1 Ne midtavak te Nengazen si Job he ebpuun te eribpures is laǥeng din, 2 “He Job, egkezuwazuwa ke ves te ketau ku? Pinaaǥi te menge lalag nu egketuusan he wazè nu netuenan. 3 Ne ǥuntaan, pengandam ka, ne tevaka nu is menge insè ku. 4 Hendei ka hein mibeelan ku is pundasyun te kelibutan? Keǥiya nu kediey ke zuen nu netuenan. 5 Netuenan nu ve ke hentei is mibayàbayà ke sengemenu kezekelà heini he pundasyun etawa hentei is midsukud kayi? Siguradu netuenan nu heini! 6 Hengkey is nekepelig-en te pundasyun te kelibutan? Wey hentei is mibpelastar kayi he pundasyun? 7 Dutun he timpu, nesevaha te kegkanta is menge mekevugwas wey nemen-uruhuy te kegkelipey is langun he menge velinsuǥuen. 8 Hentei is midsavuk te dulunà te egketemanan te zaǥat dutun te kebugwak din puun te zizalem? 9 Iyan a midtambun te zaǥat te menge ǥapun wey kerusirem. 10 Midsevukan ku te zulunà is daǥat, ne neiring heini te midsireduwan ku wey midtrengkahan. 11 Migkeǥiyan ku is daǥat te, ‘Taman ke zà kayi ne kenè ke en medlapey pa; kayi zà taman is dezekelà he menge vaǥel nu.’

12 “He Job, nekesuǥù ke en be te andew he medsilà heini, 13 para mekeeneb te tivuuk he kelibutan is kerayag din su wey zin ikepeengked is mezaat he ebeelan te mezukilem? 14 Tenged te kerayag kayi, nehimu he keladu is kelibutan he iring te marka te silyu wey linumpian te visti. 15 Tenged te kerayag, kenà ebpekeuyayà is menge lalung, su kenè dan ebpekepesipala te zuma.

16 “Nekehendiyè ke en be te menge serebseb diyà te zizalem te zaǥat etawa ziyà te kinezizeleman he vahin te zaǥat? 17 Ingkepeturedu en be kenikew is pultahan pehendiyà te merusirem he lugar te menge minatey? 18 Netuenan nu ve ke sengemenu kezekelà is kelibutan? Keǥiya nu kayi te kediey ke netuenan nu heini is langun! 19 Netuenan nu ve ke hendei ebpuun is kerayag wey kerusirem? 20 Igkepelikù nu ve sikandan diyà te ebpuunan dan? 21 Kunaan nu ves ke netuenan nu heini is langun! Henduen be te zaan ke en he neetew hein midlimbag ku is kelibutan. Utew ke en bes meǥurang!

22 “Nekehendiyè ke en be te ebpuunan te uzan he giyew? 23 Heini he ǥiyew idteǥana ku para te timpu te kesamuk wey timpu te tebek. 24 Netuenan nu ve is beyeey pehendiyà te ebpuunan te kilat etawa lugar he ebpuunan te keramag he ebpuun diyà te edsilaan? 25 Hentei is mibaal te veyeey te uzan wey vagyu? 26 Hentei is edsuǥù te uzan para med-uzan diyà te disirtu, he lugar he wazà duen ed-ubpà he etew? 27 Hentei is ebpeuzan te tanà he mehiǥawan para meketuvù is menge sagbet? 28 Hentei is ebpuunan te uzan, wey zehemug, 29 wey te ǥiyew he ebpuun te langit? 30 Nehimu he ayis is wahig ne neiring kezesen te vatu, ragkes en is divavew he vahin te zaǥat. 31 Igketagkes nu ve etawa egkehekazan is grupu te menge vituen he egngezanan te Penikapan wey Belatic? 32 Egkehimu nu ve te egiya is menge vituen te kebpaahà dutun te timpu te kebpeehè dan? Egkehimu nu iyan te egiya is menge vituen he egngezanan te Dekelà wey Deisey he menge Bir? 33 Netuenan nu ve is paaǥi te kegkezumelaha te kelimbaǥan diyà te kewkewangan etawa kayi te kelibutan? 34 Egkemendaran nu ve is menge ǥapun para med-uzan? 35 Igkepekilat nu ve is kilat? Edsinuǥaten din be is ibpesinuǥat nu? 36 Hentei is mibeǥey te etew te ketau wey kedsavut? 37 Hentei is metau he ebpekevilang te menge ǥapun? Hentei is ebpekevusbus te wahig puun te langit 38 he ebpeketivuuk te eliyavuk?

39 “Iyan ke ve ebpen-ahà te egkekaan te menge erimaung wey edhantey kandan 40 dutun te edleku sikandan diyà te elesè dan etawa sihung te zezeisey he kayu? 41 Hentei is edsavud te menge uwak emun egkevitil zan wey ebpesavud kedì is menge pispis dan?