37
Impetawag ni Zedekia si Jeremias
1 Midhimu ni Hadì Nebucadnezar he hadì te Babilonia si Zedekia he anak ni Josia he hadì te Juda he ilis ki Jehoyakin he anak ni Jehoyakim.
2 Piru si Zedekia wey is menge upisyal zin, wey is menge meǥinged diyà te Juda, wazè dan daan mebpemineg te menge lalag te Nengazen he midtudtul ni Jeremias he ebpeneuven.
3 Ne midsuǥù ni Hadì Zedekia si Jehucal he anak ni Shelemia wey is memumuhat he si Zefanias he anak ni Maasea he medhendiyà te ki Jeremias he ebpeneuven, ne hengyui zan sikandin he mebpengemuyù diyà te Nengazen he Megbevayè dan para kandan.
4 Dutun he timpu wazè pa mepirisu si Jeremias, umbe wazè pa ebpekevayàbayà kandin minsan hendei sikandin ebpevayà.
5 Dutun daan he timpu midsurung te menge tig-Babilonia is Jerusalem. Piru hein netuenan dan he ebeyaan sikandan te menge sundaru te hadì te Ehipto, mid-engkezan dan te edsurung is Jerusalem.
6-7 Migkaǥi is Nengazen he Megbevayà te Israel ziyà te ki Jeremias te, “Keǥiyi nu si Hadì Zedekia he hadì te Juda he midsuǥù kenikew te ked-insà kayi te kedì ke hengkey is egkehitavù, ‘Ebpelinggumeen is menge sundaru te Ehipto te kedtavang keniyu, piru edlikù sikandan diyà te Ehipto.
8 Ne edlikuan te menge tig-Babilonia heini he inged. Ed-eǥawen dan heini ne ebinsulan dan.”
9 Migkaǥi pa is Nengazen te: Kenè niw limbungi is gehinawa niw te ked-isip he kenè kew en edlikuan te menge tig-Babilonia, su siguradu he edlikù dan.
10 Minsan egkezaag niw pa is langun he menge sundaru he edsurung keniyu, ne iyan dà egkesamà kandan is menge teǥepalì he ziyà te menge tulda zan, edsurung gihapun sikandan kayi te inged, ne ebinsulan dan heini.’ ”
Is Kebpirisuwa ki Jeremias
11 Hein mibpekeziyù is menge sundaru te Babilonia puun te Jerusalem tenged te menge sundaru te hadì te Ehipto,
12 migenat daan diyà te Jerusalem si Jeremias su edhendiyà te tanà ni Benjamin, su wey zin mekuwa is kandin he vahin duen te tanà te pemilya zin.
13 Piru hein nekeuma sikandin diyà te migngezanan te Pultahan ni Benjamin, midakep sikandin te kepitan te menge vantey he si Iria he anak ni Shelemia he apù ni Hanania. Migkeǥiyan sikandin te, “Nekidsevaha ka te menge tig-Babilonia.”
14 Midtavak si Jeremias te, “Kenà heeyan tutuu! Wazà a mebpekidsevaha te menge tig-Babilonia.” Iyan, kenà edtuu si Iria, kekenà, midakep din si Jeremias ne miduma zin diyà te menge upisyal.
15 Utew nepauk is menge upisyal ki Jeremias. Impevuǥel zan wey mibpirisu zan diyà te valey ni Jonatan he sikritaryu. Su haazà he valey midhimu zan he pirisuwan.
16 Inseled dan si Jeremias diyà te silda he ziyà te zizalem te tanà ne neuǥet sikandin dutun.
17 Ne mibpeveyaan sikandin ni Hadì Zedekia ne impezuma zin diyà te turuǥan. Mid-insaan sikandin ni Zedekia te meelas. Ke sikandin te, “Duen be menge lalag nu he ebpuun diyà te Nengazen?” Ne midtavak si Jeremias te, “Uya, duen. Ibeǥey ka ziyà te hadì te Babilonia.”
18 Ne mid-insaan ni Jeremias haazà is hadì te, “Hengkey ves is salà he neveelan ku ziyà te kenikew, ziyà te menge upisyal nu, wey ziyà te zuma he menge etew he iyan impepirisuwa nu kedì?
19 Hendei en be sikan is midseriǥan niw he menge ebpeneuven he nenagnà he kenà edsurungen te hadì te Babilonia heini is inged?
20 Mahal he Hadì, emun egkehimu ne pemineǥa a kenikew. Edhangyù a ziyà te kenikew he kenà ad kenikew ilikù diyà te valey ni Jonatan he sikritaryu su ebpatey a emun diyà a.”
21 Umbe, mibmandù si Hadì Zedekia he ziyè dà ebpirisuwa si Jeremias te ubpeey te menge vantey te turuǥan. Mibmandù daan haazà is hadì he ebeǥayan si Jeremias te keenen he ebpuun diyà te menge panadiru zutun te inged andew-andew taman te zuen pe pan dutun te inged. Umbe mibpedayun is kegkepirisuwa ki Jeremias diyà te ubpeey te menge vantey.