14
Is Kebehina te Tanà Diyà te Edsenlepan he Egketengkilizan te Jordan
1 Iyan heini paaǥi te kebehina eni Eleazar he memumuhat, ni Josue he anak ni Nun, wey te menge pengulu te menge pemilya te kada tribu te Israel te zuma pa he menge tanà diyà te Canaan he nepengevilin te menge Israilihanen:
2 Midtuman dan is suǥù te Nengazen ki Moises, umbe sikan is siyam wey tengà he tribu mibahin diyà te kandan is tanà pinaaǥi te kedripa.
3-4 Mibeǥayan eni Moises te kandan he vahin sikan is dezuwa wey tengà he menge tribu ziyà te zapit te edsilaan te Jordan. Wazè din beǥayi te vahin is menge kevuwazan ni Levi, piru mibeǥayan din sikandan te menge inged he egkeubpaan dan wey menge penebtavà para te menge uyaǥen dan. Is kevuwazan ni Jose mibahin te zezuwa he tribu–is tribu ni Manase wey is tribu ni Efraim.
5 Nevahin haazà is tanà diyà te menge Israilihanen sumalà te insuǥù te Nengazen ki Moises.
Imbeǥey ki Caleb is Hebron
6 Midhendiyà te ki Josue ziyà te Gilgal is nepipira he etew te tribu ni Juda. Is sevaha kandan iyan si Caleb he anak ni Jefune he Kinishanen. Migkaǥi sikandin te, “Egketenuzan nu pe be sikan is migkaǥi te Nengazen diyà te ki Moises he suluǥuen te Megbevayà mehitenged kenita te zezuwa hein diyè kiw pa te Kadesh Barnea?
7 Ne 40 dutun he tuig is keǥurang ku hein midsuǥù a ni Moises te kebpeniid kayi he tanà, ne hein nekelikù a, midtudtul ku kandin is langun he netuenan ku.
8 Piru mibpelihandek te menge zuma ku is menge etew. Piru siak, metinumanen a te kedsunud te Nengazen he Megbevayè ku.
9 Umbe, zutun he andew midsaad si Moises kayi te kedì he ke sikandin te, ‘Tenged te metinumanen ka te kedsunud te Nengazen he Megbevayè ku, sikew wey is menge kevuwazan nu, egkaangken niw haazà is tanà he neumahan nu zutun te kebpeniid nu.’
10 “Ne 45 he tuig is midlavey puun te kegkeǥiya zutun te Nengazen diyà te ki Moises. Kemulu pa zutun edhipanew is menge Israilihanen diyà te sibsivayan. Ne ǥuntaan 85 en he tuig is keǥurang ku ne uuyag e pa ǥihapun pinaaǥi te tavang te Nengazen,
11 ne is desen ku iring gihapun te zesen ku hein midsuǥù a ni Moises. Ebpekehimu e pa ǥihapun te minsan hengkey, minsan is kebpekidtebek su is egkehimu ku ǥuntaan ne iring ded te egkehimu ku zengan.
12 Umbe, iveǥey nu kediey is menge vuvungan he insaad kediey te Nengazen. Iyan ka mismu nekezineg dengan he iyan menge meǥinged kayi is menge kevuwazan ni Anak ne melig-en is menge inged dan he miberengbeng. Piru pinaaǥi te tavang te Nengazen edsegseǥen ku sikandan keniyan he tanà su iyan heeyan insaad din kediey.”
13 Mibpenubtuvazan ni Josue si Caleb is anak ni Jefune, ne imbeǥey kandin is Hebron he para egkepengevilin din.
14 Umbe, taman en guntaan, is Hebron gaked te menge kevuwazan ni Caleb te anak ni Jefune te Kinishanen, su ǥeinà te mibpezumdumahan ni Caleb is Nengazen he Megbevayà te Israel.
15 Dengan Kiriat Arba is ngazan te Hebron, su tedeman ki Arba te utew nevantug he kevuwazan ni Anak.
Dutun he timpu neengked is tebek diyà te tanà te menge Israilihanen.