42
Midhengyuan te menge Etew si Jeremias he Mebpengemuyù Sikandin para Kandan
1 Ne, mid-uvey ziyà te ki Jeremias si Johanan he anak ni Karea, si Jezaria he anak ni Hoshaya, wey is menge zuma zin he upisyal te menge sundaru, ragkes is langun he menge etew zutun puun te kinemevevaan pehendiyà te kinetikangan is ked-etew zin.
2 Migkaǥi zan diyà te ki Jeremias te, “Edhangyù key ziyà te kenikew he pengemuyù ka ziyà te Nengazen he Megbevayè nu para kenami te nesamà. Neehè nu he mezakel key zengan, iyan, guntaan deisey key zà.
3 Pengemuyù ka ziyà te Nengazen he Megbevayè nu he ipezayag din kenami ke hendei key ebpevayà wey ke hengkey is ereg he ebeelan dey.”
4 Midtavak si Jeremias te, “Uya, ibpengemuyù ku ziyà te Nengazen he Megbevayè niw heeyan is hangyù niw, ne egkeǥiyen ku ziyà te keniyu ke hengkey is egkeǥiyen din. Wazè ku id-eles diyà te keniyu.”
5 Ne migkeǥiyan dan si Jeremias te, “Berakat he is Nengazen he Megbevayè nu mehimu he tutuu wey egkeseriǥan he tistiǥus kuntra kenami emun kenè dey edtumanen is langun he egkeǥiyen din pinaaǥi kenikew.
6 Mesuati zey heini se kenà, ne ebpezumdumahan dey is Nengazen he Megbevayè dey, su wey mebmeupiya is langun para kenami.”
7 Kedlavey te sepulù he andew, nekidlalag is Nengazen ki Jeremias.
8 Umbe, impetiǥum ni Jeremias ensi Johanan duma te langun he menge zuma zin he menge upisyal te menge sundaru, ragkes en is langun he menge etew zutun puun te kinemevevaan pehendiyà te kinetikangan is ked-etew zin.
9 Migkaǥi si Jeremias diyà te kandan te, “Midhengyuan a keniyu he mebpekidlalag a te Nengazen he Megbevayà te Israel, ne iyan heini tavak din:
10 Emun kenè kew ed-awà kayi he tanà ed-enawen ku sikiyu wey edlig-enan, ne kenè ku sikiyu edezeetan. Su ingkeseeng ku is kezeetan he impeseǥazan ku keniyu.
11 Kenè kew en egkahandek te hadì te Babilonia su zuma a keniyu ne edlibriyen ku sikiyu emun edezeetan kew zin.
12 Egkehizuwan ku sikiyu. Ebpengelinteuwan ku he mehizuwi kew zin, su para tuguti kew zin he kenè kew maawà kayi te tanè niw.”
13 “Iyan, emun kenè niw edtumanen heini is nekaǥi te Nengazen he Megbevayè niw su egkaǥi kew te, ‘Ed-awè key kayi he tanà.
14 Edhendiyè key te Ehipto ne ziyè key ed-ubpà su wazà diyà tebek wey vitil.’
15 Iyan heini idtavak keniyu te Nengazen he Mekeǥeǥehem he Megbevayà te Israel: ‘Sikiyu is nesamà he menge etew te Juda, emun disididu kew he ziyè ed-ubpà te Ehipto,
16 is tebek wey vitil he igkahandek niw edtundug keniyu, ne ebpematey kew ziyà.
17 Uya, is langun he egkesuat he ed-ubpà diyà te Ehipto ebpatey te tebek, bitil, wey zaru. Wazà minsan hentei kandan he egkelibri etawa ebpekelingkawas te kezeetan he ibpeseǥazan ku kandan.’
18 “Migkaǥi pa is Nengazen he Mekeǥeǥehem, he Megbevayà te Israel te, ‘Iring te impeseǥazan ku te menge etew ziyà te Jerusalem is rimeǥas te utew ku kegkepauk, ibpeseǥazan ku zaan heini keniyu emun edhendiyè kew te Ehipto. Edrewakan kew wey egkelimezangan is menge etew tenged keniyu. Ed-un-undahan kew zan wey edsudien, ne kenè kew en ebpekelikù diyà te tanè niw.’
19 “Sikiyu is nesamà he menge etew te Juda, migkeǥiyan kew te Nengazen he kenè kew iyan medhendiyà te Ehipto. Purungi niw tentenuzi heini is impetizaan ku keniyu ǥuntaan.
20 Kenè iyan meupiya heini is ulaula niw! Midhengyuan a keniyu he medangep a ziyà te Nengazen para keniyu, ne migkaǥi kew pa he ebeelan niw is langun he egkeǥiyen din diyà te keniyu.
21 Ne ǥuntaan migkaǥi ku en is langun he migkaǥi te Nengazen he Megbevayè niw, piru wazè niw ǥihapun heini tumana.
22 Umbe, egkeǥiyen ku keniyu he siguradu he ebpematey kew te tebek, bitil, wey zaru diyà te Ehipto, he iyan egkesuatan niw te ed-ubpa.”