10
Nekeuwit te Kezeetan is Ked-ezapa te zuma he menge Ed-ezapen
1 Sikiyu is menge etew te Israel, pemineǥa niw is migkaǥi te Nengazen.
2 Migkaǥi sikandin te, “Kenè niw iringi is baal te menge etew ziyà te zuma he menge nasyun, ne kenè kew mahandek te menge tuus diyà te langit minsan pa te igkehandek heini te ziyà te zuma he menge nasyun.
3 Wazà pulus te neleyaman he menge vaal keniyan he menge etew. Edtamped dan te kayu ziyà te ketelunan ne ibpeukiran dan te pandey.
4 Mideyzeyanan heini te pelata wey vulawan, ne impurung iransang su wey kenà mepiley.
5 Heini he menge ed-ezapen iring dà te menge etew-etew he pelihandek te maya su kenà ebpekekaǥi. Kinahanglan he ebitbiten su kenà ebpekehipanew. Kenè niw ikahandek heini he menge ed-ezapen su kenà heini ebpekevaal te kezeetan wey keupiyaanan.”
6 He Nengazen, wazà iring kenikew. Mekeǥeǥehem ka ne utew lavew is ngazan nu.
7 Hentei man is kenà edtahud kenikew te hadì te menge nasyun? Utew ke man dait he edtehuzen. Wazà ebpekeiring kenikew zuen te langun he uluwanen diyà te nekedseselekawà he menge nasyun, ne kenà ebpekeiring kenikew is langun he menge hadì dan.
8 Menge wazà dan pereg wey menge tulebung. Is penurù mehitenged te ed-ezapen dan he menge kayu, ne wazè din pulus.
9 Ebpevaal zan te menge pandey wey menge platiru te menge ledawan he ed-ezapen dan he ebpekeplaan te pelata he ebpuun diyà te Tarshish wey vulawan he ebpuun diyà te Ufaz. Ne ebistiyan heini te meitem is kaavuavu zin merudtem he manggad he midtahì te memetau he menge menenahì.
10 Piru iyan is Nengazen tutuu he Megbevayà. Iyan sikandin uuyag he Megbevayà ne Hadì sikandin te wazà pidtemanan. Emun egkepauk sikandin, egkehuyung is kelibutan ne ed-eles is diyà te menge nasyun.
11 Keǥiya heini te menge ed-azap te zuma he menge ed-ezapen: “Is menge ed-ezapen niw he wazà iyan medlimbag te kelibutan wey langit, ne egkahanew kayi te kelibutan.”
12 Piru iyan is Megbevayà midlimbag te langit wey kelibutan pinaaǥi te ǥehem din wey ketau zin.
13 Pinaaǥi te kebmandù din, edreǥuuk is wahig diyà te langit. Iyan sikandin ebpeǥawas te menge kivel he ebpuun diyà te meziyù he vahin te kelibutan. Ibpekilat din ke ed-uzan, wey ibpepengeramag din te ebpuun diyà te midteǥuan din duen.
14 Is menge ed-azap te zuma he menge ed-ezapen, menge paglung wey wazà menge ketau. Egkepeel-elezan dà is menge platiru tenged te menge vineelan dan he menge ed-ezapen, su kenà heini tutuu. Wazà kayi untung.
15 Wazè kayi pulus wey telemayen heini. Emun timpu en te kedsilut ne egkezeetan sikandan is langun.
16 Piru kenà mulà iring keniyan is Megbevayà ni Jacob. Iyan sikandin mibaal te langun, ragkes en is Israel, he iyan kes menge etew he migaked din. Nengazen he Mekeǥeǥehem is ngazan din.
Is Ebpekeuma he Kezeetan
17 Sikiyu is menge etew ziyà te Jerusalem, tinesa niw en is menge azen niw ne ǥenat kew en, su hapit en edsurunga is inged niw.
18 Su iyan heini migkaǥi te Nengazen: Pemineg kew! Ibpaawè ku sikiyu kayi he tanà. Edresayen ku sikiyu wey niw meǥezami is pauk ku.
19 Migkaǥi is menge tig-Jerusalem te, “Mekehizuhizu kiw tenged te kezeetan tew. Kenè en heini egkeulian. Piru kinahanglan he ed-entusen tew heini.
20 Nerundus en is tulda tew; nengevidtew en is menge hiket kayi. Nahanew en is menge anak tew; wazè en nesamà he ed-uman ebpehitindeg te tulda he mid-ubpaan tew.”
21 Midtavak a te, “Wazà pereg te menge pengulu tew; wazà sikandan medangep diyà te Nengazen. Umbe wazà sikandan med-uswag, ne nekepeyapat is langun he menge sakup dan.
22 Pemineǥa niw is utew subra he keǥurub te menge sundaru he ebpuun diyà te zizaya. Edezeetan dan is menge inged kayi te Juda, ne egkehimu zà heini he ubpeey te leew he menge asu.”
Is Kebpengemuyù ni Jeremias
23 He Nengazen, netuenan ku he is untung te etew ne kenè kandin. Kenè din egkeveyveyaan is ebpekeuma he menge hitavù.
24 Mensuwa key Nengazen, piru kenè nu heini pesubrahi. Beeli nu heini kenè tenged te pauk nu su kela ke maamin key.
25 Ipeǥezami nu is pauk nu ziyà te menge etew he wazà megkilala kenikew, wey wazà medangep diyà te kenikew. Su midezeetan dan is menge kevuwazan ni Jacob wey mibpenregdas is menge ubpeey zan.