4
1 Migkaǥi is Nengazen te, “He Israel, likù ka pezem kayi te kediey. Emun idselikwey nu en is utew mezaat he zuma he menge ed-ezapen ne kenà ad kenikew ewai,
2 ne ngazan ku zà is gemita nu emun edheǥeten nu is penangdù nu ne pengungubpaan ka he egkeseriǥan, hustu wey metazeng, ne egkehimu ka he tuvad te menge nasyun, ne ebeǥayan ke zan te zengeg.”
3 Iyan heini migkaǥi te Nengazen diyà te menge etew ziyà te Juda wey Jerusalem: “Iringi niw is ebasuk he edhimu te paaǥi wey mebmelemineg is tanà, kinahanglan he pekelemineǥa niw zaan is mesinupaken he ǥehinawa niw; wey iring te ebasuk he ibpen-awà din is duǥiyen he menge sagbet su wey meketuvù is benì din, kinahanglan he kenè niw ul-ulaha is salà he ebpekezezaat te untung niw.
4 Sikiyu is menge etew ziyà te Juda wey Jerusalem, lumpiyuwi niw is gehinawa niw ziyà te etuvangan te Nengazen, su emun kenà, ne egkeǥezaman niw is pauk ku he iring te hapuy he kenà egkeevukan tenged te kezaat te vaal niw.
Is Silut he Idsilut diyà te Juda
5 “Keǥiyi is menge tig-Juda wey menge tig-Jerusalem he ipezaǥing dan is budyung diyà te tivuuk he tanà. Ne kulehia zan te mezaǥing is menge etew he mebpelaǥuy zan wey med-eles diyà te menge inged he neliǥuy te menge verengbeng.
6 Ivayew is bendirà wey metueni te menge etew he ibpehendiyà sikandan te Jerusalem. Genat kew en ne eles kew su ebpeuwit a te zekelà he kezeetan he ebpuun diyà te zizaya.”
7 Edsurung en is ebpendezaat te menge nasyun he henduen be te erimaung he migawas puun te elesè din. Migenat en sikandin puun te inged din su edezeetan din is tanè niw. Ebengkaǥen din is menge inged niw taman te kenè en egkehimu he ed-ubpaan.
8 Umbe, bivisti kew te saku he tuus te kegkeseeng niw. Lelendag kew su utew kiw egkepeuki te Nengazen.
9 Migkaǥi is Nengazen te, “Dutun he andew, is hadì wey menge upisyal egkaawà is kevurut dan, egkulbaan is menge memumuhat, wey is menge ebpeneuven, ne egkeinu-inu.”
10 Ne migkaǥi a te, “He Nengazen he MEGBEVAYÀ, nelimbungan nu is menge etew tenged te migkaǥi nu, su midsaad ka te kelinew te Jerusalem. Piru naandam en bes is ispada he idhimatey kandan.”
11 Egkeuma is timpu he zutun egkaǥi is Nengazen diyà te menge etew ziyà te Juda wey Jerusalem te, “Ebpengeramag te utew meinit ebpuun diyà te zemilag he menge vuvungan te disirtu pehendiyà te menge etew ku. Ne kenà heini para te kebpalid dà te trigu zan.
12 Utew heini mevendes he keramag he ebpuun kayi te kediey. Guntaan, egkeǥiyen ku ziyà te kandan is idsilut ku.”
13 Tengteng kew! Ebpekeume en is kuntada tew he iring te ǥapun. Is menge kerwahi zin, henduen be te eribpures, ne is menge kudè din, edhuna pa he elistu te menge mendereǥit. Mekehizuhizu kiw! Su egkezeetan kiw en.
14 “Menge tig-Jerusalem, lumpiyuwi niw is kezaat te gehinawa niw su wey kew melibri. Ebpedayun en be is kezaat te isip niw?
15 Is kezeetan niw midtudtul en te menge menunudtulà puun te Dan pehendiyà diyà te vuvungan te Efraim.
16 Midsuǥù sikandan he mebpetizaan dan diyà te menge nasyun wey ziyà te Jerusalem he zuen edsurung he menge sundaru he ebpuun diyà te meziyù he inged. Edhinggaten dan te tebek is menge meǥinged diyà te menge inged te Juda.
17 Midliǥuyan dan is Jerusalem he henduen be te ebantey sikandan te pinemula zan, su midsukulan a te menge tig-Jerusalem. Iyan a, is Nengazen, is migkaǥi kayi.
18 Keniyu mismu he menge vetasan wey menge vaal is mid-uwit kayi he kezeetan diyà te keniyu. Iyan heini silut niw. Utew heini merasey! Henduen be te midsundang is gehinawa niw tenged kayi.”
Midsineǥew si Jeremias tenged te menge Emurè Din te Inged
19 Kenè ku en egkaantus is kegkeseeng ku; utew subra is kebpekezag-es ku. Henduen be te ebpemevayu is kumeng ku tenged te kekulbà ne kenà a ebpeketeren. Su nezineg ku is daǥing te vudyung ne nezineg ku zaan is kulehian te ebpekidtebek.
20 Ebpekedtitinundug dà is menge kezeetan. Ne nevengkag is tivuuk he tanà. Minsan is menge tulda he ubpeey ku, segugunè dà neregdas.
21 Keenu pa vuwa egkeengked is kegkaahaa ku te bendirà te ebpekidtebek wey is kegkezineǥa ku te zaǥing te vudyung?
22 Migkaǥi is Nengazen te, “Tulebung is menge etew ku; wazè e zan mekilala. Iring sikandan te engey he menge vatà he kenà ebpekesavut. Utew zan metau he ebaal te mezaat, ne kenè dan mulà egketau he ebaal te meupiya.”
Is Nelewasan ni Jeremias Mehitenged te Ebpekeuma he Kezeetan
23 Neehè ku is kelibutan he wazè din purma wey taǥù. Neehè ku zaan is langit he wazè din kerayag.
24 Neehè ku is menge vuntud wey menge vuvungan he nengehuyung.
25 Neehè ku zaan he wazà menge etew, ne is langun he menge tagbis midlayang pehendiyà te meziyù.
26 Neehè ku he is daan he selebpeten he tanà ne nehimu he disirtu. Nengezeetan is langun he menge dezekelà he menge inged tenged te utew kegkepauk te Nengazen.
27 Iyan heini migkaǥi te Nengazen: “Egkevengkag is tivuuk he kelibutan, piru kenè ku heini ebpurungan edezeeti.
28 Egkeseeng is kelibutan ne ebmerusirem is langit, su nekaǥi ku en is silut, ne kenè ku en ebelvelewanan is nekaǥi ku. Nekedisisyun ad ne kenè en egkahalin is isip ku.”
29 Tenged te keǥurub te ebmartsa he menge pereuntud te kudà wey menge mememanà, nemelaǥuy tenged te kegkahandek is menge meǥinged diyà te menge inged. Is duma ziyà mebpelaǥuy te ketelunan, wey is duma midtekezeg diyà te menge vetuwen. Mid-ewaan is langun he menge inged ne wazè en dutun meǥinged.
30 He Jerusalem he midezeetan, hengkey is baal nu? Maan is midsul-ub ka te mekempet he visti wey menge elahas? Maan is mibpintalan nu is menge mata nu? Is kebpemekempet nu ne wazè din en pulus. Is mibmahal nu he kezapig nu he menge nasyun midselikwey en kenikew ne egkesuatan ke zan en te edhimatey.
31 Nezineg ku is erang wey zag-es, he iring te erang wey zag-es te vahi he ed-anak te penganey. Erang heini te menge meǥinged diyà te Jerusalem he kenè en ebpekeǥehinawa is ebpenepayà he egkaǥi te, “Mekehizuhizu key; henduen be egkevidtawan key en. Su heeyan en is menge kuntada zey he edhimatey kenami.”