17
Is Tanà te Ketengà he Tribu ni Manase
1 Duen daan tanà he imbeǥey para te kevuwazan ni Manase te kakey he anak ni Jose. Is Gilead wey is Bashan he ziyà dapit te edsilaan te Wahig he Jordan imbeǥey ziyà te pemilya ni Makir su ǥeina te beǥani sikandin. (Si Makir he amey ni Gilead, iyan kinekekayan he anak ni Manase.)
2 Is tanà he ziyà dapit te edsenlepan te Wahig he Jordan, imbeǥey ziyà te zuma he menge kevuwazan ni Manase he iyan is menge pemilya ni Abiezer, Helek, Asriel, Shekem, Hefer, wey Shemida. Mibahinbahin heini ziyà te kada pemilya zan.
3 Ne zutun duen etew he iyan ngazan din si Zelofehad he anak ni Hefer te apù ni Gilead. Si Gilead anak ni Makir, ne si Makir anak ni Manase. Heini si Zelofehad wazè din menge anak he maama. Kekenà, pudu zà bahi he iyan ensi Mala, Noa, Hogla, Milca wey Tirza.
4 Midhendiyà dan te ki Eleazar he memumuhat, ki Josue he anak ni Nun, wey ziyà te menge pengulu, ne ke sikandan te, “Midsuǥù te Nengazen si Moises he ebpeveǥayan key te tanà iring te menge maama he menge kezuzumahi zey.” Umbe mibeǥayan sikandan te kandan he vahin su iyan heini migkaǥi te Nengazen.
5 Iyan heini hinungdan ke maan is nekaangken is tribu ni Manase te sepulù he vahin duen te tanà, gawas te Gilead wey Bashan he ziyà te edsilaan te Jordan,
6 su in-iring te menge kevuwazan din he menge maama is menge kevuwazan din he menge vahi su elin sikandan mibeǥayi te tanà. Is Gilead imbeǥey ziyà te zuma pa he menge kevuwazan ni Manase.
7 Is dulunà te tanà ni Manase, ne puun te Asher taman te Micmetat, diyà dapit te edsilaan he vahin te Shekem ne impehendiyà heini te zivavà, pehendiyà te tanà te menge meǥinged diyà te En Tapua.
8 (Is tanà he ebpekeelingkus te Tapua gaked te tribu ni Manase, piru is Tapua mismu he ziyà te dulunà te tanà ni Manase gaked te menge kevuwazan ni Efraim).
9 Ne is dulunà mibpehendiyà te zal-ug he Kana. Duen dezekelà he inged diyà te zivavà he vahin duen te zal-ug he ǥaked te tribu ni Efraim, minsan pa te neseled heini te tanà te tribu ni Manase. Is dulunà te tribu ni Manase midlaus diyà te egkezizaya he vahin duen te zal-ug taman te Daǥat he Mediteraneo.
10 Is tanà he ziyà te zivavà duen te zal-ug, ne gaked te tribu ni Efraim, ne is tanà he ziyà te zizaya zuen te zal-ug ne ǥaked te tribu ni Manase. Is dulunà te tribu ni Manase ziyà te edsenlepan iyan is Daǥat he Mediteraneo. Ne ziyà te zizaya he zapit te edsenlepan te tribu ni Manase dutun is tribu ni Asher, ne ziyà te zizaya he zapit te edsilaan dutun is tribu ni Isachar.
11 Diyà te tanà ni Isacar wey ni Asher, duen dutun menge lugar he ǥaked ni Manase he iyan is: Bet Shean, Ibleam, Dor (etawa Nafot), Endor, Taanac, Megido, wey is malù dezekelà he menge inged diyà te peliǥuy kayi.
12 Piru heini he menge inged wazà meubpai te menge kevuwazan ni Manase, su kenè dan egkesegseg is menge Canaanhen dutun.
13 Piru hein mibmelig-en en is menge Israilihanen, mid-uripen dan haazà is menge Canaanhen, piru wazè dan gihapun evuǥa sikandan.
14 Migkaǥi is menge kevuwazan ni Jose ziyà te ki Josue te, “Maan is senge vahin dà duen te tanà is imbeǥey nu kenami? Utew key mahabet su midtuvazan key te Nengazen.”
15 Midtavak si Josue te, “Emun utew kew en mahabet ne kenà ereg keniyu is menge vuvungan te Efraim, hendiyè kew te menge ketelunan te menge Pirisihanen wey menge Ripanhen. Ne hiǥawan kew ziyà te para keniyu.”
16 Mid-uman megkaǥi is menge kevuwazan ni Jose te, “Kenà ereg kenami is menge vuvungan, ne kenè dey egkezaag is menge Canaanhen diyà te menge suǥud su zuen dan menge kerwahi he putew. Ne iring ded daan te menge Canaanhen diyà te Bet Shean wey ziyà te menge inged he peliǥuy kayi, wey ziyà te Suǥud he Jezreel.”
17 Mid-uman medtavak si Josue te, “Geina te utew kew mahabet wey utew kew mekeǥeǥehem ne kenà senge vahin dà is bahin niw.
18 Egkaangken niw zaan is menge ketelunan diyà te vuvungan. Hiǥewani niw haazà is menge ketelunan ne egkaangken niw is kinetivuukan kayi. Ebpekehimu kew te kedsegseg te menge Canaanhen minsan mekeǥeǥehem dan wey zuen dan menge kerwahi he putew.”