegkemekeǥeǥehem te Megbevayà. Wazà menunudlù he ebpekeiring kandin. 23 Wazà ebpekepenurù kandin ke hengkey is ereg he ebeelan din, wey wazà ebpekekaǥi ziyà te kandin te, ‘Nekesalè ka’. 24 Kenè nu lipati is kedalig te menge vaal zin he iyan daan ebeelan te zuma emun egkanta zan. 25 Naahà te tivuuk he menusiyà is menge vaal te Megbevayà, minsan pa te meziyù is ked-ahaa zan duen. 26 Mekeǥeǥehem is Megbevayà, ne kenè tew egketegkad is kegkemeǥeǥehem din, ne kenè tew egkekaǥi ke sengemenu en is keǥurang din. 27 Iyan is Megbevayà mibpepemenahik te wahig puun te tanà ne ebeelan din heini he uzan. 28 Egkevusbus is uzan puun te menge ǥapun ne para heini te menge etew. 29 Wazà etew he netau ke mibmenumenu is kebpeyepata te ǥapun, wey ke egkemenumenu is kedruǥung diyà te langit he iyan ed-ubpaan te Megbevayà. 30 Ahaa nu ke mibmenumenu zin te ebpekilat diyà te peliǥuy zin, wey ke egkemenumenu is kegkindab kayi pehendiyà te netemanan te zaǥat. 31 Pinaaǥi kayi te ǥehem te Megbevayà, edumelahan din is menge nasyun wey ebeǥayan din te zekelà he egkekaan is menge etew. 32 Egewezan din is kilat ne edsuǥuen din te kedsinuǥat te edsinuǥaten din. 33 Is ruǥung tuus te ebpekeuma he vagyu, ne minsan is menge vaka egketau ke zuen bagyu he ebpekeuma.