39
Iyan heini paaǥi te Kegkesekupa te Jerusalem
1 Hein ikesepulù he vulan duen te ikesiyam he tuig te kedhadì ni Zedekia ziyà te Juda, nenurung si Hadì Nebucadnezar he hadì te Babilonia wey is langun he menge sundaru zin diyà te Jerusalem.
2 Ne hein ikeepat he vulan duen te ike-11 he tuig te kedhadì ni Zedekia, nevengkag en te menge tig-Babilonia sikan is berengbeng te inged.
3 Ne hein neselezan dan en is Jerusalem, is langun he menge upisyal te hadì te Babilonia mibpinuu ziyà te Teliwazà he Pultahan te kebpaahà he naaǥew zan en haazà is inged. Iyan sikandan ensi Nergal Sharezer he tig-Samgar, si Nebo Sarsekim he sevaha he pengulu he upisyal, wey is sevaha pa he Nergal Sharezer he sevaha zaan he lavew he upisyal, wey is duma pa he menge upisyal te hadì te Babilonia.
4 Ne hein naahà heini ni Hadì Zedekia wey te langun he menge sundaru zin, mibpelaǥuy sikandan. Mezukilem is ked-awè dan dutun te inged, ne ziyè dan mebayà te pemuleey te hadì; migawas dan he zuen mebayà te pultahan he nekepetug-elang te zezuwa he verengbeng, ne midhendiyè dan te Araba.
5 Piru midal-as sikandan te menge sundaru te Babilonia, ne ziyè dan mesaut te menge suǥud diyà te Jerico. Midakep dan si Zedekia ne mid-uwit dan diyà te ki Hadì Nebucadnezar ziyà te Ribla he sakup te Hamat, ne zutun midhukuman sikandin ni Hadì Nebucadnezar.
6 Diyà te Ribla, midhimetayan te hadì te Babilonia is menge anak he maama ni Zedekia ziyà mismu te etuvangan ni Zedekia. Midhimetayan daan is langun he menge upisyal te Juda.
7 Impeluǥit dutun te hadì is menge mata ni Zedekia ne migkedinahan sikandin ne mid-uwit diyà te Babilonia.
8 Ne elin daan nehitavù is, mibinsulan te menge tig-Babilonia is menge valey ziyà te Jerusalem ragkes en is turuǥan te hadì, ne mibpemengkag dan is menge verengbeng.
9 Mibpenduma ni Nebuzaradan he pengulu te menge vantey is menge etew he nesamà dutun te inged pehendiyà te Babilonia, ragkes en sikan is nekidsevaha kandin.
10 Piru intaǥak ni Nebuzaradan diyà te Juda is nepipira he pubri he menge etew he wazè dan menge tanà, ne mibeǥayan dan te menge pemuleey te paras wey menge vevesukà dutun he andew.
11 Dutun, mibmenduan ni Hadì Nebucadnezar he hadì te Babilonia si Nebuzaradan he pengulu te menge vantey te mehitenged ki Jeremias. Ke sikandin te,
12 “Etura niw si Jeremias, ne kenè niw menuwa. Iveǥey niw kandin ke hengkey is ebuyuen din.”
13 Ne midtuman heini ni Nebuzaradan he pengulu te menge vantey, ni Nebuzaradan he pengulu he upisyal, ni Nergal Sharezer he sevaha zaan he metikang he upisyal, wey te zuma pa he menge upisyal te hadì te Babilonia.
14 Impekuwa zan si Jeremias puun duen te ubpeey te menge vantey ne insarig dan ki Gedalia he anak ni Ahikam wey apù ni Shafan, he iyan miduma kandin wey mekeulì diyà te valey zin. Umbe mibpedayun is ked-ubpà ni Jeremias diyà te Juda duma te zuma he menge emurè din te inged.
15 Hein mibpirisu pa si Jeremias diyà te ubpeey te menge vantey te turuǥan, migkaǥi is Nengazen diyà te kandin te:
16 “Hendiyè ka te ki Ebed Melec he tig-Etiopia ne keǥiyi nu sikandin he siak, is Nengazen he Mekeǥeǥehem, he Megbevayà te Israel, migkaǥi te, ‘Edtumanen ku en is migkaǥi ku he ebpekesuǥat kayi he inged. Ibpaaǥi ku is kezeetan ne kenà keupiyaanan. Ne egkeehè nu is kegkehitevua kayi.
17 Piru edlibriyen ku sikew zutun he timpu. Kenè ku sikew ibeǥey ziyà te menge etew he igkahandek nu.
18 Edlibriyen ku sikew. Kenè ka ebpatey te tebek, su midsarig ka kedì. Iyan a, is Nengazen, is migkaǥi kayi.’ ”