4
Migkaǥi si Elifaz
Ne midtavak si Elifaz is tig-Teman, “Egkepauk ke ve emun egkaǥi a? Kenà egkehimu ke ebpereremek e zà. Dengan te nehuna he timpu mahabet is menge etew he mibpenurù nu he medsarig dan te Megbevayà. Midasig nu is menge etew he edluyahan. Is menge lalag nu, ebpekelig-en te edluyahan wey egkepiley. Iyan, guntaan te iyan ke en nekaantus te merasey midluyahan ka wey nesemukan. Kenè be ke edtahud ka te Megbevayà wey metazeng ka, duen nu kedsarig wey perateng?
“Guntaan, purungi nu is-isipa. Duen be etew he wazà mekesalà etawa metazeng he nezeetan? Sumalà te nepeniizan ku, iyan ebpekesaǥad te mezaat wey kesamuk is menge etew he ebaal te mezaat wey kesamuk. Egkengezeetan sikandan te sengehiyup dà te Megbevayà. Tenged te pauk din, egkepurung sikandan egkezeeti. 10 Minsan iring dan pa te mezesen wey zumezaas he erimaung, edsepuen gihapun te Megbevayà is menge ngipen dan. 11 Egkevitil zan, ne ebpekedsusuwey is menge anak dan.
12 “Duen meeles is kegkeǥiya zuen kayi te kediey. Innaasnaas haazà kayi te kedì. 13 Nehitavù heini kayi te kediey pinaaǥi te teǥeinep dutun te sevaha he mezukilem he ebpemenlipezeng wey egkengehurep is menge etew. 14 Nahandek a ne migkerker is tivuuk he lawa ku. 15 Duen mulin-ulin he midsaǥad diyà te vuked ku ne mibpenggiǥisingan a. 16 Ne kegkepasad dutun, ne segugunà a nekaahà te henduen be te edhitindeg, piru kenà keladu is ked-ahaa ku zuen. Ne zuen deisey he laǥeng he nezineg ku he migkaǥi te, 17 ‘Duen be etew he metazeng diyà te etuvangan te Megbevayà? Duen be etew he lumpiyu ziyà te etuvangan te midlimbag kandin? 18 Emun wazà medsarig is Megbevayà te menge velinsuǥuen he menge suluǥuen din, ne ebpekaahà gihapun sikandin te sayep dan, 19 ne iyan pe be is menge etew he tanè dà is mibpuunan te kedlimbaǥa zuen, ne melemu zà he edrunteken iring te menge zezeizey he keranapranap! 20 Uuyag sikandan ke meselem piru kegkemezukilem ne ebpatey zan en. Ne kenè en sikandan egkaahà taman te taman. 21 Henduen sikandan te valey he egkerundus. Ebpemematey zan he kurang te ketau.’