45
Is Lalag para ki Baruc
1 Hein ikeepat he tuig te kedhadì ni Jehoyakim diyà te Juda he anak ni Josia, insurat ni Baruc is indikta kandin ni Jeremias.
2 Migkaǥi si Jeremias te, “Baruc, iyan heini migkaǥi te Nengazen he Megbevayà te Israel ziyà te kenikew:
3 Migkaǥi ka te, ‘Mekehizuhizu a su mid-umanan te Nengazen is menge igkerasey ku. Neveley e en te kedag-es, wey wazè ku en kebpekehimeley.’
4 “Baruc, migkaǥi pa is Nengazen te, ‘Ebengkaǥen ku is nasyun he mibangun ku. Ebezuten ku is impemula ku. Ebeelan ku heini ziyà te tivuuk he tanà.
5 Edtinguhè ke pe be te zekelà he menge vutang? Kenè en kinahanglan, su ibpesaǥad ku te kezeetan is langun he menge etew, piru edlibriyen ku mulà sikew te kemetayen minsan hendei ka ebpevayà. Iyan a, is Nengazen, is migkaǥi kayi.’ ”