41
“Job, egkevunuwit nu ve is dragun he Leviatan? Egkehiketan nu ve is bèbè din te pisì? Igkepelahus nu ve is pisì diyà te izung din? Etawa egkekew-itan nu ve te vunuwit is bakè din? Layun be sikandin edhangyù diyà te kenikew he ipaawè nu? Etawa ebpehizuhizu ve sikandin kenikew? Ebpekid-uyun be sikandin kenikew he ebpeuripen kenikew seled te tivuuk he untung din? Egkehimu nu ve heini he ayam iring te tagbis? Etawa igkeveǥey nu ve heini ziyà te menge anak nu he vahi he para velvelayen? Egkepemasa ve heini te menge nigusyanti he ebevehinen dan wey zan ikevelegyà? Ed-utengan be te serapang nu is lundis din etawa ulu zin? Emun egkeutel nu heini ne kenè nu egkelipatan is kereǥen te kedhingutela nu kayi, ne kenè nu en heini ed-umanan ebeeli. Wazà pulus te kedtinguhà ked-utel kandin. Su kegkaahaa nu pa kandin egkaawè en is burut nu. 10 Emun wazà ebpeǥaruǥaru he edsamuk kandin ne hentei man is ebpeǥaruǥaru he edsukul kedì? 11 Hentei man is ebpekekaǥi te nekeutang a ziyà te kandin te ereg he ebelesan ku te meupiya? Te kediey man is langun he kayi te kelibutan.
12 “Ed-umanan ku pa egkeǥiya ziyà te kenikew is bahin te lawa te Leviatan wey ke sengemenu is kegkemekeǥeǥehem din wey kezesen din. 13 Hentei is ebpekaanis te lundis din etawa igkepeutengan din heini? 14 Hentei is ebpekehimu he ebpeǥinganga kandin? Te mekahandekhandek man is menge ngipen din! 15 Is peka zin ne zuen mekepal he menge pengalang he henduen be te nekelinya he menge kelasag. 16-17 Nekedliliib heini he minsan is keramag ne kenà duen ebpekevayà, wey wazà ebpekaanis kayi. 18 Emun ebpemusenga ne zuen edtik-ew edsiǥa, ne is menge mata zin edsiǥa he iring te kedsilà te andew. 19 Ibpelepew zin is hapuy puun te vèbè din, 20 egawas is evel puun te izung din he henduen be te sengew te edìdì he kuzen he meregreg is tavun din. 21 Is gehinawa zin ebpekevaǥa te vurit, su hapuy is egawas diyà te vèbè din. 22 Nepenù te zesen is lieg din, ne utew egkahandek is ebpekaahà kandin. 23 Minsan is sapù din ne nepurung mahasek wey mezesen. 24 Mezesen is gehinawa zin iring te ǥelingan he vatu. 25 Emun ed-enew sikandin ne egkengeteranta tenged te kegkahandek is mekeǥeǥehem he menge etew. 26 Wazà ispada, bangkew, besut etawa kelawit he ebpekezezaat kandin. 27 Diyà te kandin iring dà kelemineg te reǥami is putew, ne is brunsi iring dà te repuk he kayu. 28 Emun ebpenaan sikandin ne kenà sikandin ebpelaǥuy. Is menge vatu he idlimpawes diyà te kandin ne henduen dà te ukap is kegezama zin kayi. 29 Is kayu he idlagkut kandin, henduen dà te reǥami ziyà te kandin. Ed-engitan din dà is hagyung te vangkew he ibunlawit diyà te kandin. 30 Is getek din, ne zuen meǥarang he menge hun-ap he henduen be te menge bildu. Umbe ednayà heini emun edula ziyà te vasak. 31 Edsimbeǥen din is daǥat he henduen be te egkaràkarà he wahig diyà te kuzen etawa lana he edìdì diyà te kitang. 32 Is wahig he egkeveyaan din eburàburà te meputì, he henduen be te meputì he vulvul is ked-ahaa zuen. 33 Wazà iring kandin kayi te kelibutan. Sevaha heini he linimbag he kenà egkahandek. 34 Ebpekevevaan din is langun he gelbuwen he menge langgam. Iyan heini hadì te langun he langgam he kenà ebpekeuram.”